Yohanis 12

Maria sirang Yesus pung kaki deng minya narwastu

12:1-8

(Matius 26:6-13; Markus 14:3-9)

1Anam hari di muka orang Yahudi pung hari basar Paska, Yesus bale kombali ka kampong Betania. Betania ni, Lasarus yang Antua kasi hidop kombali tu pung tampa tinggal. 2Di situ, dong ada biking pesta basar satu par Antua. Waktu itu, Marta yang taru makang la Lasarus deng tamu-tamu dudu makang sama-sama deng Antua. 3Seng lama bagini, Maria datang bawa minya narwastu#12:3 Minya narwastu: Teks bahasa Yunani bilang minya tu pung nama nardos. Orang biking akang dari nardos pung akar. Akang batumbu jau paskali dari Israel, tagal itu sampe akang mahal. asli stenga liter. Minya tu mahal paskali baru paleng bobou sadap. Tarus, Maria sirang akang di Yesus pung kaki la seka akang deng dia pung rambu. Dalang ruma tu langsung bobou sadap.

4Mar Yesus pung murid satu nama Yudas Iskariot#12:4 Yudas Iskariot tu pung arti, ‘Yudas dari kampong Kariot’. yang nanti jual Antua tu bilang kata, 5“Minya tu paleng mahal.#12:5 Teks bahasa Yunani pake 300 dinar. Waktu itu, biasa gaji satu hari tu satu dinar (Matius 20:2). Jadi tiga ratus dinar tu sama deng gaji 300 hari. Mangapa kong seng jual akang sa la kasi akang pung kepeng par orang-orang kasiang?” 6Yudas bilang bagitu bukang tagal dia paduli deng orang-orang kasiang, mar tagal dia tu tukang pancuri. Dia biasa ambe kepeng dari kas kepeng yang dia pegang.

7La Yesus bilang par dia, “Kasi tinggal dia sa. Dia sirang minya tu par kasi siap Beta pung badang par dapa kubur nanti.#12:7 Orang Yahudi biasa sirang minya bobou sadap di mayat par kasi siap akang par dapa kubur. Mar Maria biking bagitu bukang tagal dia sadar kata Yesus mau mati, mar tagal dia sayang Antua deng mangkali tagal mau minta dangke dari Antua. 8Orang-orang kasiang salalu ada sama-sama deng kamong, jadi kamong bisa tolong dong apa tempo sa kamong mau. Mar Beta seng tinggal sama-sama deng kamong tarus.”

Imam-imam kapala rencana mau bunu Lasarus

12:9-11

9Banya dari orang-orang Yahudi yang dengar kalo Yesus ada di kampong Betania, dong pi ka sana. Mar dong pi bukang cuma par mau lia Yesus sa. Dong jua pi par lia Lasarus yang Antua su kasi hidop kombali tu. 10Tagal itu, orang Yahudi pung imam-imam kapala ator rencana par bunu Yesus lapis deng Lasarus. 11Barang, tagal apa yang jadi deng Lasarus tu sampe ada banya orang Yahudi yang seng mau iko imam-imam kapala tu lai, mar iko Yesus la parcaya Antua.

Orang banya puji-puji Yesus di Yerusalem

12:12-19

(Matius 21:1-11; Markus 11:1-11; Lukas 19:28-40)

12Akang pung eso bagini, banya orang yang su datang par biking hari basar Paska di kota Yerusalem, dong dengar kata Yesus ada di tenga jalang mau pi ka kota tu. 13Jadi, dong ambe jaga-jaga pohong palem la pi ka luar kota par baku dapa Antua. Dong bataria puji-puji Antua kata,

“Hosana!#12:13 Hosana ni kata dalang bahasa Aram yang pung arti ‘Tuhan kasi salamat katong!’ Mar waktu jamang Yesus, orang pake akang par puji-puji orang basar ka par bilang salamat datang ka par puji Allah.

Mari puji Antua yang datang deng Tuhan pung kuasa ni.

Mari puji Raja Israel ni.”#Lagu-Lagu 118:25-26

14Waktu Antua su dekat Yerusalem, Antua dapa keledai paranggang saekor la Antua nai akang. Apa yang Antua biking tu sama deng apa yang tatulis dalang Allah pung Tulisang kata,

15“Hoe orang-orang Yerusalem e!#12:15 Orang-orang Yerusalem: Teks bahasa Yunani bilang “Sion pung ana parampuang”. Itu tu nama laeng dari kota Yerusalem. Jang taku!

