Markus 12

Orang Yahudi pung pamimping-pamimping tu sama deng orang-orang yang kalesang kabong anggor

12:1-12

(Matius 21:33-46; Lukas 20:9-19)

1Abis itu, Yesus carita ande-ande satu par imam-imam kapala, guru-guru Torat deng orang Yahudi pung pamimping-pamimping. Antua bilang kata, “Satu kali bagini, ada satu orang buka kabong anggor. Dia biking pagar koliling akang. Dia gale lobang batu par biking tampa ambe aer anggor. Dia jua biking paparisa satu par jaga kabong tu. Abis itu, dia kasi sewa akang par babarapa orang par kalesang akang la dia pi ka negri laeng.#Yesaya 5:1-2 2Waktu su musing pete bua anggor, dia suru dia pung jongos satu par pi ambe dia pung bagiang dari orang-orang yang kalesang kabong tu. 3Mar, dong tangkap jongos tu, la pukul dia, la suru dia pulang deng tangang kosong. 4Abis itu, dia suru dia pung jongos satu lai pi par dong. Dong pukul dia pung kapala sampe luka deng biking malu dia. 5Tarus, dia bale suru dia pung jongos satu lai pi par dong, mar dong bunu dia. Dia jua ada suru jongos banya lai, mar ada yang dapa pukul deng ada yang dapa bunu.

6Sakarang cuma tinggal dia pung ana yang dia paleng sayang yang dia bisa suru. Akang pung laste, dia suru dia pung ana laki-laki tu pi par dong tagal dia pikir, ‘Kalo beta pung ana, dong nanti taru hormat par dia.’ 7Mar, orang-orang yang kalesang kabong tu laeng bilang par laeng kata, ‘He, dia ni yang nanti dapa kabong ni! Mari katong bunu dia biar katong bisa dapa kabong ni!’ 8Jadi dong tangkap dia la bunu dia la buang dia pung bangke di luar kabong tu.”

9La Yesus tanya dong kata, “Kalo su bagitu, tuang kabong anggor tu nanti biking apa orang-orang yang kalesang kabong tu? Dia nanti datang la bunu dong la kasi kabong tu par orang laeng kalesang akang.”

10Yesus bilang lai, “Masa kamong balong parna baca dalang Allah pung Tulisang yang bilang kalo Orang yang Allah su Angka par Kasi Salamat Manusia nanti seng dapa tarima, macang deng batu yang tukang-tukang su buang ka? Akang bilang kata,

‘Batu yang tukang-tukang su buang tu,

Akang su jadi batu pandasi yang paleng panting.

11Itu tu Tuhan yang biking

la akang luar biasa par katong.’ ”#Lagu-Lagu 118:22-23

12Orang Yahudi pung imam-imam kapala, guru-guru Torat, deng pamimping-pamimping tau kalo Yesus ada sindir dong deng ande-ande tu, jadi dong cari jalang par tangkap Antua. Mar tagal dong taku orang banya, dong kasi biar Antua la pi dari situ.

Yesus kasi balajar orang banya soal pajak

12:13-17

(Matius 22:15-22; Lukas 20:20-26)

13Tarus, babarapa orang dari kalompok Farisi deng babarapa orang yang iko Herodes dapa suru par datang coba-coba Yesus, biar dong bisa kasi sala Antua deng Antua pung kata-kata sandiri. 14Dong datang la bilang par Antua kata, “Tuang Guru e, katong tau kalo Tuang Guru tu jujur. Tuang Guru jua seng ambe pusing deng apa yang orang bilang soal Tuang Guru, tagal Tuang Guru seng lia-lia muka, mar kasi tau Allah pung mau deng batul. Jadi, kalo iko katong pung atorang agama, katong bisa bayar pajak par Raja Basar Roma ka seng?”

15Mar Antua tau kalo dong cuma munafik di muka Antua. La Antua bilang par dong kata, “Mangapa kong kamong coba Beta? Coba kasi unju kepeng gobang perak satu par Beta kamari!” 16La dong bawa kepeng satu dinar par Antua. Tarus Antua tanya dong kata, “Sapa pung gambar deng nama di kepeng ni?”

