Utusang pung Carita Kata-Kata Partama
Kata-Kata Partama
Kitab Yesus pung Utusang-Utusang pung Carita ni carita soal apa yang jadi abis Yesus bale kombali ka sorga. Lukas carita soal Allah pung Roh datang par Yesus pung murid-murid di hari Pentakosta la kasi kuasa deng pimping dong par kasi tau Kabar Bae soal Yesus (1:8, 2:1-13). La deng barani dong kasi tau Kabar Bae di Yerusalem, Yudea, Samaria, deng tampa laeng di antero karajaang Roma. Jadi, orang parcaya labe hari labe tamba banya, biar kata dong dapa siksa deng sangsara tagal parcaya Yesus.
Sapa yang tulis kitab ni: Orang yang tulis kitab Utusang pung Carita ni Lukas. Dia ni jua yang tulis kitab Lukas pung Kabar Bae soal Yesus. Lia Kata-kata Partama kitab Lukas.
Kitab ni par sapa: Lukas tulis kitab ni, bagitu jua deng kitab Lukas, par orang yang dia panggel par “Bapa Teofilus”. Mar, kitab ni jua panting par orang-orang yang cari tau soal Yesus Kristus. Lia Kata-kata Partama kitab Lukas.
Mangapa Lukas tulis kitab ni: Lukas tulis kitab ni par sambung dia pung kitab partama, Lukas pung Kabar Bae soal Yesus. Dia kasi lia bagemana Allah pung Roh pung kuasa karja lewat Yesus pung utusang-utusang, bagitu lai deng orang-orang parcaya laeng, par bantu dong kasi tau Kabar Bae soal Yesus par orang-orang Yahudi deng bukang Yahudi. Deng kuasa tu, dong bisa biking banya macang tanda herang par jadi bukti kalo apa yang dong ajar tu memang batul. Mala dalang susa deng sangsara yang orang-orang parcaya dapa, Kabar Bae soal Yesus tu tasiar tarus ka antero karajaang Roma. Itu kasi unju kalo samua ni bisa jadi, bukang tagal manusia pung usaha, mar tagal Allah pung Roh pung kuasa yang karja dalang orang-orang yang su satu hati deng Tuhan Yesus Kristus yang su bangkit tu. Lewat kitab ni jua, Lukas bilang kalo di muka Allah, seng ada beda orang Yahudi ka bukang Yahudi (10:15, 34-35, 45). Samua orang sama sa par Antua, jadi orang seng parlu maso agama Yahudi do baru jadi Yesus pung orang-orang (15:6-11).
Kitab ni tabage par babarapa bagiang:
| 1:1—8:3 | Yesus pung utusang-utusang pung karja di kota Yerusalem |
| 8:4—12:25 | Kabar Bae soal Yesus tasiar di propinsi Samaria deng Yudea |
| 13:1—14:28 | Paulus pung jalang partama kasi tau Kabar Bae soal Yesus |
| 15:1-35 | Yesus pung utusang-utusang bakumpul deng penatua-penatua di kota Yerusalem |
| 15:36—18:22 | Paulus pung jalang kadua kasi tau Kabar Bae soal Yesus |
| 18:23—21:26 | Paulus pung jalang katiga kasi tau Kabar Bae soal Yesus |
| 21:27—26:32 | Paulus dapa bui di kota Yerusalem deng Kaisarea |
| 27:1—28:31 | Paulus dapa bawa ka kota Roma |
Currently Selected:
Utusang pung Carita Kata-Kata Partama: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku