Revelation 1

1Elleelli hananaw bessiyaawaa bare oosanchchatuwaa bessana mala, Xoossay Yesuusi Kiristtoosaw immeedda saxay hawaa; Yesuusi bare kiitanchchaa kiittiide, ha saxaa bare oosanchchaa Yohaannisa erisseedda. 2Yohaannisi be77iide tumatethaan odeedda ubbaby, Xoossaa qaalaanne Yesuusi Kiristtoosa markkatethaa. 3Ha maxaafaa nabbabiyaa uray #1:3 nabbabiyaa uray: Hawaa guussay ubba asay ittippe Xoossaa goshetiyaa woden hewanttussi qaalaa nabbabiyaa uray anjjetteeddawaa guussaa. anjjetteeddawaa; qassi ha timbbitiyaa maxaafaa sisiiyaawanttunne ha maxaafan xaafetteeddawaa naagiyaawanttu anjjetteeddawantta; ayissi gooppe, ha yewuu polettanaw wodii matatteedda.

Iisiyan De7iya Laappu Woosa Golletuwassi Kiitetteedda Sarotaa

4Taani Yohaannisi, Iisiyaa gadiyan #1:4 Iisiya gadiyaa, 1:4-3:22 de7iyaawe dabidaabbiyaa gidiide xaafetteedda. Iisiyaa gadii awayifii doliyaa bagganna de7iyaa Roome kawutethaa gidiide ha77i ha wodiyaan Turiike gadiyaa giide xeesettiyaawaa. de7iyaa laappu woosa golletoo yaagay;

kase de7iyaa Xoossaappe,

ha77ikka de7iyaa Xoossaappe,

sinthappekka yaana Xoossaappe,

qassi A kawutethaa oydiyaa sinthan

de7iya laappu ayyaanatuwaappe,

aadho keekatethaynne sarotethay

hinttenttussi gido. #Kes 3:14; Sax 4:5

5Qassi ammanetteedda markkaa,

hayquwaappe koyro denddeedda

Na7aappe,

sa7aa kaatatuwaa mooddiyaa

Yesuusi Kiristtoosappe

aadho keekatethaynne sarotethay

hinttenttussi gido.

I nuuna siiqeenne

qassi nu nagaraa aylletethaappekka

bare suuthan

nuuna kesseedda. #Isa 55:4; Maz 89:27

6Nuuni bare Xoossawunne Aawoo

oothana mala,

I nuuna kaatatuwaanne

qeesatuwaa ootheedda;

aw medhinaappe medhinaa gakkanaw

bonchchuunne

mooddiyaa wolqqay gido. Amen77i. #Kes 19:6; Sax 5:10

7Be7ite,

Yesuusi shaaryaani yee.

Asay ubbay, haray atto,

A caddeeddawanttukka

A be7ana;

sa7an de7iya asay ubbay

A gaasuwan yeekkanawantta.

Hawe tumuppe hananawaa. Amen77i. #Dan 7:13; Mat 24:30; Mar 13:26; Luq 21:27; 1Tes 4:17; Zak 12:10; Yoh 19:34, 37

8Kase de7iyaawe, ha77ikka de7iyaawe, sinthappekka yaana Goday, Ubbaappe Wolqqaama Xoossay, <<Ubbabbaw Alfaynne Omeegay, koyruunne wursethay Taana>> #1:8 Alfaynne Omeegay: Hawaa guussay Ooratha Caaquu koyro Griike Qaalaan xaafetteedda diraw, koyruunne wurssethay gaanaw koyyiide, Alfaa giyaa Griike koyro pidoliyaa akkiide wurssethaw qay Omeegaa giyaa wurssethaan de7iyaa pidoliyaa akkeeddino. Hawantta guussay leemisuwan Dawuroothuwaa pidolatuwaa akkintto [A, Z] yaagiyaawaa mala guussa. yaagee. #Sax 22:13; Kes 3:14

Kiristtoosi Saxaan Qoncceeddawaa

9Taani Yohaannisi, hinttenttu ishay, hinttenaana Yesuusi Kiristtoosa waayyiyaanne A kawutethaa qassi A danddayaa ittippe shaakettiyaawe, Xoossaa qaalaa odeedda dirawunne Yesuusawaa markkatteedda diraw, Piiximo giyaa haathay dooddo biittaan de7aaddi. 10Godaa gallassan taani Ayyaanan de7ay; taani taappe guyyenna malakataa waasuwaa mala wolqqaama kooshshaa sisaaddi. 11He kooshshay taana, <<Neeni be7iyaawaa maxaafan xaafa; Iisiyan de7iya laappu woosa golletoo, Efesoona, Samirineesa, Pherggaamoona, Tiyaaxiroona, Sarddeesa, Pilaadelifiyaa, Lodooqiyaa woosa golletoo yeedda>> yaageedda.

12Taani taw odiyaa kooshshaa be7anaw guyye simmaaddi; xomppiyaa wothiyaa laappu worqqaa ballatuwaa be7aaddi. 13He ballatuwaa giddon Asaa Na7aa malatiyaawaa be7aaddi; adussa afilaa bare gediya gathi mayyiide, worqqaa danccuwaa bare tiraan yuushshi aatheedda. #Dan 7:13; 10:5 14A huuphiinne A huuphiya binnanay bootha dorssaa isikiyaanne hewaappekka aadhdhiide shachchaa malatee; A ayfiikka tamaa lacuwaa malatee. #Dan 7:9; 10:6 15A gediikka coociyaa tamaan teeriide phooliyaa nahaasiyaa giyaa birataa malatee; A kooshshaykka wolqqaama shaafaa gunthaa mala. #Hiz 1:24; 43:2 16I bare ushechcha kushiyan laappu xoolinttatuwaa oyqqeedda. A doonaappe laa77u bagganna qaaretteedda mashshay keseedda. A deemuukka loythi poo7iyaa awayfiyaa malatee.

17Taani A be7eedda wode hayqqeeddawaadan hanaade, A gediyaa matan kunddaaddi. Bare ushechcha kushiyaa ta bolla wothiide, taana hawaadan yaageedda; <<Yayyoppa; koyruukka wurssethaykka taana. #Isa 44:6; 48:12; Sax 2:8; 22:13 18Taani de7uwan de7iyaawaa. Taani hayqqaaddi; shin be7a, medhi medhinawukka de7uwan de7ay. Hayquwaa qulppiinne Si7ooliyaa qulppii ta kushiyan de7ee. 19Simmi neeni be7eeddabaanne ha77i de7iyaawaa, qassi sinthappe hananabaa xaafa. 20Neeni ta ushechcha kushiyan be7eedda laappu xoolinttatuwaa bilethaynne qassi xomppatuwaa wothiyaa laappu worqqaa ballatuwaa bilethay hawaa; laappu xoolinttatuu laappu Woosa Golletuwaa kiitanchchatuwaa; #1:20 kiitanchchatuwaa: Hawantta guussay ammaniyaawantta kaalethiyaa cimatuwaa woy ammaniyaawanttoo kiitetteeddawantta. woosa golliyaa laappu worqqaa ballatuu laappu woosa golliyaa.

Currently Selected:

Revelation 1: dwrNT

Highlight

Copy