Utusang pung Carita 12

Malekat kasi kaluar Petrus dari bui

12:1-19

1Waktu Barnabas deng Saulus ada di kota Antiokia, Raja Herodes suru orang par tangkap orang-orang yang parcaya Yesus la siksa dong. 2Dia jua parenta dong bunu Yohanis pung sudara Yakobis deng parang. 3Waktu dia lia kalo orang-orang Yahudi dong sanang deng apa yang dia biking tu, dia suru tantara pi tangkap Petrus lai. Dong tangkap Petrus tu pas waktu orang Yahudi pung hari basar Roti Seng Pake Ragi.#12:3 Orang Yahudi pung hari basar Roti Seng Pake Ragi ni bajalang tuju hari pas orang Yahudi pung hari basar Paska. Dong biking hari basar ni par inga waktu dong pung moyang-moyang kaluar dari negri Mesir. 4Abis dong tangkap Petrus, dong kasi maso dia ka dalang bui. Herodes suru tantara ampa kalompok baku ganti par jaga dia. Satu kalompok ampa-ampa orang. Dia biking bagitu deng maksud par kasi sidang Petrus di muka orang banya abis hari basar Paska.#Kaluar dari Mesir 12:1-27 5Jadi Petrus maso bui. Mar orang-orang yang parcaya Yesus tinggal kong sombayang tarus-tarus par Allah biar Antua jaga dia.

6Waktu akang pung malang par eso ni Herodes mau kasi sidang Petrus di muka orang banya, Petrus tidor di tenga-tenga tantara dua orang. Dia dapa rante sama-sama deng tantara dua tu, satu di dia pung sabala kanang la satu lai di dia pung sabala kiri. La di muka pintu bui, ada tantara-tantara laeng yang jaga. 7Skrek bagini, Tuhan pung malekat satu badiri dekat Petrus sampe dalang bui tu tarang paskali. Malekat tu goyang-goyang Petrus par kasi bangong dia. Malekat tu bilang kata, “He, bangong capat!” Oras itu jua rante-rante yang ika Petrus pung tangang tu talapas.

8Tarus, malekat tu bilang par dia kata, “Pake ale pung baju deng sandal tu!” Tarus, Petrus iko apa yang malekat tu bilang. Malekat tu bale bilang par Petrus kata, “Pake ale pung baju panjang luar tu la iko beta!”

9Tarus, Petrus kaluar dari bui tu la bajalang iko malekat. Mar dia seng tau kalo apa yang malekat biking tu, akang batul-batul jadi. Dia kira kata Tuhan ada kasi unju apapa par dia. 10Petrus deng malekat bajalang langgar pos satu deng pos dua yang tantara ada jaga. Tarus, dong sampe di pintu besi basar satu yang baku tangada deng kota. Pintu tu tabuka sandiri la dong dua kaluar la bajalang sampe ka ujung lorong. Waktu dong dua ada bajalang, skrek bagini, malekat tu pi kasi tinggal dia.

11Abis malekat pi kasi tinggal Petrus baru dia sadar. Dia bilang, “Sakarang ni, beta batul-batul tau kalo Tuhan su suru Antua pung malekat datang par kasi salamat beta dari Herodes pung kuasa. Antua jua kasi salamat beta dari samua hal yang orang-orang Yahudi dong harap Herodes mau biking par beta.”

12Abis bapikir bagitu, dia pi ka Maria pung ruma. Maria ni, Yohanis yang jaga dapa panggel par Markus tu pung mama. Di ruma tu orang banya su bakumpul par sombayang. 13Waktu Petrus sampe, dia toki pintu pagar. Tarus, jongos parampuang satu datang par mau buka pintu pagar. Parampuang tu nama Rode. 14Waktu dia kanal kalo itu Petrus pung suara, dia sanang paskali sampe lupa buka pintu, mar lari maso ka dalang ruma la bilang par orang-orang yang ada di situ kata, “He, Petrus to ada di muka pintu pagar!”

15Dong bilang, “Ose katanggisang kapa?”

Mar dia tinggal kong bilang kata, “Batul e! Petrus ada di luar. Dia ada di muka pintu pagar.”

Dong bale bilang lai kata, “Se sala kapa? Mangkali itu malekat yang jaga Petrus yang datang par kasi tau apapa par katong.”

16Mar Petrus tinggal kong toki-toki pintu pagar di luar tarus. Waktu dong buka pintu la lia dia, dong taherang-herang. 17Tarus, Petrus kasi kode deng dia pung tangang biar dong tado. Abis itu, dia carita par dong bagemana Tuhan tolong dia kaluar dari bui. La dia bilang, “Pi kasi tau samua ni par Yakobis deng katong pung basudara laeng yang iko Yesus.” Abis itu, Petrus kaluar la pi ka tampa laeng.

18Akang pung eso pagi bagini, tantara-tantara yang jaga Petrus tu balisa paskali. Dong baku tanya kata, “Astaga, Petrus ada di mana?”

19Tarus, Herodes suru orang-orang par pi cari Petrus, mar dong seng baku dapa dia. Jadi, Herodes tanya ulang-ulang par tantara-tantara yang jaga Petrus tu. Mar dong seng tau apapa, jadi dia suru orang bunu dong. Abis itu, Herodes pi dari propinsi Yudea la tinggal di kota Kaisarea.

Herodes mati

12:20-24

20Raja Herodes paleng mara paskali deng orang-orang dari kota Tirus deng kota Sidon. Tagal itu, dong samua bakumpul la pili babarapa utusang par pi ka kota Kaisarea par baku dapa deng Herodes. Waktu sampe, dong pi buju Blastus kamuka do. Dia ni orang basar satu yang ator Herodes pung istana. Dong minta dia tolong dong par bicara deng Herodes biar dong bisa baku bae deng Herodes. Barang, dong pung negri dapa makanang dari Herodes pung negri.

21Jadi satu kali bagini, pas hari yang dong su janji par baku dapa deng Herodes, Herodes pake dia pung pakiang raja la dudu di kadera yang dia pake waktu jadi hakim par orang-orang pung parkara. Tarus, dia mulai bicara par orang-orang yang bakumpul di situ. 22Waktu dong dengar dia bicara, dong puji-puji dia basar-basar kata, “Ini ni dewa yang bicara, bukang manusia yang bicara!”

23Skrek bagini, Tuhan pung malekat biking dia saki barát paskali, tagal dia kasi biar dong puji dia, mar dia seng kasi hormat tu par Allah. Cacing yang ada dalang dia pung poro makang dia sampe dia mati.

24Labe hari, Allah pung ajarang soal Yesus labe tamba tasiar, sampe orang parcaya labe tamba banya lai.

Allah pili Barnabas deng Saulus par karja par Antua

12:25—13:3

25Waktu Barnabas deng Saulus su abis biking dong pung karja di kota Yerusalem, dong bale kombali ka kota Antiokia. Dong bale sama-sama deng Yohanis yang jaga dapa panggel par Markus tu.

Currently Selected:

Utusang pung Carita 12: ABMA

Highlight

Copy