Markus 16

Yesus hidop kombali

16:1-8

(Matius 28:1-10; Lukas 24:1-12; Yohanis 20:1-20)

1Pas amper malang, waktu orang Yahudi pung hari Barenti Karja su lewat, Maria Makdalena, Yakobis pung mama Maria, deng Salome bali rampa-rampa yang bobou sadap par pi goso Yesus pung mayat di kubur iko orang Yahudi pung biasa. 2Hari Minggu, hari partama dalang minggu itu tu, pas amper siang, dong pi di Yesus pung kubur. 3Di tenga jalang, dong laeng bilang par laeng kata, “E, nanti sapa yang guling batu yang tutu mulu kubur tu par katong?” 4Mar waktu dong su dekat, dong lia batu basar yang tutu mulu kubur tu su taguling.

5Tarus, dong maso dalang kubur tu. Mar, dong takajo paskali tagal lia laki-laki muda satu yang pake baju panjang luar warna puti ada dudu di dong pung sabala kanang. 6Mar laki-laki muda tu bilang par dong kata, “Jang taku! Beta tau kalo kamong cari Yesus orang Nasaret yang dapa salib tu. Antua su hidop kombali! Antua seng ada di sini! Lia tampa dong taru Antua pung mayat tu sa. 7Sakarang, jang tinggal di sini sa, mar pi kasi tau Antua pung murid-murid, apalai par Petrus kata, ‘Antua pi ka propinsi Galilea kamuka kamong. Kamong nanti lia Antua di sana macang deng apa yang Antua su parna bilang par kamong.’ ”#Matius 26:32; Markus 14:28 8aLa dong lari kaluar dari kubur tu tagal dong taherang-herang deng gamatar. Dong seng bilang apapa par sapa sa yang dong dapa di jalang tagal taku.#16:8 Teks bahasa Yunani kitab Markus ada yang cuma sampe di ayat 8a. Mar ada teks bahasa Yunani laeng dari kitab Markus yang kasi maso bagiang laste yang pende (ayat 8b), deng ada lai yang labe panjang (ayat 9-20).

[8bTarus, dong bilang pasáng tu par Petrus deng murid-murid yang laeng lai. Dong bicara seng panjang-panjang. Abis itu, lewat Antua pung murid-murid, Yesus sandiri kasi tau kabar yang kudus deng yang seng bisa binasa tu ka sagala tampa, mulai dari sabala matahari nai sampe ka sabala matahari maso. Kabar tu bicara soal bagemana manusia bisa salamat la hidop tarus-tarus deng Allah. Amin.]

Yesus kasi unju rupa

16:9-18

(Matius 28:9-10; Lukas 24:13-35; Yohanis 20:11-18)

[9Abis Yesus hidop kombali hari Minggu pagi-pagi, Antua kasi unju rupa partama kali par Maria Makdalena yang Antua parna user setang tuju dari dia. 10Tarus dia pi carita apa yang dia lia tu par orang-orang yang salalu sama-sama deng Antua yang masi susa paskali deng manangis tagal Antua su mati. 11Mar, waktu dong dengar Maria pung carita kata Antua su hidop kombali la dia su lia Antua, dong seng parcaya dia.

12Abis itu, Antua kasi unju diri dalang rupa yang laeng par dua orang yang iko-iko Antua yang ada bajalang ka luar kota. 13La waktu dong tau kalo itu Yesus, dong bale la carita akang par dong pung tamang-tamang, mar tamang-tamang tu jua seng parcaya.

14Akang pung laste, Antua kasi unju rupa lai par Antua pung murid sapulu satu tu waktu dong ada makang. Antua tagor dong tagal dong seng parcaya deng pung hati karas sampe dong seng parcaya orang-orang yang su lia kalo Antua su hidop kombali.

15Tarus Antua bilang par dong kata, “Pi ka sagala tampa di dunya ni la kasi tau Kabar Bae soal Beta par samua orang.#Matius 28:19; Utusang pung Carita 1:8 16Sapa yang parcaya deng kasi diri par dapa baptis, dia nanti salamat. Mar sapa yang seng parcaya, dia nanti dapa hukum. 17Orang-orang yang parcaya, dong nanti dapa kuasa par biking tanda-tanda herang. Dong nanti user setang deng Beta pung kuasa. Dong nanti bicara pake bahasa-bahasa yang dong seng tau. 18Kalo dong pegang ular babisa ka minong racong jua, dong seng cilaka. Kalo dong taru tangang di atas orang-orang saki, orang-orang saki tu nanti bae.”

Yesus nai ka sorga

16:19-20

(Lukas 24:50-53; Utusang pung Carita 1:9-11)

19Abis Tuhan Yesus bicara par dong, Antua tarangka ka sorga la dudu di Allah pung sabala kanang, tampa paleng panting. 20Abis itu, Antua pung murid-murid pi kasi tau Kabar Bae ka sagala tampa. Tuhan ada sama-sama deng dong la kasi unju kalo Antua pung kata-kata tu batul lewat tanda-tanda herang yang dong biking.]

Currently Selected:

Markus 16: ABMA

Highlight

Copy