लूकाल 19
19
येसु जकय्याना लोन दांतोर
1अल्हा आता पजा, येसु यरिहो नाटेनाल होंचेके मत्तोर. 2अद नाटेने वरोर जकय्या पोरोलतोर कर वसुल कियानोरा पोर्रो अदिकारि मत्तोर. ओर बागा सिरमंत मत्तोर. 3येसु बोर आंदुर हूळंतन इंचि ओर इनकुत्तोर, गानि अगा वेल्ले गर्दि मत्ताहाटीं हूळा पर्रा हिल्लोर. बारित्ते ओर पोट्टिगा मत्तोर. 4अदुनहाटीं ओर येसु होनना हर्दुक मुन्ने वितसि, ओन हूळालय उंदि नेडि मरा पोर्रो एकतोर. 5येसु अद मरातगा एवतस्के पोर्रो हूळसि, “जकय्या, बिराना हिळु रेय्या! इय्याला नाकु नीवा लोने आगाना मंता,” इंचि इत्तोर. 6इत्तारिते जकय्याल बिराना मराताल रेय्सि, कुसिते येसुन ओना लोन ओतोर. 7येसु जकय्याना लोन होत्तद हूळसि लोकुल्क, “ईर पापि मनकना लोन हेडमिं इंचि होत्तोर,” इल्हा गुल्गालय दल्गतुर. 8पजा जकय्याल नित्तिसि सामिन, “सामि, नावा सम्सारमताल सगम गरिबोर्कुंक हींतन, नना बोनना मुळाहचि येततद मत्ते, येततादानकन्ना नालुं अंताल्क एक्को मलाहचि हींतन,” इंचि इत्तोर. 9-10अस्के येसु, “तप्सि होत्ता पापि लोकुल्कुन पहकिसि, ओर्कुन पिसागोटालय मनकना रूपमते पुटतोन नना वातन. अदुनहाटीं ईरगुडा अब्राहामुना वंसमते पुटतोरे आंदुर इंचि, इय्याला ईना लोतोर पापमताल पिस्तुर,” इंचि वेहतोर.
पदि बंगारम बंडिना वेसुडि
(मत्तयाल 25:14-30)
11लोकुल्क ओर वेहाना पोल्लें केंजसेके मत्तुर. अगटाल येरुसलेम सहर दग्गेरेने मत्ता. इंदके येसु येरुसलेमते एवतस्के ओर पेनदा राज्येम निलाहनुर इनकुंचेके मत्तुर. अदुनहाटीं येसु ओर्क उंदि वेसुडि वेहतोर. 12“वरोर पेद्दा वंसमतोर मनकल मत्तोर, ओर राजाल आसि वायालय लक्कुटा देसेम होत्तोर. 13होनाका मुन्ने ओना पदि दासुल्कुन केय्सि, मनकंक पदि बंगारम बंडि हीसि, ‘नना मल्सि वायानादाका इव कोत्ताने मिमेट दंदा कीम्टु,’ इंचि इत्तोर.