Lia, kamong pung Raja tu su datang!

Antua nai keledai paranggang saekor.”#Sakaria 9:9

16Waktu itu, Yesus pung murid-murid seng mangarti apa yang jadi tu. Mar waktu Antua mati la hidop kombali baru dong sadar kalo apa yang tatulis tu, itu tu soal Antua. Dong jua sadar kalo apa yang orang banya biking tu parsis deng apa yang Allah pung Tulisang tu su bilang.

17Orang-orang yang lia Antua panggel Lasarus dari dalang kubur la kasi hidop dia kombali tu, dong pi carita akang par orang banya. 18Tagal itu, orang banya tu kaluar dari dalang kota par baku dapa Antua. Barang, dong su dengar kalo Antua tu yang biking tanda herang basar tu. 19Waktu orang-orang Farisi lia itu, dong laeng bilang par laeng kata, “Ayo e! Katong seng bisa biking apapa lai. Coba lia tu! Samua orang su datang iko Dia.”

Yesus kasi tau soal Antua pung kamatiang

12:20-36

20Waktu orang Yahudi pung hari basar Paska, ada banya orang yang datang ka kota Yerusalem. Dari samua orang yang datang tu, ada satu dua orang Yunani yang datang par somba Allah lai. 21Dong pi par Filipus yang asal dari kota Betsaida di propinsi Galilea tu la bilang par dia kata, “Bu, katong mau baku dapa Yesus.”

22Abis itu, Filipus pi bilang akang par Andarias la dong dua sama-sama pi bilang akang par Yesus. 23La Yesus bilang par dong, “Su waktu par Ana Manusia ni dapa angka tinggi-tinggi.#12:23 Dapa angka tinggi-tinggi: Lia catatan kaki di Yohanis 7:39. 24Dengar bae-bae tagal apa yang Beta bilang ni batul! Beta ni sama deng biji gandum. Kalo orang tanang biji gandum, akang musti mati do baru akang bisa batumbu la babua banya.#12:24 Deng kata-kata ni, Yesus mau bilang kalo Antua nanti mati biar orang-orang Yahudi ka bukang Yahudi yang parcaya Antua, dong bisa hidop tarus-tarus deng Antua. Mar kalo akang seng mati, akang seng bisa babua banya. 25Bagitu lai deng kamong. Sapa yang sayang dia pung diri labe dari Beta, dia nanti seng dapa apapa. Mar sapa yang sayang Beta labe dari dia pung diri sandiri di dunya ni, dia nanti hidop tarus-tarus deng Allah.#Matius 10:39, 16:25; Markus 8:35; Lukas 9:24, 17:33 26Sapa sa yang karja par Beta, dia musti iko Beta tarus biar kalo Beta ada di mana, dia jua ada di situ lai. Barang, sapa yang karja par Beta, Beta pung Bapa nanti taru hormat par dia.

27Beta pung hati paleng susa paskali. Seng tau mau sombayang bilang apa sakarang ni. Masa Beta musti bilang, ‘Sio Bapa e, kasi lapas Beta dari sangsara ni?’ Seng! Mala tagal itu Beta datang ka dunya ni. 28Jadi Beta cuma bisa sombayang, ‘Bapa, kasi unju Bapa pung kuasa yang hebat tu jua.’ ”

Skrek bagini ada suara dari langit kata, “Beta su kasi unju Beta pung kuasa yang paleng hebat la Beta mau kasi unju akang lai.”

29Orang banya yang ada di situ dengar suara tu lai. Ada yang bilang kata itu guntur. Mar ada lai yang bilang kata itu malekat yang bicara deng Yesus. 30Mar Yesus bilang par dong kata, “Suara yang kamong dengar tadi tu bukang par Beta mar par kamong. 31Sakarang ni, Allah ada putus manusia di dunya ni pung parkara. Sakarang ni jua Antua ada mau kasi kala Setang pung Raja yang parenta dunya ni. 32Mar Beta, waktu Beta dapa angka tinggi-tinggi,#12:32 Dapa angka tinggi-tinggi: Lia catatan kaki di Yohanis 7:39. Beta nanti bawa samua orang datang par Beta.” 33Yesus bilang bagitu par kasi tau kalo Antua nanti mati deng cara bagemana.

