Lukas 2

Jesus me boan.

1Muren Sesar Agustus, ndurhian asu gor masigane, i bo ndou nongen le ndro su lao aden masi, beg nemeni su, beg nemeni memrad asu, beg hondre ngarsu le buk aden. 2Le rang ogo, Gvirinius i ndorlaben ber gor Siria. 3Dogoro su ndramed masi gane, su iao le gor ad damsu, su habed do da gor hoger. 4Josev ber Galilea, i da le gor Nasaret, i iao le gor ad David, ngarn Betlehem, i da le gor Judea. I hom ndur David, ndurhian asu Juda. 5Maria, nambulen, ndurn i da ndrnen i la born ndro i. 6Sor la le gor, rang i gin me Maria i belengeni ndurn. 7I gini ndurn hom gamel, i nhui i la salo, i ilgi i le ndregei bulmagou, heb logna sor le um hom bui. 8Su ndramed ber gulue meh, su do da marboga, su da gulue meh lobing. 9Malabo Angelo ad Jehova meher ndro su, i dege rang ge, su noh manden. 10Angelo i boi le ndro su: Mbue mu go noh. E. lele, io bosui nongen hian ge me ndro mu, le ndro su ndramed masigane. 11Jesu, i ndur Jehova, gin meher Betlehem, gor ad David eruar. I bolumia mu. 12Gelman i ogo: Mu gal danoni su nhui mamemei le salo i da ndregei bulmagou. 13Malabo su Angelo mabosanged su me gane, su da lang, su bamugueni Jehova, su bai: 14Du gabmugueni Jehova, i da le belengan, goln le asu ndramed, i hengen su ndramed hian ge. 15Nongen boen, su Angelo su mul le belengan lie. Su gineao, su da gulue su meh, su hivane, su bode: Du gedne, du gal Betlehem, du gilndri longu ogo, Jehova gin boharni le ndro du. 16-17Su hilou roud, su danoni Maria sor Josev, ma mamemei, i da le ndregei bulmagou. Su ilndri i, boen su bosoui nongen ogo le ndro su gor mabosanged. 18Su masi, su hirong i, meluasu i ieb. 19Maria goln de dud nongen ogo bui, i hanguruen leri sidesi. 20Su ndremda meh, su mul, su mugueni Jehova, le longu masigane su gin ilndri, ma su gin hirongi, dege su Angelo su da gin boharni le ndro su.

Su hurdi Jesu le um ad Jehova.

21Manondruo muren, su sindrdi mandrn ad ndurn, boen su hasouni ngarn ad ndurn Jesu, dege Angelo gin bai, gina le ndro Maria mahanu. 22Mahangul muren rang ad Maria gina boen, beg hinen mandern rosan, dege Mose i gin bai goru, su ha huri Jesu me le um ad Jehova, su gobad le gor Jerusalem, beg bosilieni mbunana le ndro Jehova, 23dege Mose gin hondre le Buk Helian: Ndurgamel homo i da hanu, i ad Ndorlaben Jehova ge. 24Su beg dirhor le ndro Ndorlaben Jehova, dege Mose gin bai: Bal maruo, de ndurbal maruo. 25E lele, hom ndramed i barmanda, i da le gor Jerusalem, ngarn Simeon. I hom gamel, voaniso Jehova ge i da dogi monen le sal aden. I belengeni le rang, be Jehova beg rederhi su lao aden. Meluan Helian gin vong le ndro i. 26I gin boharni le ndro i, i de somad bui, na gi lendri Jesu, Jehova gin hinen i le Kristo. 27I ogo, i gin meher le um ad Jehova, Meluan Helian i gin rui i, i gin me be damen sor nanen Jesu ha huri ndurn, beg dirhor, dege Mose gin bai. 28I hedi Jesu le barnemen, i bamugueni Jehova i bai: 29Ndorlaben, malabo uo geloh lao adem, dege uo gin bai. 30Begmoro gin ilndri Jesu, i da Bolumiadu, 31uo do gin ilgi le ndro su gor masi. 32I sul ber lang, i da hinganen le ndro su Haiden, i engermernal asu lao aden ber Israel. 33Damen, sor nanen Jesu, meluasor i ieb le nongen aden i da gin bosoui le ad mbunana ogo. 34Simeon i hengen sor, boen i vong le ndro Maria, nanen Jesu: I ogo na glos boen i gedne lie, i gelman le ndro su mabosanged ber Israel, ma su gob iil le ndro i. 35Bersi muren mordo borla la bergolm. I gobharni hanguruen asu mabosanged. 36Hom Provet bihin ngarn Hanna, ndurbihin Vanoel, homo asu Aser, i da le um ad Jehova, i barmanda lie. Goru i gin ibdi hom gamel le nambulen, i da le um aden uru manonderdolo, boen nambulen i ginmad. 37I bihinao le uru manondrungul e hahu. I do da le um ad Jehova sidesi, i da bandri, i da lodu, lobing e lorang. 38I gin meher lie le lundieum, i bamugueni Jehova, i bosoui le mbunana ogo le ndro su masi, su da belengeni rang hian, i da beg meher le gor Jerusalem. 39Be su gin hinen mburer asu boen, dege Mose gin bai, su iao mul Galilea, le gor Nasaret, 40Mbunana Jesu i menda, i ndoa, hanguruen aden i monen ge. Golnisden ad Ndorlaben Jehova i da ndro i.

Mbunana Jesu la um ad Jehova.

41Uru si uru si, damen sor nanen Jesu, sor la Jerusalem, le gous asu Juda. 42Jesu, uru aden masongul e ruo, i la born ndro sor, 43i da ndro sor le gor Jerusalem. Gous asu boen sor dogi mul, mbunana Jesu de la born ndro sor bui, i dandon, dansor bui. 44Sor hanguruen i gina hanu la born ndro su masi. Sor dogi si, sor gahi i la dogrosu loun, e gous asor. 45Dansor danoni i bui. Malabo sor mul Jerusalem, sor gahi i la. 46Madolo muren, su danoni i le um ad Jehova, i da gin lugdo mi molengasu ndremda hernou, i hirong henunuen asu, i ndemani su le longu hendre e hendre. 47Su masi su hirong i, meluasu i ieb le nongen aden, i da gin bosoui. 48Sor gin ilndri i, ndrnesor i irgu. Nanen i vong le ndro i, i bai: Nduro, desa uo gin hinen i dagara? E lele, damem ma io iouoro gin gahi uo, gin noh le adem. 49I bode: Desa mor gin gahi io ie? Danmor bui, aga um ad Bo Domo? 50Dansor nongen aden bui. 51I la born ndro sor, su dogi mul gor Nasaret, i delengan le nongen asor. Nanen i bogulue nongen aden le bergoln hian ge. 52Jesu i menda, le mandrn ma gle meluan, golnisden ad Jehova i da ndro i, su ndramed voasuiso aden.

Currently Selected:

Lukas 2: LLENT

Highlight

Copy