14“गानि नाटेना लोकुल्क ओन हय्साकोंदुर, अदुनहाटीं, ‘ओर मापोर्रो राज्येम कियमळ माकु इस्टम हिल्ले,’ इंचि पेद्दा राजांक वेहालय पेरतोर्कुन ओना पज्जेन लोहतुर. 15पजा आ मनकल राजाल आसि मल्सि वातोर. ओर बोर्क अय्ते कोत्तां हीसि मत्तोरो ओर दंदा कीसि बच्चोन कमय कीतुरो हूळानाहाटीं आ दासुल्कुन केया वेहतोर. 16मोदाटा दासुड वासि, ‘मालक, निमे हीता पदि बंडिनतोनि नना इंका पदि बंगारम बंडिं कमय कीतन,’ इंचि इत्तोर. 17अस्के राजाल, ‘निमे बेस कबळ कीतिन, निमे बेसता दासुन आंदिन, निमे सिन्ना कबळतगागुडा विस्वासमलायक मत्तिन, अदुनहाटीं पदि नाह्कुन ताकसालय नीकु अदिकारम हींतन,’ इंचि इत्तोर. 18अल्हेने रोंडो दासुडगुडा वासि, ‘सामि! निमे हीता बंडिनतोनि नना इंका हेय्युं बंडिं कमय कीतन,’ इंचि इत्तोर. 19अस्के राजाल ओनगुडा, ‘निमे हेय्युं नाह्कुन पोर्रो अदिकारिन आकिन,’ इंचि इत्तोर. 20पजा इंकावरोर दासुड वासि, ‘सामि! इद हूळा निमे हीता बंगारमता बंडिं. इदुन नना पेगुने दोहाचि मक्किचि इरतन. 21बारित्ते निमे कळक मनकन आंदिन, अदुनहाटीं नना वेरियतन. निमे बद अय्ते इर्रा हिल्लिन अदुन तेंडकुंतिन, निमे वीतवगा कोय्यंतिन,’ इंचि इत्तोर. 22अस्के राजाल ओन इल्हा इत्तोर, ‘अरे निमे लंडु दासुन आंदिन! नीवा तोळ्दाल पेय्सता पोल्लेतेन नीवा न्यायम कींतन. नना कळक मनकन, नना बद अय्ते इर्रा हिल्लेन अदुन तेंडकुंतन, नना वीतवगा कोय्यंतन इंचि नीकु एरपाटे मत्ता. 23अय्ते नना हीता कोत्तातुन बेंकते बारि वाटा हिल्लिन? नना मल्सि वातस्के नावा कोत्तां वड्डितोनि एत्कुंचि मन्नेन,’ इत्तोर. 24पजा दग्गेरा नित्तिसि मत्तोर्कुन इल्हा इत्तोर. ‘मिमेट ओनागटाल आ बंगारम बंडितुन एतट. एतसि पदि बंगारम बंडिं मत्तोनगा हीम्टु,’ इत्तोर. 25अस्के ओर, ‘अय्ते सामि, ओनगा पदि बंगारम कोत्तां मंता गदा,’ इंचि इत्तुर. 26नना मीक वेहंतन, बोनगा अय्ते पेनदा पोल्लेन तेल्पिचकुनना बुद्दि मंता, पेन ओन्क इंका हींता, गानि बोनगा पेनदा पोल्लेन तेल्पिचकुनना बुद्दि हिल्ले, ओनगा मत्ता बुद्दितुनगुडा पेन एतकुन्नार. 27गानि, ‘ईर राज्येम कियामन्नि,’ बोर पगातोर अय्ते इत्तुरो, ओर्कुन नावा मुन्ने तच्चि हव्कट, इंचि मालक इत्तोर,” इल्हा वेहचि येसु वेसुडितुन महतोर.
येसु सामि येरुसलेमते होळियंतोर
(मत्तयाल 21:1-11; मरकुस 11:1-11; योहान 12:12-19)
28इव पोल्लें वेहता पजा येसु लोकुल्कुना मुन्ने-मुन्ने येरुसलेमताहेके ताकसेके पेय्सतोर. 29होननेंके जय्तुन मराकुना गुट्टापोर्रो मनना बैतपागे आनि बेतानिया इनना नाह्कुना दग्गेरा एव्तोर. पजा येसु ओना इव्वुर सिस्युल्कुन केय्सि, 30ओर्क इल्हा वेह्चि नाटे लोहतोर. “मी मुन्ने दिस्सना नाटे होंट. मिमेट अद नाटे होळियतस्के बस्केने बोरे उद्दुवद उंदि गाडदि पोरि दोह्चि मत्तद मीकु दिसंता, दान लेहकुंचि इग्गे पीसि वटु. 31ओक्कला अदुन पीसि वायनेंके, ‘दीन बारि लेहचंतिर?’ इंचि बोरन्ना पूसकीते, ‘सामिंक दीना अव्सरम मंता’ इंचि वेहट,” इत्तोर. 32बोर्कुन अय्ते लोहमळ जर्गता, ओर नाटे होतस्के येसु वेहतापे ओर्क दिसता. 33पजा ओर गाडदि पोरिन लेहनेंके, दाना मालकुल्क हूळसि, “मिमेट गाडदि पोरिन बारि लेहसंतिर?” इंचि इत्तुर. 34अस्के ओर, “सामिंक दीना अव्सरम मंता,” इंचि इत्तुर.
