Markus 2

Yesus kasi bae orang lumpu satu

2:1-12

(Matius 9:1-8; Lukas 5:17-26)

1Abis satu dua hari, Yesus bale ka kota Kapernaum kombali. Orang-orang dapa dengar kalo Antua ada di ruma yang Antua biasa tinggal di situ. 2Jadi, orang-orang paleng banya datang bakumpul di ruma tu sampe seng ada nat sadiki lai par badiri. Mala di muka pintu jua su pono sasa deng orang-orang. La Antua kasi balajar Allah pung ajarang par orang banya tu. Waktu Antua ada kasi balajar, 3ada orang-orang datang bawa orang lumpu satu par Antua. Ampa orang pikol dia deng palbet. 4Mar tagal orang talalu banya, dong seng bisa bawa maso dia par Antua. Jadi dong nai ka atas ruma tu la bongkar akang pung atap pas di atas Antua. Tarus, dong kasi turung dia lapis deng dia pung palbet par Antua. 5Waktu Antua lia dong biking bagitu, Antua tau kalo dong parcaya Antua bisa kasi bae dia, jadi Antua bilang par dia kata, “Ana e, Beta su kasi ampong ale pung dosa-dosa.”

6Di ruma tu ada guru Torat satu dua orang dudu di situ lai. Waktu dong dengar bagitu, dong bilang dalang hati kata, 7“Dia tu sapa sampe barani paskali bilang macang bagitu? Dia su hojat Allah! Seng ada manusia satu lai yang bisa kasi ampong orang pung dosa, cuma Allah sa!”

8Mar Yesus langsung tau dalang hati soal dong pung pikirang tu. Jadi, Antua bilang par dong kata, “Mangapa kong kamong pikir macang bagitu dalang hati? 9Coba pikir, mana yang labe gampang par bilang par orang lumpu ni: Beta su kasi ampong ale pung dosa-dosa, ka badiri, angka ale pung palbet tu la bajalang suda? 10Mar, biar kamong tau kalo Beta Ana Manusia ni pung kuasa di dunya par kasi ampong orang pung dosa-dosa, lia apa yang Beta mau biking ni!” Tarus, Antua bilang par orang lumpu tu kata, 11“Badiri, angka ale pung palbet tu la pulang!”

12Tarus, orang lumpu tu badiri, la langsung angka dia pung palbet, la bajalang kaluar dari ruma tu di muka dong samua. Waktu orang banya lia apa yang jadi tu, dong taherang-herang la puji-puji Allah kata, “Katong balong parna lia hal macang bagini ni!”

Yesus panggel Lewi par jadi Antua pung murid

2:13-17

(Matius 9:9-13; Lukas 5:27-32)

13Satu kali bagini, Yesus bale kombali ka pinggir dano Galilea la orang banya iko Antua, la Antua kasi balajar dong. 14Tarus, waktu Antua ada bajalang di situ, Antua dapa lia tukang tagi pajak satu ada dudu di tampa bayar pajak. Dia nama Lewi.#2:14 Lewi pung nama laeng tu Matius. Lia Matius 9:9; Lukas 5:27. Dia tu Alpeus pung ana. Antua bilang par dia kata, “Mari iko Beta!” Pas dengar bagitu, Lewi badiri la iko Antua.

15Abis itu, Antua deng Antua pung murid-murid pi makang di Lewi pung ruma. Waktu itu tukang tagi pajak banya deng orang-orang laeng yang orang Yahudi anggap bardosa jua ada datang la dudu makang sama-sama deng Yesus dong lai. Barang banya orang iko-iko Antua.

16Waktu itu, guru Torat satu dua orang dari kalompok Farisi lia Antua makang sama-sama deng tukang tagi pajak deng orang-orang yang orang Yahudi anggap bardosa tu. La dong bilang par Antua pung murid-murid kata, “He, mangapa kong kamong pung Guru tu dudu makang sama-sama deng tukang tagi pajak deng orang-orang bardosa tu?”

17Yesus dengar apa yang dong bilang tu, la bilang par dong kata, “Orang yang seng saki seng parlu dokter. Cuma orang saki sa. Beta datang bukang par panggel orang-orang yang rasa diri batul, mar panggel orang-orang bardosa.”

Yesus pung ajarang seng bole baku tacampor deng ajarang lama

2:18-22

(Matius 9:14-17; Lukas 5:33-39)

18Satu kali bagini, Yohanis Tukang Baptis pung murid-murid deng orang-orang Farisi ada puasa. La ada satu dua orang datang la tanya Yesus kata, “Yohanis Tukang Baptis pung murid-murid puasa. Orang-orang Farisi jua puasa lai. Mar mangapa kong Bapa pung murid-murid seng?”

19La Yesus jawab dong deng ande-ande kata, “Beta ni macang deng panganting laki-laki la Beta pung murid-murid tu macang deng panganting laki-laki tu pung tamang-tamang. Waktu ada pesta kaweng, dia pung tamang-tamang puasa ka? Dong seng puasa tagal dia masi ada sama-sama deng dong. 20Mar satu waktu, orang nanti ambe dia dari dong. Waktu itu baru dong puasa.”

21Abis itu, Yesus bilang ande-ande dua lai par kasi balajar dong. Antua bilang, “Seng ada orang yang tambal kaeng sapanggal yang masi baru di baju lama. Barang kalo dia biking bagitu, nanti kaeng yang baru tu susut la akang biking baju lama pung tampa tarobe tu labe tamba basar. 22Bagitu lai deng anggor. Seng ada orang yang simpang anggor baru dalang tampa simpang anggor bakas dari kambing pung kuli tu. Barang kalo dia biking bagitu, nanti anggor baru tu biking tampa simpang anggor bakas tu kambong la pica, la anggor tu tumpa. Deng bagitu, anggor deng akang pung tampa simpang tu, dua-dua tabuang. Mar orang musti simpang anggor baru dalang tampa simpang yang baru lai.”

Yesus pung kuasa par hari Barenti Karja

2:23-28

(Matius 12:1-8; Lukas 6:1-5)

23Satu kali bagini, pas orang Yahudi pung hari Barenti Karja, Yesus deng Antua pung murid-murid bajalang langgar kabong gandum. Waktu dong ada bajalang, Antua pung murid-murid pete gandum la makang akang.#Carita Ulang 23:25 24Mar ada orang Farisi lia itu la dong bilang par Yesus kata, “Lia tu! Mangapa kong Ale pung murid-murid biking apa yang orang seng bole biking pas hari Barenti Karja ni?”#2:24 Hari Barenti Karja: Orang Yahudi pung atorang bilang seng bole karja ka ambe hasil kabong pas hari Barenti Karja.

25La Antua jawab dong kata, “Kamong seng parna baca apa yang Raja Daud biking waktu dia deng dia pung anana bua seng pung apapa deng lapar ka? 26Dia maso ka dalang Tenda Sombayang waktu Abiatar jadi Imam Basar, la makang roti yang imam-imam su kasi par Allah, la kasi akang par dia pung anana bua makang lai.#1 Samuel 21:1-6 Dia tetap biking bagitu biar kata kalo iko atorang dalang Kitab Torat, cuma imam-imam sa yang bisa makang akang.”#Imam-Imam pung Atorang 24:5-9

27Antua jua bilang par dong lai kata, “Allah biking hari Barenti Karja par manusia, bukang biking manusia par hari Barenti Karja. 28Jadi, Beta Ana Manusia ni pung kuasa par bilang apa yang orang bisa biking deng seng bisa biking di hari Barenti Karja.”

Currently Selected:

Markus 2: ABMA

Highlight

Copy