Utusang pung Carita 14

Paulus deng Barnabas kasi balajar orang-orang di kota Ikonium

14:1-7

1Waktu Paulus deng Barnabas sampe di kota Ikonium, dong dua jua maso ka orang Yahudi pung tampa sombayang, macang deng yang dong biking di Antiokia. La dong kasi balajar ajarang soal Yesus deng barani sampe orang-orang Yahudi deng orang-orang yang bukang Yahudi#14:1 Bukang Yahudi: Teks bahasa Yunani bilang, “orang Yunani”. banya lai jadi parcaya Antua. 2Mar orang-orang Yahudi saparu yang seng mau parcaya Yesus tusu-tusu mulu par orang-orang yang bukang Yahudi, la kasi racong dong pung pikirang sampe dong mara basudara-basudara yang iko Yesus. 3Jadi, Paulus deng Barnabas tinggal lama lai di situ la deng barani paskali kasi balajar orang-orang soal Tuhan Yesus pung hati bae. Antua kasi kuasa par dong dua par biking tanda-tanda herang. Deng cara bagitu, Antua kasi unju kalo apa yang dong ajar tu batul. 4La orang-orang yang tinggal di Ikonium tu tapica jadi dua. Saparu iko orang-orang Yahudi la saparu lai iko dong dua. 5Orang-orang bukang Yahudi, orang-orang Yahudi, deng dong pung pamimping-pamimping mulai baku skongkol par siksa deng lempar dong dua deng batu sampe mati. 6Mar dong dua dapa tau akang, jadi dong dua paparipi kaluar dari Ikonium la pi ka kota Listra, kota Derbe deng kampong-kampong laeng di daera Likaonia dekat dua kota tu. 7Di daera tu dong dua kasi balajar Kabar Bae tarus.

Paulus deng Barnabas kasi balajar orang-orang di kota Listra

14:8-20

8Di kota Listra tu ada laki-laki satu. Dia pung kaki su lumpu dari dia masi mera-mera lai, jadi dia balong parna bajalang. 9Laki-laki tu ada dudu dengar Paulus kasi balajar orang-orang soal Yesus. Paulus lia dia la tau kalo dia parcaya kalo Yesus bisa kasi bae dia. 10La Paulus bilang karas-karas kata, “Sudara e! Badiri suda!” Tarus, dia balumpa badiri la bajalang.

11Waktu orang banya lia apa yang Paulus su biking tu, dong bataria deng bahasa Likaonia kata, “Dewa-dewa su turung ka tenga-tenga katong deng rupa manusia.” 12Dong pikir kata Barnabas tu bos jadi dong panggel dia par dewa Seus, tagal Seus tu dewa-dewa pung bos. La dong panggel Paulus par dewa Hermes, tagal dia yang jaga bicara. Hermes tu, dewa-dewa pung juru bicara. 13La dewa Seus pung imam datang dari tampa sombayang par dewa Seus yang ada di luar kota tu, bawa sapi laki-laki babarapa ekor deng krans-krans bunga ka kota pung pintu maso. Dia pi deng orang banya par mau kasi korbang sapi-sapi tu par Paulus deng Barnabas, par somba dong.

14Mar, waktu Barnabas deng Paulus dengar apa yang orang banya tu mau biking, dong rabe dong pung pakiang, tanda kalo dong pung hati susa paskali. La dong lari ka tenga-tenga orang banya tu la basaro kata, 15“Sio basudara e! Mangapa kong kamong biking katong macang bagini. Katong ni cuma manusia macang deng kamong! Katong datang kamari par kasi tau Kabar Bae par kamong samua biar kamong kasi tinggal kamong pung dewa-dewa yang seng bisa bantu kamong tu la iko Allah yang hidop, yang biking langit, daratang, lautang, deng akang pung isi samua. 16Dari dolo lai, Antua kasi biar samua bangsa di dunya hidop iko dong pung mau sandiri. 17Mar biar kata bagitu, Antua tetap kasi unju Antua pung hati bae par manusia biar dong tau kalo Antua tu ada. La bukti dari Antua pung hati bae tu, katong bisa lia akang dari ujang yang Antua kasi turung deng tatanamang yang katong tanang kasi kaluar hasil pas akang pung musing. Antua jua kasi makanang par katong deng biking katong pung hati sanang.”

18Biar kata Paulus deng Barnabas bilang bagitu par larang dong par jang kasi korbang sapi par somba dong dua lai, dong tinggal kong mau biking akang sa. Mar dong dua tinggal kong larang dong tarus, sampe akang pung laste, dong seng jadi biking akang.

19Waktu Paulus dong su tinggal babarapa lama di kota tu, orang-orang Yahudi dari kota Antiokia deng Ikonium datang ka kota tu la tusu-tusu mulu par orang banya yang ada di kota tu sampe orang banya tu parcaya dong. Tarus, dong lempar Paulus deng batu la hela dia kaluar dari kota tu, tagal dong pikir kalo Paulus su mati. 20Mar waktu orang-orang yang iko Yesus badiri ron Paulus, dia bangong la bajalang maso ka dalang kota tu kombali. Akang pung eso, Paulus deng Barnabas pi ka kota Derbe.

Paulus deng Barnabas bale kombali ka kota Antiokia di Siria

14:21-28

21Di kota Derbe, Paulus deng Barnabas kasi balajar Kabar Bae soal Yesus sampe orang banya iko Yesus. Abis itu, dong dua bale ka kota Listra, kota Ikonium, deng kota Antiokia, 22par kasi kuat orang-orang yang iko Yesus pung hati. Dong dua kasi samangat dong biar dong parcaya Tuhan Yesus tarus. Dong dua bilang kata, “Basudara e! Katong musti sangsara banya kamuka do baru katong nanti ada sama-sama deng Allah waktu Antua pegang parenta jadi Raja.”

23Di samua jamaat di kota-kota tu, Paulus deng Barnabas angka orang-orang par jadi penatua-penatua, la sombayang deng puasa biar Tuhan Yesus yang dong parcaya tu jaga penatua-penatua tu.

24Abis itu, dong dua bajalang tarus langgar daera Pisidia la sampe di daera Pamfilia. 25Waktu sampe di Pamfilia, dong bale ka kota Perga. Di situ, dong dua kasi tau ajarang soal Yesus. Abis dari kota tu, dong dua turung ka kota Atalia.

26Dari kota tu dong dua balayar kombali ka kota Antiokia di propinsi Siria. Dolo orang-orang parcaya di kota tu sombayang minta Allah kasi berkat basar par dong dua par biking dong dua pung karja par Antua. Sakarang, dong pung karja su klar, jadi dong bale kombali ka kota Antiokia. 27Pas sampe di kota tu, dong dua kumpul samua orang parcaya la carita apa yang Allah su biking dalang dong dua pung karja, deng bagemana Antua su buka jalang par orang-orang yang bukang Yahudi sampe dong jadi parcaya Yesus. 28Di kota tu dong dua tinggal lama lai deng orang-orang yang iko Yesus.

Currently Selected:

Utusang pung Carita 14: ABMA

Highlight

Copy