Utusang pung Carita 3

Petrus kasi bae orang lumpu satu

3:1-10

1Satu kali bagini, jam tiga sore, Petrus deng Yohanis pi ka orang Yahudi pung Tampa Sombayang Pusat. Jam tiga sore tu, orang Yahudi pung jam sombayang. 2Pas di Tampa Sombayang Pusat tu pung pintu basar yang nama Pintu Bagus, ada orang-orang pikol laki-laki satu yang lumpu. Laki-laki tu su lumpu dari lahir. Sabang hari ada orang yang jaga bawa dia ka dekat Pintu Bagus par minta-minta kepeng dari orang-orang yang maso ka kintal Tampa Sombayang Pusat. 3Waktu dia lia Petrus deng Yohanis su mau maso ka kintal Tampa Sombayang Pusat, dia minta kepeng dari dong dua. 4Dong dua bale muka nganga dia, la Petrus bilang par dia kata, “Bu e, coba angka muka lia katong dolo!”

5Tarus, dia angka muka lia dong dua. Dia pikir sa kalo dong dua nanti mau kasi apapa satu par dia. 6Mar Petrus bilang par dia, “Bu e, beta ni seng pung satu sen lai. Mar apa yang ada di beta sakarang ni, beta mau kasi par bu lai. Deng Yesus Kristus orang Nasaret tu pung kuasa, sakarang ni bu bajalang!”

7Tarus, Petrus pegang dia pung tangang kanang la bantu dia badiri. Oras itu jua, dia pung kaki jadi bae. 8Tarus, dia balumpa la bajalang kasana-kamari. Dia bajalang balumpa puji-puji Allah iko-iko dong dua maso ka kintal Tampa Sombayang Pusat.

9Samua orang yang ada di situ lia dia bajalang puji-puji Allah. 10Waktu orang-orang lia orang lumpu yang su bae tu, dong kanal dia. Dong tau kalo dia tu orang yang jaga dudu minta-minta kepeng di Tampa Sombayang Pusat pung pintu basar yang nama Pintu Bagus. Dong samua taherang-herang lia dia su bisa bajalang.

Petrus bicara soal Kabar Bae di Teras Salomo

3:11-26

11Laki-laki yang su bae dari panyaki lumpu tu tarus sa kele Petrus deng Yohanis la iko dong dua sampe di Tampa Sombayang Pusat pung teras satu. Teras tu nama Teras Salomo. Waktu dong tiga ada di situ, orang banya taherang-herang lia orang lumpu tu su bae. Jadi, dong datang bakumpul koliling dong tiga. 12Waktu Petrus lia orang banya tu, dia bilang kata, “Basudara orang Israel e! Mangapa kong kamong taherang-herang deng kajadiang ni? Mangapa kamong manganga katong macang bagitu? Kamong pikir kalo katong ni ada pung kuasa sampe dia bisa bajalang? Ka kamong pikir dia bae tagal katong dengar-dengarang par Allah?

13Pasang talingang la dengar bae-bae! Allah yang katong pung moyang Abraham, Isak, deng Yakub somba tu su biking sampe Yesus dapa puji-puji.#Kaluar dari Mesir 3:15 Yesus tu Allah pung Orang Karja yang salalu iko Allah pung mau. Kamong su kasi Yesus par Pilatus biar dia pung anana bua bunu Antua. Pilatus mau kasi lapas Antua, mar kamong bilang par Pilatus kalo kamong seng tarima Antua jadi kamong pung raja. 14Yesus tu Orang yang Kudus deng yang Batul. Mar kamong seng mau tarima Antua sampe kamong minta Pilatus kasi lapas pambunu satu par kamong.#Matius 27:15-23; Markus 15:6-14; Lukas 23:13-23; Yohanis 19:12-15 15Yesus tu yang biking sampe katong bisa hidop tarus-tarus. Padahal kamong su bunu Antua, mar Allah kasi hidop Antua kombali. La katong su lia deng mata kapala sandiri kalo Antua su hidop kombali. 16Kamong samua su kanal orang lumpu tu. Kamong jua su lia deng mata kapala sandiri apa yang jadi deng dia to? Dolo dia seng bisa bajalang, mar sakarang dia su bisa bajalang. Dia su bisa bajalang tagal dia parcaya kalo Yesus pung kuasa bisa kasi bae dia. Jadi, tagal dia pung parcaya par Yesus, dia bae.

17Basudara samua e! Beta tau kalo kamong bunu Yesus tagal kamong seng tau kalo Yesus tu Orang yang Allah su Angka par Kasi Salamat Manusia. Kamong pung pamimping-pamimping jua seng tau lai. 18Dolo-dolo Allah su bilang par Antua pung juru-juru bicara kalo nanti Orang yang Antua su Angka par Kasi Salamat Manusia musti sangsara. Waktu kamong bunu Yesus, apa yang Allah bilang tu su jadi. 19Tagal itu, kamong musti kasi tinggal kamong pung dosa-dosa la parcaya Allah, biar Antua kasi ampong kamong lai. 20Kalo kamong su kasi tinggal kamong pung dosa-dosa, Allah nanti kasi kuat kamong pung hati. Antua jua nanti utus Orang yang Antua su Angka par Kasi Salamat Manusia par datang parenta kamong. Orang tu Yesus. 21Yesus musti tinggal di sorga sampe Allah mau biking dunya ni jadi baru. Antua biking macang deng yang parna Antua janji dolo-dolo lewat Antua pung juru-juru bicara yang Antua su pili tu. 22Allah pung Juru Bicara Musa su parna bilang, ‘Tuhan Allah yang kamong somba tu nanti pili satu orang dari kamong par jadi Antua pung juru bicara macang deng beta. Kamong musti pasang talingang la dengar samua yang dia bilang par kamong. 23La sapa sa yang seng dengar apa yang Antua pung juru bicara tu bilang, Allah nanti user dia dari Antua pung orang-orang. Allah nanti hukum dia tarus-tarus.’#Carita Ulang 18:15, 18-19

24Dolo-dolo Allah pung juru-juru bicara samua, mulai dari Samuel sampe yang dari balakang dia, su parna kasi tau soal apa yang Yesus biking sakarang ni. 25Apa yang Allah parna janji par Antua pung juru-juru bicara deng katong samua pung moyang Abraham, katong samua su tarima akang lai. Antua bilang par Abraham kata, ‘Dari ale pung ana cucu satu, Beta nanti kasi berkat par samua bangsa di dunya.’#Carita Mula-Mula 22:18 26Allah utus Yesus yang karja par Antua tu datang kasi berkat kamuka par katong orang Yahudi. Berkat tu, Antua biking sampe katong satu-satu kasi tinggal katong pung dosa-dosa.”

Currently Selected:

Utusang pung Carita 3: ABMA

Highlight

Copy