Dong jawab Antua kata, “Raja Basar Roma pung gambar deng nama.”

17La Antua bilang par dong kata, “Kalo bagitu, apa yang jadi Raja Basar Roma pung hak, kasi akang par dia. La apa yang jadi Allah pung hak, kasi akang par Antua.” Waktu dong dengar bagitu, dong taherang-herang deng Antua.

Orang mati nanti hidop kombali

12:18-27

(Matius 22:23-33; Lukas 20:27-40)

18Tarus, babarapa orang dari kalompok Saduki datang par Yesus. Kalompok Saduki seng parcaya kalo orang mati nanti hidop kombali.#Utusang pung Carita 23:8 Dong tanya Antua kata, 19“Tuang Guru e, Allah pung Juru Bicara Musa su tulis parenta satu par katong orang Yahudi: Kalo ada laki-laki satu kaweng la mati mar seng ada pung ana, dia pung sudara laki-laki musti kaweng deng dia yang su mati tu pung bini, biar dia pung sudara tu pung ana bisa jadi dia yang su mati tu pung ana.#Carita Ulang 25:5-6 20Satu kali bagini, ada laki-laki tuju ade-kaka. Dari dong tuju tu, yang nomor satu kaweng deng parampuang satu. Mar, laki-laki tu mati seng ada pung ana. 21Tarus, yang nomor dua jua kaweng deng dia pung konyadu tu. Mar dia mati deng seng ada pung ana lai. Bagitu lai deng yang nomor tiga. 22Akang jadi bagitu tarus sampe yang bongso. Dong tuju-tuju tu mati seng ada pung ana. Akang pung laste, janda tu jua mati lai. 23Jadi waktu Allah kasi hidop samua orang yang su mati kombali, bagemana deng janda tu? Kira-kira sapa yang jadi dia pung laki? Barang dong tuju samua su kaweng deng dia.”

24Tarus, Yesus bilang par dong kata, “Kamong su ilang jalang tagal kamong seng mangarti Allah pung Tulisang deng seng mangarti Antua pung kuasa. 25Barang, waktu Allah su kasi hidop orang-orang mati kombali, dong seng kaweng lai mar hidop macang deng malekat di sorga yang jua seng kaweng. 26La soal orang-orang mati nanti hidop kombali, kamong pasti su parna baca kitab yang Musa tulis to? Di situ ada carita kata waktu dia ada di rumpu baduri yang tabakar, Allah bilang par dia kata, ‘Beta ni Allah yang Abraham, Isak, deng Yakub ada somba.’#Kaluar dari Mesir 3:6 27Memang dong su mati, mar dong pung roh tetap hidop deng ada somba Allah. Jadi, Antua bukang Allah dari orang mati, mar orang hidop. Kamong su ilang jalang sama sakali.”

Yesus kasi balajar orang soal parenta yang paleng panting

12:28-34

(Matius 22:34-40; Lukas 10:25-28)

28Waktu itu, ada guru Torat satu dengar Yesus baku soal jawab deng orang-orang dari kalompok Saduki tu. Dia tau kalo Antua jawab dong deng batul. Dia datang par Antua la tanya Antua kata, “Tuang Guru e! Dari Allah pung parenta samua, parenta mana yang paleng panting?”

29Antua jawab dia kata, “Parenta yang paleng panting, yang partama tu bagini, ‘Hoe orang-orang Israel e, pasang talingang la dengar bae-bae! Tuhan tu katong pung Allah. Tuhan tu cuma ada satu areng-areng sa. 30Kamong musti sayang Tuhan Allah yang kamong somba tu deng kamong pung hati antero-antero, kamong pung jiwa antero-antero, kamong pung pikirang antero-antero, deng kamong pung kuat antero-antero.’#Carita Ulang 6:4-5 31La parenta yang kadua tu bagini, ‘Sayang orang laeng macang deng kamong sayang kamong pung diri sandiri.’#Imam-Imam pung Atorang 19:18 Seng ada parenta laeng yang labe panting dari dua parenta tu.”

