Johanes 16

1Nongen ogo io gin bai le ndro mu, debosan mu bieni io. 2Su gob momen le ndro mu, ehe, rang i gmeher, homo ma homo i hanguruen, i gob mburer ad Jehova ge, ar i gdaii mu. 3De dansu Bo Domo ma io bugane. Le longu ogo su ghinen momen dagara ndro mu. 4Io gin bosoui longu ogo masi le ndro mu, bersi muren be rang dagara i gmehere, danmu hanguruen i, io da gin bai le ndro mu. Mahanu io de gin bosoui nongen ogo de la ndro mu masou, io da ndro mu ge sidesi.

Mburer ad Meluan Helian le ndro su ndramed ma le ndro su lao aden.

5Malabo io ha leng dogi le ndro i, i da gin rendegien io, homo ademu i de ndemani io bui: Uo gal oho? 6Io da gin bai nongen ogo le ndro mu, bergolmu i da gosusngo leri. 7Io bai le ndro mu longu hendre monen ge: Aga i hian ge, be io gbieni mu. Ar io de gbieni mu bui, ndremda sobani de meher de la ndro mu bugane. Be io gineao gane, io beg rendegien i le ndro mu. 8Ar i gin me, begmarsu ndramed i greu, i ghenunuen su le longu momen, le mburer ordo le ndro su, ma le gord ir belengen su. 9Aga longu momen asu, su de dansu boro ndoui ordo bui. 10Aga mburer ordo: Io gal ndro Bo Domo, de danmu ilndri io bui. 11Aga gord i da beg meher: Jehova gin bieni ndurhian ber boan boen. 12Io beg bosoui le ndro mu longu hendre e hendre, mabosanged i dandon, de danmu hirong i malabo masou, i ndoa ge ndro mu. 13I ge, Meluan Helian ndangen, be i gmehere, i gobharni le ndro mu longu masigane monen ndangen. I de absou le longu aden bugane. I absou le ndro mu longu hendre e hendre i da gin hirong i, i da gobharni me ndro du longu masi i da beg meher. 14I gabmugueni io leri, i ghedi gle memrad ordo, boen i daui le ndro mu, i gobharni i le ndro mu. Longu masigane ad Bo Domo, aga ordo ge. 15Ghanguruen i, io gin bai, i ghedi i me ordo, i gobharni i le ndro mu.

16Heb eluen bui muren, de danmu ilndri io bui, muren heb eluen bui, danmu ilndri io lie. 17Su holel asu lao aden su vong, homo le ndro homo, aga sa, i da vong le ndro du, heb eluen bui muren, de danmu ilndri io bui, ma lie, heb eluen bui muren danmu ilndri io lie. Hendre lie: Io gal ndro Bo Domo? 18Su vong, su boi: Dandu nongen aden bui, i da hanguruen sa, ar i boi: Heb eluen bui muren? 19Jesu i danen, su beg ndemani i le longu hendre, i vong le ndro su: Mu da bai homo le ndro homo le nongen ordo io da gin vong, heb eluen bui muren de danmu ilndri io bui. Heb eluen bui muren danmu ilndri io lie. 20Ndangen, ndangen io boi le ndro mu: Mu gu dang, mu gu reng, su gor masi ge, su gu mugmug leri. Bergolmu gosusngo, io ge, io garbelueni i gle mugmug ge. 21Ar ndurn ad hom bihin beg meher le ndrnen nanen, i gosusngo le rang aden, be ndurn gin me, i de hanguruen rang aden momen ma ngendian aden hebsa bui. I mugmug ge, hom ndramed gin me le boan. 22Mu dagara lie, bergolmu i gosusngo malabo, io beg ilndri mu lie, muren bergolmu i gu mugmug ge. Homo i de danen behena mugmug ademu bui. 23Boen le rang ogo, mu ndemani io gle longu hendre e hendre hebsa bui. Ndangen, ndangen io boi le ndro mu: Ar mu soling ndro Bo Domo le longu hendre e hendre, i ghengen i le ndro mu le ngoro. 24Sidesi, mabenan malabo mu de gin soling le ngoro bui, hian soling su ghengen i mu, danmu mugmug manden gmonen leri.

25Longu ogo io da gin bosoui le ndro mu le nongen dohongein ge, rang i gmeher, io de bosoui de la ndro mu heb nongen dohongein bui, io gbosoui nongen monen ge. 26Le rang ogo mu soling le ngoro, io de vong de la ndro mu bui, io gendemani Bo Domo i ghengen i le ndro mu. 27I ge, Bo Domo, i golnisden mu. I danen golmuisden io, mu gin boro i, Jehova gin rendegien io. 28Io gin meher le boan ogo, Bo Domo gin rendegien io, malabo io gbieni gor boan, io gmul le ndro Bo Domo. 29Malabo su lao aden su vong le ndro i: E lele, malabo uo bosoui me ndro du nongen monen ge, nongen dohongein bui. 30Malabo dandu i, uo da danem longu masigane, homo de ndemani uo le longu hendre bui. Dandu i, iou gin boro i, Jehova gin rendegien uo. 31-32Jesu i vong le ndro su i bodeie: Malabo ge, danmu boro i ie? E lele, rang i gmehere, i da baghege malabo, mu da ma sumbue ge, homo le horo, homo le horo gle um aden. Io ge, homo, giroh, io homo ge bui, Bo Domo i da ndro io. 33Nongen ogo io gin boi le ndro mu: Mandri ordo na gmeher ndro mu gleri. Su ber gor ogo su gob momen ndro mu, mbue mu go noh, io gin ndounen gor masi.

Currently Selected:

Johanes 16: LLENT

Highlight

Copy