34La orang banya tu bilang par Antua, “Bapa! Katong su parna dengar kalo dalang Allah pung Tulisang ada bilang kata Orang yang Allah su Angka par Kasi Salamat Manusia tu hidop tarus-tarus. Jadi, mangapa kong Bapa bilang kalo Ana Manusia tu nanti dapa angka tinggi-tinggi?#Yesaya 9:6; Danyel 7:14 Ana Manusia tu sapa?”

35Tagal itu Antua jawab dong kata, “Tinggal sadiki tempo sa Orang yang kamong panggel par Tarang ni ada sama-sama deng kamong. Jadi waktu Tarang ni masi ada, kamong musti bajalang sama-sama deng Tarang ni tarus, jang sampe galap tutu kamong pung jalang. Barang, sapa yang bajalang dalang galap seng tau mau pi ka mana. 36Jadi waktu Tarang ni masi ada sama-sama deng kamong, kamong musti parcaya Tarang tu, biar kamong jadi anana yang hidop dalang tarang.”

Abis bilang bagitu, Yesus langsung pi dari situ la seng mau unju rupa par dong lai.

Orang-orang Yahudi seng mau parcaya Yesus

12:37-43

37Biar kata Yesus su biking tanda-tanda herang banya di orang-orang Yahudi tu pung muka lai, dong tetap seng mau parcaya Antua sa. 38Apa yang dong biking tu sama deng apa yang Allah pung Juru Bicara Yesaya bilang kata,

“Sio Tuhan e! Sapa yang parcaya kabar yang katong bawa tu?

Tuhan kasi unju Antua pung kuasa lewat Antua pung orang suru-suru.

Mar seng ada yang sangka kalo Tuhan karja deng cara macang bagitu.”#Yesaya 53:1

39Yesaya jua su bilang soal mangapa kong dong seng bisa parcaya kata,

40“Tuhan su kasi buta dong pung mata deng su kasi tumpul dong pung pikirang,

biar dong seng dapa lia deng biar dong seng mangarti.

Antua biking bagitu biar dong seng bale cari Antua par kasi bae dong.”#Yesaya 6:10

41Yesaya bilang bagitu tagal dia su lia Yesus pung kuasa yang hebat. Jadi dia bilang soal Antua.

42Biar kata banya orang Yahudi seng parcaya Yesus, ada banya dari dong pung pamimping-pamimping yang parcaya Antua. Mar, dong seng barani mangaku akang tarang-tarang tagal dong taku jang sampe orang-orang dari kalompok Farisi larang dong par seng bole inja tampa sombayang lai. 43Dong seng barani mangaku tarang-tarang tagal dong labe suka manusia puji-puji dong, mar seng mau pastiu kata Allah puji-puji dong ka seng.

Yesus pung ajarang tu dasar par Allah hukum dunya ni

12:44-50

44Langgar babarapa waktu bagini, Yesus bataria kuat-kuat kata, “Sapa yang parcaya Beta, dia bukang cuma parcaya Beta sa, mar dia jua su parcaya Antua yang utus Beta datang ka dunya ni. 45La sapa yang lia Beta, itu sama sa deng dia su lia Antua yang utus Beta. 46Beta datang ka dalang dunya ni par jadi tarang, biar samua orang yang parcaya Beta seng tinggal dalang galap lai. 47Kalo ada yang dengar apa yang Beta bilang mar seng biking akang, Beta seng hukum dia. Barang, Beta datang ka dunya ni bukang par hukum manusia, mar par kasi salamat dong. 48Sapa yang manyangkal Beta deng seng mau tarima apa yang Beta bilang, dia nanti dapa hukum. Beta pung ajarang nanti jadi dasar yang Allah pake par hukum dia waktu dunya su mau kiamat. 49Barang, Beta seng bicara iko Beta pung mau sandiri, mar iko Beta pung Bapa pung mau. Antua tu yang utus Beta. Antua yang parenta Beta par bilang apa yang Beta musti bilang. 50Beta tau kalo Antua pung parenta tu biking orang hidop tarus-tarus deng Antua. Jadi Beta bilang apa sa yang Beta pung Bapa suru Beta bilang.”

Currently Selected:

Yohanis 12: ABMA

Highlight

Copy