Markus 3

Yesus kasi bae satu orang pas hari Barenti Karja

3:1-6

(Matius 12:9-14; Lukas 6:6-11)

1Satu kali bagini, waktu orang Yahudi pung hari Barenti Karja, Yesus maso ka orang Yahudi pung tampa sombayang kombali. Di situ ada satu orang yang pung tangang mati sabala. 2Di situ jua ada orang-orang Farisi yang tinggal kong taru kira Antua tarus kata Antua mau kasi bae dia pas hari Barenti Karja tu ka seng. Dong biking bagitu par cari-cari alasang par kasi sala Antua.

3La Antua panggel orang yang pung tangang mati sabala tu la bilang par dia kata, “Bu, mari badiri di tenga!”

4Tarus Yesus tanya dong kata, “Kalo iko Kitab Torat, katong musti biking apa waktu hari Barenti Karja? Biking bae ka biking jahat? Kasi salamat ka bunu orang?” Mar dong seng bicara apapa.

5Antua nganga dong deng mara, mar Antua pung hati jua susa lai tagal dong pung hati karas. Tarus, Antua bilang par orang yang pung tangang mati sabala tu kata, “Lunjur ale pung tangang tu kamari!” Dia lunjur dia pung tangang par Antua, la oras itu jua dia pung tangang bae.

6Tarus, orang-orang Farisi dong langsung kaluar dari tampa sombayang tu la pi par orang-orang yang iko Herodes, la dong samua baku skongkol par bunu Yesus.

Yesus kasi bae orang banya di dano Galilea

3:7-12

7Tarus, Yesus deng Antua pung murid-murid pi ka dano Galilea. Orang-orang paleng banya dari propinsi Galilea datang iko Antua. Bagitu lai deng orang-orang dari propinsi Yudea, 8kota Yerusalem, daera Idumea, daera yang ada di aer Yordan pung sabala matahari nai, deng daera yang baku dekat deng kota Tirus deng kota Sidon. Dong samua datang par Antua tagal dong su dengar tanda-tanda herang yang Antua su biking. 9Tagal orang-orang yang datang iko Antua tu paleng banya, Antua suru Antua pung murid-murid par kasi siap parau par Antua nai biar Antua seng tagepe deng orang banya tu. 10Barang, Antua su kasi bae banya orang, jadi orang-orang saki dong baku soso par mau pegang Antua biar dong bisa bae.#Markus 4:1; Lukas 5:1-3 11Sabang kali orang-orang yang takanal lia Antua, dong tikang lutu di muka Antua la bataria kata, “Se tu Allah pung Ana!” 12Mar, Antua hokmat setang-setang yang ada dalang dong tu par jang paskali kasi tau kata Antua tu sapa.

Yesus pili Antua pung murid sapulu dua orang

3:13-19

(Matius 10:1-4; Lukas 6:12-16)

13Tarus, Yesus nai ka gunung satu. Antua panggel orang-orang yang Antua mau pili par jadi Antua pung murid la dong iko Antua. 14Tarus, Antua pili sapulu dua orang dari dong tu.#3:14 Ada teks bahasa Yunani jua yang bilang, “Antua pili sapulu dua orang dari dong tu deng panggel dong par Antua pung utusang-utusang”. Antua pili dong par pi sama-sama deng Antua deng par utus dong pi kasi tau Kabar Bae. 15Antua jua kasi kuasa par dong par user setang-setang. 16Sapulu dua orang yang Antua su pili tu nama: Simon yang Antua panggel par Petrus, 17Yakobis, deng dia pung sudara Yohanis. Dong dua tu Sebedeus pung anana. Yesus panggel dong dua par Boanerges yang pung arti ‘anana guntur’. 18Abis itu ada Andarias, Filipus, Bartolomeus, Matius, Tomas, Yakobis yang pung bapa par Alpeus. Abis itu Tadeus, Simon dari kalompok Selot,#3:18 Kalompok Selot tu satu kalompok orang Yahudi yang usaha par kasi bebas bangsa Yahudi dari pemerinta Roma. 19deng laste Yudas Iskariot#3:19 Yudas Iskariot tu pung arti, ‘Yudas dari kampong Kariot’. yang jual Antua.

Yesus pung kuasa labe basar dari Setang pung Raja pung kuasa

3:20-30

(Matius 12:22-32; Lukas 11:14-23)

20Abis itu, Yesus pulang ka ruma tampa dong biasa tinggal. Tarus, orang banya datang bakumpul kombali di ruma tu sampe Antua deng Antua pung murid-murid seng bisa makang. 21Waktu Antua pung kaluarga dengar itu, dong pi par ambe Antua, tagal dong bilang kata Antua su gila.

22Di situ ada guru-guru Torat yang datang dari kota Yerusalem. Dong laeng bilang par laeng kata, “He, Beelsebul su maso Dia. Dia pake Setang pung Raja tu pung kuasa par user setang-setang.”#Matius 9:34

23Dengar bagitu, Yesus panggel orang banya tu la kasi balajar dong deng babarapa ande-ande. Antua bilang kata, “Masa setang user setang tu bagemana? 24Conto bagini: Kalo rayat dalang satu karajaang tinggal kong baku prang, karajaang tu seng bisa batahang. 25Bagitu lai deng satu ruma tangga. Kalo orang-orang dalang ruma tangga tu tinggal kong baku bakalai, ruma tangga tu seng bisa batahang. 26Bagitu lai deng Setang pung Raja pung karajaang. Kalo setang-setang baku musu deng baku tatoki, karajaang tu seng bisa batahang deng pasti ancor.”

27“Conto laeng lai: Seng ada orang yang bisa maso ka orang yang kuat pung ruma par rampas dia pung harta kalo dong balong ika dia dolo to? Kalo suda, baru dong bisa rampas dia pung harta. Itu jua yang Beta biking par Setang pung Raja.”

28La Antua bilang par orang banya tu kata, “Dengar bae-bae tagal apa yang Beta bilang ni batul! Samua dosa yang manusia biking deng kata-kata hojat apa sa yang dong bilang, itu bisa dapa kasi ampong. 29Mar, sapa hojat Allah pung Roh, dia seng bisa dapa kasi ampong. Dia musti pikol dia pung dosa tu tarus-tarus.”#Matius 12:32; Lukas 12:10 30Yesus bilang bagitu tagal ada orang yang bilang kata Antua takanal.

Sapa yang jadi Yesus pung mama deng sudara-sudara

3:31-35

(Matius 12:46-50; Lukas 8:19-21)

31Waktu Yesus ada kasi balajar orang banya di ruma tu, Yesus pung mama deng sudara-sudara datang ka situ. Dong badiri di luar la minta satu orang panggel Antua. 32Waktu itu, ada orang banya dudu ron Antua par dengar Antua kasi balajar dong. La ada dari dong yang bilang par Antua kata, “Tuang Guru e, Tuang Guru pung mama deng sudara-sudara ada di luar. Dong mau baku dapa deng Tuang Guru.”

33La Antua bilang par dong kata, “Beta pung mama deng Beta pung sudara-sudara tu sapa la?” 34Tarus, Antua nganga dong yang dudu di pinggir-pinggir Antua tu la bilang kata, “Beta pung mama deng Beta pung sudara-sudara tu kamong yang ada di sini! 35Sapa sa yang iko Allah pung mau, dia tu Beta pung sudara laki-laki, Beta pung sudara parampuang, deng Beta pung mama.”

Currently Selected:

Markus 3: ABMA

Highlight

Copy