Matius 19

Yesus larang orang par jang bacere

19:1-12

(Markus 10:1-12)

1Abis kasi balajar samua tu, Yesus kaluar dari propinsi Galilea la pi ka propinsi Yudea, di aer Yordan pung sabala. 2Di sana orang banya kawang-kawang datang iko Antua la Antua kasi bae orang-orang saki. 3Tarus, ada orang Farisi satu dua orang datang par coba Antua. Dong tanya Antua kata, “Tuang Guru e, kalo iko atorang dalang Kitab Torat, laki bisa cere dia pung bini deng alasang apa sa ka seng?”

4Antua jawab dong kata, “Kamong su baca ini dalang Allah pung Tulisang to? Dari dolo, waktu Antua biking manusia, Antua biking laki-laki deng parampuang#Carita Mula-Mula 1:27, 5:2 5deng bilang, ‘Tagal itu laki-laki nanti kasi tinggal dia pung mama-papa la jadi satu deng dia pung bini biar dong dua jadi satu.’#Carita Mula-Mula 2:24 6Jadi dong bukang dua lai, mar satu. Tagal itu, kalo Allah su biking dong dua jadi satu, jang paskali ada orang yang kasi pisa dong.”

7La dong bilang par Antua kata, “Kalo bagitu, mangapa kong Musa parenta laki-laki par kasi surat cere par dia pung bini kalo dia mau cere dia?”#Carita Ulang 24:1-4; Matius 5:31

8La Antua bilang par dong kata, “Justru tagal kamong pung hati karas sampe Musa kasi ijin kamong cere kamong pung bini. Mar dari dolo, waktu Allah biking manusia, akang seng bagitu. 9Dengar Beta bilang par kamong: Kalo bini maeng serong, dia pung laki bisa cere dia. Kalo bini seng maeng serong, mar dia pung laki tu cere dia la kaweng deng parampuang laeng, itu laki tu su maeng serong.”#Matius 5:32; Lukas 16:18; 1 Korintus 7:10-11

10La Antua pung murid-murid bilang par Antua kata, “Kalo memang hidop laki-bini musti macang bagitu, labe bae jang kaweng lai.”

11Mar Antua bilang par dong kata, “Seng samua orang bisa tarima kata-kata tu, cuma orang-orang yang Allah su pili sa. 12Barang, ada orang yang seng kaweng tagal dari lahir lai dia seng bisa kaweng. Ada orang yang seng kaweng tagal orang laeng biking sampe dia bagitu. Ada jua orang yang seng kaweng tagal dia pung mau sandiri biar dia bisa karja par Allah. Sapa yang bisa tarima ajarang ni, biar dia tarima akang.”

Yesus kasi berkat par anana kacil

19:13-15

(Markus 10:13-16; Lukas 18:15-17)

13Waktu itu, orang-orang bawa anana kacil par Yesus biar Antua taru tangang par kasi berkat deng sombayang par dong. Mar, Antua pung murid-murid tagor orang-orang tu. 14Mar Antua bilang par Antua pung murid-murid tu kata, “Kasi biar anana kacil tu datang par Beta! Jang pele-pele dong, tagal orang-orang yang macang dong tu yang jadi Allah pung orang-orang waktu Antua pegang parenta jadi Raja.” 15Abis bilang bagitu, Antua taru tangang la kasi berkat par anana tu la pi dari situ.

Orang kaya susa jadi Allah pung orang-orang

19:16-30

(Markus 10:17-31; Lukas 18:18-30)

16Satu kali bagini ada laki-laki satu datang par Yesus. Dia tanya Antua kata, “Tuang Guru e! Beta musti biking hal bae apa biar beta bisa hidop tarus-tarus deng Allah?”

17La Yesus bilang par dia kata, “Mangapa kong ale tanya Beta soal apa yang bae? Cuma ada Satu yang bae. Mar kalo ale mau hidop tarus-tarus deng Antua, ale musti iko Antua pung parenta-parenta.”

18La dia bilang par Antua kata, “Parenta yang mana?” Antua jawab, “Jang bunu orang, jang maeng serong, jang pancuri, jang jadi saksi yang bicara seng batul-batul,#Kaluar dari Mesir 20:13-16; Carita Ulang 5:17-20 19musti taru hormat par mama-papa, deng sayang orang laeng macang deng ale sayang ale pung diri sandiri.”#Kaluar dari Mesir 20:12; Imam-Imam pung Atorang 19:18; Carita Ulang 5:16

20La ana muda tu bilang par Antua kata, “Beta su biking akang samua. Apa yang masi kurang lai?”

21Tarus Antua bilang par dia, “Kalo ale batul-batul mau hidop tarus-tarus deng Allah di sorga, pi jual ale pung harta samua la bage akang pung kepeng par orang-orang kasiang. Kalo ale biking bagitu, ale nanti dapa harta di sorga. Abis itu, datang kamari la iko Beta.”

22Waktu ana muda tu dengar Antua bilang bagitu, dia pi deng hati susa tagal dia pung harta banya.

23La Yesus bilang par Antua pung murid-murid kata, “Dengar bae-bae tagal apa yang Beta bilang ni batul! Orang kaya paleng susa jadi Allah pung orang-orang biar Antua pegang parenta jadi Raja par dong. 24Beta ulang sakali lai! Masi labe gampang onta saekor maso lobang jarong dari orang kaya jadi Allah pung orang biar Antua bisa pegang parenta jadi Raja par dia.”

25Waktu Antua pung murid-murid dengar bagitu, dong herang paskali la bilang kata, “Kalo bagitu sapa bisa salamat?” 26Tarus, Antua nganga dong la bilang, “Memang manusia seng bisa kasi salamat dia pung diri sandiri, mar Allah bisa, tagal Antua bisa biking apa sa.”

27La Petrus bilang par Antua kata, “Tuang Guru e, katong ni su kasi tinggal samua-samua par iko Tuang Guru. Jadi katong nanti dapa apa?”

28La Antua bilang par Antua pung murid-murid kata, “Dengar bae-bae tagal apa yang Beta bilang ni batul! Nanti waktu Allah biking dunya ni jadi baru, la Beta Ana Manusia ni dudu di Beta pung kadera raja yang luar biasa, kamong yang iko Beta ni jua nanti dudu di sapulu dua kadera la pegang parenta par sapulu dua suku Israel.#Matius 25:31; Lukas 22:30 29Deng sapa sa yang kasi tinggal dia pung ruma, ka dia pung sudara laki-laki ka sudara parampuang, ka dia pung mama-papa, ka dia pung anana, ka dia pung kabong, tagal iko Beta, dia nanti tarima saratus kali labe banya dari yang dia kasi tinggal deng dia jua nanti hidop tarus-tarus deng Allah. 30Mar banya dari orang basar nanti jadi orang kacil, la banya dari orang kacil nanti jadi orang basar.”#Matius 20:16; Lukas 13:30

Currently Selected:

Matius 19: ABMA

Highlight

Copy