32Tarus, guru Torat tu bilang par Antua kata, “Apa yang Tuang Guru bilang tu batul paskali. Tuhan tu cuma ada satu areng-areng deng seng ada laeng lai, cuma Antua sa.#Carita Ulang 4:35 33Itu batul kalo katong musti sayang Antua deng katong pung hati antero-antero, katong pung pikirang antero-antero, deng katong pung kuat antero-antero. Katong jua musti sayang orang laeng macang deng katong sayang katong pung diri sandiri. Samua tu labe panting dari samua korbang binatang yang katong bakar deng apa sa yang katong kasi par jadi korbang par Allah.”#Hosea 6:6; 1 Samuel 15:22; Nasehat-Nasehat 21:3

34Antua lia kalo guru Torat tu mangarti apa yang Antua bilang tu tagal dia jawab Antua deng pikirang tajang. La Antua bilang par dia kata, “Ale su mau jadi Allah yang pegang parenta jadi Raja tu pung orang.” Abis itu, seng satu orang lai yang barani tanya apapa dari Antua.

Yesus tu Raja Daud pung Tuhan deng turunang

12:35-37

(Matius 22:41-46; Lukas 20:41-44)

35Waktu Yesus kasi balajar orang di orang Yahudi pung Tampa Sombayang Pusat pung kintal, Antua tanya kata, “Guru-guru Torat bilang kata Orang yang Allah su Angka par Kasi Salamat Manusia tu Raja Daud pung turunang. Itu batul. Mar kalo iko kamong, Antua tu Raja Daud pung turunang sa ka? 36Barang, Allah pung Roh pimping Daud par bilang kata,

‘Tuhan Allah su bilang par beta pung Tuhan kata:

Mari dudu di Beta pung sabala kanang, tampa paleng panting, sampe Beta kasi kala Ale pung musu-musu la biking dong tundu par Ale.’#Lagu-Lagu 110:1

37Jadi, kalo Daud sandiri panggel Orang yang Allah su Angka par Kasi Salamat Manusia tu par ‘beta pung Tuhan’, Antua mau jadi Raja Daud pung turunang tu bagemana lai?”

Orang banya yang ada di situ paleng sanang dengar Antua pung ajarang tu.

Jang iko guru-guru Torat pung kalakuang

12:38-40

(Matius 23:5-7; Lukas 20:45-47)

38Waktu Yesus ajar orang banya tu, Antua bilang par dong lai kata, “Kamong musti ati-ati deng guru-guru Torat. Dong suka bajalang kasana-kamari pake dong pung baju panjang luar yang bagus-bagus biar orang-orang tau kalo dong tu orang basar. Dong sanang kalo orang-orang taru hormat par dong di pasar-pasar. 39Dong jua suka dudu di muka kalo ada di tampa-tampa sombayang ka di pesta makang basar.#Lukas 11:43 40Dong parlente janda-janda par rampas janda-janda tu pung harta samua. La par tutu dong pung kajahatang, dong sombayang lama-lama biar orang anggap kalo dong tu orang bae-bae. Dong itu pasti nanti dapa hukumang yang labe barát.”

Janda kasiang kasi kolekta

12:41-44

(Lukas 21:1-4)

41Waktu Yesus masi ada di orang Yahudi pung Tampa Sombayang Pusat pung kintal, Antua dudu baku tangada deng peti derma la taru kira orang-orang kasi maso dong pung kepeng kolekta dalang peti tu. Banya dari orang kaya kasi maso kepeng banya. 42Tarus, janda kasiang satu datang lai la kasi maso kepeng gobang dua. Kepeng tu, akang pung nilai paleng kacil.#12:42 Waktu itu, tantara ka orang karja dapa bayar satu hari satu dinar. Yang janda kasiang ni kasi maso tu 1/64 dinar. 43La Antua panggel Antua pung murid-murid la bilang par dong kata, “Dengar bae-bae tagal apa yang Beta bilang ni batul! Janda kasiang tu kasi labe banya dari samua orang yang kasi kepeng dalang peti derma. 44Barang, dong samua kasi dari dong pung labe, mar janda tu kasi dari dia pung kurang. Apa yang dia pung par hidop hari-hari, dia su kasi akang samua-samua.”

Currently Selected:

Markus 12: ABMA

Highlight

Copy