35पजा गाडदि पोरिन येसुनगा तत्तुर. तच्चि ओरा कपडिं दानपोर्रो तारसि, येसुन दानपोर्रो उपिस्तुर. 36उद्दिसि होननेंके ओन्क कदर हियानाहाटीं लोकुल्क ओर केर्ता कपडिं तेंडसि हर्दे तारतुर. 37अल्हेने पजा ओर जय्तुन मराकुना गुट्टा पोर्रोटाल हिळु रेयनेंके ओना पज्जो वायाना ओना अंटोर सिस्युल्क ओर हूळता अद्बूतामाता कबाह्कुनहाटीं वेल्ले कुसिते जोर-जोरते पेनदुन इल्हा तल्सकुनालय दल्गतुर.
38“पेनदा अदिकारम पीसि वायाना राजाल वेल्लेन आसिर्वाद दोर्कतोर आंद.#बजन संहिता 118:26
पेनदाहेंदाल सांति वायि! पोर्रोटा पेद्दा पेनदा कदर आयि!”
इंचेके तल्सकुनालय दल्गतुर.
39अस्के मंदिताल इच्चुर परिसिल्क येसुनगा वासि, “गुरु! नीवा सिस्युल्कुन वरगेयमट इंचि गदरिच्चा,” इंचि इत्तुर. 40पजा येसु ओर्कुन, “नना मीक वेहंतन, ओक्कला ईरगिंटा चुपचाप मत्ते, इव बंडां वरगेयालय दल्गंतां,” इंचि इत्तोर.
येरुसलेमतुन हूळसि येसु अळंतोर
41पजा येरुसलेम सहरता दग्गेरा एव्तस्के, अद सहरतुन हूळसि येसु अळतोर. 42अळसेके, “सांति दोर्कना पोल्लें इय्याला मीकु तेळियसि मत्ते बेस आसि मनवळ, गानि इंदके अव पोल्लें मीवा कळ्कुंक दिस्सों. 43मीवा पगातोर सुट्टु आसि मीकुन नालुं मूलानाल तकलिप कियानुर, असोंटा वेला वायार. 44मीवा पेन मीकुन पिसागोटालय मिहगा वाता वेलातुन एरपाट किया हिल्लिर. अदुनहाटीं मीवा पगातोर मीकुन, मीवा पिलाल्कुन तोळिते कल्पानुर. पजा बंडां उंदानपोर्रो उंदि इर्सि दोहता गूरेतुन कूलाह्चि समानम कियानुर,” इत्तोर.
गुळिते अम्मानोर्कुन येसु गेदमंतोर
(मत्तयाल 21:12-17; मरकुस 11:15-19; योहान 2:13-16)
45पजा येसु गुळिते होळियतोर, होळियसि अगा अम्मानोर्कुन गेदमालय दल्गतोर. 46पजा येसु ओर्कुन इल्हा इत्तोर. “नावा लोतुन पारतना कियाना लोन इंतुर, इंचि दर्मसास्त्रमते रासि मंता.#यसायाह 56:7 गानि मिमेट दीन दोंगाल्क मक्कना जेगा कीतिर,” इत्तोर.#यिर्मयाह 7:11
47इल्हा येसु रोज गुळिते पेनदा पोल्लें करहुंदुर. गानि पेद्दा पेर्मालोर्क, दर्मसास्त्रम कराहना गुरुल्क, पेद्दा मनकालोर्क ओन हव्कालय हूळुंदुर. 48गानि अंटोर लोकुल्क वेल्ले कुसिते येसु वेहाना पोल्लें केंजुंदुर. अदुनहाटीं ओन बल्हा हव्कना ओर्क आटम आयाकोंदु.
Currently Selected:
लूकाल 19: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
