Utusang pung Carita 9

Saulus parcaya Tuhan Yesus

9:1-19a

1Waktu Yesus pung utusang-utusang ada kasi tau Kabar Bae par orang-orang, Saulus ni pung dara mandidi paskali par ancam orang-orang yang iko Tuhan Yesus tarus par bunu dong. Jadi, dia pi par orang Yahudi pung Imam Basar 2la bilang kata, “Tolong biking surat sapanggal jua par katong pung pamimping-pamimping di tampa-tampa sombayang di kota Damsik, biar kalo beta baku dapa laki-laki ka parampuang yang iko Tuhan Yesus tu pung ajarang, beta bisa tangkap dong la bawa dong ka kota Yerusalem par dapa sidang.”#Utusang pung Carita 22:4-5, 26:9-11

3Tarus, Saulus pi ka Damsik. Waktu dia su mau sampe di kota tu, skrek bagini, sinar puti mangkilat dari langit tapancar koliling dia. 4Oras itu jua, dia jatu ka tana. Tarus, dia dengar bagini ada suara yang bilang par dia kata, “Saulus, Saulus e! Mangapa ale siksa Beta?”

5Saulus bilang, “Tuhan e! Tuhan ni sapa?”

Antua bilang, “Beta ni Yesus yang ale siksa tu. 6Badiri la maso ka dalang kota tu. Di sana, nanti ada orang yang kasi tau apa yang ale musti biking.”#Utusang pung Carita 22:6-10, 26:12-17

7Samua orang yang ada bajalang sama-sama deng Saulus tu taherang-herang sampe dong seng bisa bicara. Barang dong jua dengar suara tu, mar seng lia sapa-sapa. 8Abis dengar Yesus bilang bagitu, Saulus badiri. Dia buka dia pung mata, mar seng dapa lia apapa. Jadi, dia pung tamang-tamang pegang dia pung tangang la bawa maso dia ka Damsik. 9Tiga hari sepe-sepe Saulus pung mata tinggal kong buta deng dia jua seng makang deng minong.

10Di kota Damsik tu, ada satu orang yang parcaya Yesus. Dia pung nama Ananias. Satu kali bagini, Tuhan Yesus datang kasi unju rupa par dia la bilang kata, “Ananias e!”

Ananias bilang, “Iya Tuhan! Beta ni.”

11Tuhan bale bilang par dia kata, “Badiri la pi ka jalang yang nama Jalang Lurus la cari Saulus orang Tarsus tu di Yudas pung ruma. Sakarang ni dia ada sombayang, 12la Beta su kasi lia par dia satu orang yang nama Ananias maso taru tangang di atas dia, biar dia bisa dapa lia kombali.”

13Ananias bilang par Tuhan kata, “Tuhan e! Orang banya su carita par beta soal dia tu. Dong bilang kalo dia tu su biking kajahatang paleng banya par Tuhan pung orang-orang di Yerusalem. 14La sakarang, dia su ada di sini deng kuasa dari imam-imam kapala par tangkap orang-orang yang parcaya Tuhan.”

15Mar Tuhan bilang par dia kata, “Pi sa! Barang, Beta su pili dia par pi kasi tau soal Beta par orang-orang bukang Yahudi deng dong pung raja-raja, deng par orang-orang Israel. 16Beta sandiri nanti kasi unju par dia kalo dia musti sangsara paskali tagal kasi tau orang soal Beta.”

17Abis Tuhan Yesus bilang bagitu, Ananias pi ka ruma yang Saulus ada tinggal tu. Sampe di ruma tu, dia maso la taru tangang di atas Saulus pung kapala la bilang kata, “Sudara Saulus e! Tuhan Yesus suru beta datang par ale ni. Antua tu yang datang kasi unju diri par ale di jalang waktu ale mau datang kamari. Antua suru beta datang biar ale pung mata bisa dapa lia kombali deng biar ale bisa tarima kuasa dari Allah pung Roh.”

18Oras itu jua ada apapa satu jatu dari Saulus pung mata. Akang macang deng ikang pung sisik. Tarus Saulus dapa lia kombali. Abis itu, dia badiri la Ananias baptis dia. 19aTarus, dia makang la jadi kuat kombali.

Saulus kasi tau Kabar Bae soal Yesus par orang-orang di Damsik

9:19b-25

19bSaulus tinggal deng orang-orang yang iko Yesus di kota Damsik babarapa hari bagitu. 20La oras itu jua, dia mulai kasi tau soal Yesus par orang-orang yang ada di orang Yahudi pung tampa-tampa sombayang. Dia bilang par dong kalo Yesus tu Allah pung Ana.

21Samua orang yang dengar apa yang Saulus bilang tu jadi herang. Tarus, dong baku tanya kata, “Dia ini ni yang su bunu basudara-basudara yang iko Yesus di kota Yerusalem to? Dia jua datang kamari par mau tangkap basudara-basudara yang iko Yesus la pi bawa dong par orang Yahudi pung imam-imam kapala to?”

22Mar Saulus ni pung kuasa labe hari labe batamba par kasi balajar orang. Orang Yahudi yang ada di Damsik taherang-herang tagal dia kasi bukti kalo Yesus tu Orang yang Allah su Angka par Kasi Salamat Manusia.

23Saulus tinggal di kota tu lama lai. Waktu dia ada tinggal di kota tu, orang Yahudi baku skongkol par bunu dia. 24Mar dia su dapa tau dong pung rencana tu kamuka. Dong siang-malang jaga dia tarus di kota Damsik pung pintu-pintu maso tu par mau bunu dia. 25Mar satu malang bagini, Saulus pung murid-murid kasi salamat dia. Dong kasi maso dia dalang karanjang basar satu la kasi turung dia deng tali dari jandela yang ada di tembok yang koliling kota tu.#2 Korintus 11:32-33

Saulus bakumpul deng orang-orang yang iko Yesus

9:26-31

26Waktu Saulus sampe di kota Yerusalem, dia coba bakumpul deng orang-orang yang iko Yesus yang ada di kota tu. Mar dong samua taku dia, jadi dong seng tarima dia. Barang, dong seng parcaya kalo dia tu batul-batul su jadi Yesus pung murid. 27Mar Barnabas tarima dia sa la pi bawa dia par Yesus pung utusang-utusang. Tarus, Barnabas kasi tau par dong samua kata, “Saulus ni su baku dapa deng Tuhan Yesus. Antua jua su bicara lai deng dia waktu dia ada bajalang pi ka kota Damsik. Saulus jua barani kasi balajar orang-orang soal Yesus di Damsik.”

28Jadi, Saulus tinggal tarus deng dong utusang-utusang di Yerusalem la pi sama-sama deng dong koliling kota tu, deng dia barani kasi tau soal Tuhan Yesus par orang-orang. 29Dia jua jaga baku soal jawab deng orang Yahudi yang bicara bahasa Yunani. Mar dong tu ada cari jalang lai par bunu dia. 30Waktu basudara-basudara yang iko Yesus tau kalo orang-orang ada mau bunu dia, dong bawa dia pi ka kota Kaisarea. La dari kota itu, dong bawa dia deng kapal ka kota Tarsus.

31Waktu Saulus su pi ka Tarsus, orang-orang yang parcaya Yesus yang tinggal di propinsi Yudea, Galilea, deng Samaria tu pung hidop jadi tenang. Allah pung Roh tolong dong, jadi dong parcaya Tuhan labe sunggu-sunggu lai. Dong taru hormat par Tuhan deng Allah pung Roh tolong dong tamba banya tarus.

Petrus kasi bae Eneas di kota Lida

9:32-35

32Satu kali bagini, waktu Petrus pi bajalang koliling banya tampa par mangente Tuhan pung orang-orang, dia singga lai di kota Lida. 33Di kota tu, dia baku dapa laki-laki satu nama Eneas. Eneas ni su dalapang taong tinggal sa di atas tampa tidor tagal lumpu. 34La Petrus bilang par dia kata, “Eneas e! Yesus, Orang yang Allah su Angka par Kasi Salamat Manusia tu su kasi bae ale. Bangong la manyimpang ale pung tampa tidor tu!”

Oras itu jua dia bangong. 35Waktu samua orang yang ada di Lida deng daera Saron lia kata Eneas su bae, dong samua kasi tinggal dong pung dosa-dosa la parcaya Tuhan.

Petrus kasi hidop Dorkas di kota Yope

9:36-43

36Di kota Yope ada parampuang satu. Dia tu Yesus pung murid lai. Dia pung nama Tabita. Dalang bahasa Yunani, dia pung nama tu Dorkas.#9:36 Tabita tu nama dalang bahasa Aram la Dorkas tu dalang bahasa Yunani. Dua-dua tu pung arti ‘rusa kacil’. Dorkas ni pung hidop paleng bae paskali. Dia jua jaga tolong orang-orang kasiang. 37Waktu Petrus ada di kota Lida, Dorkas ni dapa saki la mati. Tarus, orang-orang kasi mandi dia pung mayat la taru dia di kamar di lante atas. 38Lida ni akang seng jau dari Yope. Waktu orang-orang yang iko Yesus yang ada di Yope tau kalo Petrus ni ada di Lida, dong suru dua orang pi par Petrus la bilang kata, “Petrus e! Tolong bakira capat iko katong ka Yope do!”

39Oras itu jua, Petrus manyimpang la pi sama-sama deng dong. Bagitu dong sampe di tampa tu, dong bawa Petrus ni ka kamar yang ada di atas. Sampe di atas, samua janda badiri urung Petrus la manangis. Dong jua kasi unju par dia pakiang-pakiang deng baju-baju panjang luar yang Dorkas su manjai akang waktu dia masi hidop.

40Mar Petrus suru samua janda tu kaluar, tarus dia tikang lutu la sombayang. Abis itu, dia bale muka par Tabita pung mayat tu la bilang kata, “Tabita! Bangong!” Oras itu jua Tabita buka mata. Waktu dia lia Petrus, dia dudu. 41Tarus, Petrus pegang dia pung tangang la bantu dia badiri. Abis itu, Petrus panggel janda-janda tu deng basudara-basudara yang iko Yesus la kasi unju par dong kalo Tabita tu su hidop kombali.

42Kabar soal Petrus kasi hidop Tabita ni orang bicara akang di antero kota Yope sampe orang banya jadi parcaya par Tuhan Yesus. 43La dari oras itu jua, Petrus tinggal di kota tu. Dia tinggal sadiki lama di Simon pung ruma. Simon tu tukang kasi barsi kuli binatang.#9:43 Simon pung karja tu kasi barsi kuli binatang biar bisa pake akang par biking barang-barang macang sandal, tas, ka rim. Mar, orang Yahudi seng baku maso deng orang-orang yang karja macang bagitu, tagal dong anggap akang haram.

Currently Selected:

Utusang pung Carita 9: ABMA

Highlight

Copy