মার্ক 15

পীলাতনি মিকখাংও যীশু

1ফ্রিংও খামাল দাল·গিবারাং মি·আফারাংমুং, শাস্ত্র স্খিগিবারাংমুং আরো দাল·বাৎগিবা খ্রিমানি মান্দি গিম্মিকমুং খু·মংগ্রিকজক। উনি জা·মানো বিসং যীশুখো খায়ে রোমখো শাসন দাকগিবা পীলাতনি জাক্কো হন·জক। 2উনো পীলাত যীশুখো সিং·জক, ‘‘না·আ যিহূদীরাংনি রাজামা?’’

যীশু আগানচাকজক, ‘‘না·আ বিবিখোন আগানা।’’

3খামাল দাল·গিবারাং যীশুখো বাং·এন গ্রো নাংএতি খাৎথা আগানজক। 4উনি গিম্মিন পীলাত দা·আবা যীশুখো সিং·ফিলজক, ‘‘না·আ আগানচাকজানুয়ামা? নিবো, বিসং নাং·খো বাসিক গ্রো নাংএতজক।’’

5ইন্দিবা যীশু মামুংখোবা আগানচাকজাজক। উনি গিম্মিন পীলাত আইয়াও ইনমানজক।

6ওয়াতচাংআনি সালো মান্দিরাং যে বন্দিখো হাম·নুয়ামিং পীলাত বিখো ওয়াত্তেতনুয়ামিং। 7উনসালো বারা্ববা মিংগিবা সাকসা জেলো দংআমিং। বোবিল দাক্কে চাখাত্তানি সালো বিয়া চাখাতগিবারাংমুং দংফাএ স·ওতামিং। 8মান্দিরাং পীলাতচা রি·বাএ আগানজক, ‘‘না·আ ফাংনাজ্রিং জেখো দাকরংআ দা·আও উখোন দাকবো।’’

9পীলাত বিসংনা আগানজক, ‘‘আংআ যিহূদীরাংনি রাজাখো ওয়াত্তেতনা, না·সং ইখো হা·ম্মিংআমা?’’ 10খামাল দাল·গিবারাং মিকনেংএন যীশুখো পীলাতনি জাক্কো হন·জক পীলাত উখো হা·আইয়ামিং। 11ইন্দিবা যীশুখো দন্নে বারা্ববাখো ওয়াত্তেতখানা ইন্নে মান্দিরাংখো খামাল দাল·গিবারাং শলা হন·জক।

12পীলাত দা·আবা মান্দিরাংখো সিং·ফিলজক, ‘‘ইন্দাকোদে না·সং জেখো যিহূদীরাংনি রাজা ইন্না বিখো রা·এ আংআ মুয়া দাকনুয়া?’’

13মান্দিরাং উনো চ্রিকে আগানজক, ‘‘বিখো চিসলো দাৎখাপবো।’’

14পীলাত আগানজক, ‘‘মুয়ানা, বিয়া মুয়া নামগিজাখো দাকজক?’’

ইন্দিবা মান্দিরাং বাত্তেসা চ্রিকে আগান্না হা·বাচেংজক, ‘‘বিখো চিসলো দাৎখাপবো।’’

15উনো পীলাত মান্দিরাংখো খুসি দাকনা ইন্নে বারা্ববাখো ওয়াত্তেতজক, আরো যীশুখো চাবুকচা দক্কে চিসলো দাৎখাপনা গি·য়েৎজক।

সিপাইরাংনি খা·দিংস্থেকা

16জা·মানো সিপাইরাং যীশুখো দাল·বাৎগিবা শাসন দাকগিবানি নকনিং·আওনা রিম্মাংজক। বিসং উয়োনা গিপ্পিন সিপাইরাংখো রা·এ থম·দাকজক। 17বিসং যীশুখো গিৎচাকম্রাং বা·রাখো চিন্নেতজক, আরো বুসুনি মুকুটখো থারিয়ে বিনি স্খুও স্থিকেতজক। 18উনি জা·মানো বিসং যীশুখো ইনস্থেকনা হা·বাচেংজক, ‘‘যিহূদীরাংনি রাজা, বাং·এ থাংএ দংখানা!’’

19বিসং গি·সা গল·চা যীশুনি স্খুখো রাং·নিরাং দকনা হা·বাচেংজক আরো বিনি বে·এনো খু·চিদাপজক, আরো জা·স্খু দে·ম্মে বিখো দাকমিকে মান্দিরা·জক। 20ইন্দাকে বিখো খাল·স্থাপানি জা·মানো বিসং উয়া গিৎচাকম্রাং বা·রাখো অক্কে বিনি বা·রাথাংখো চিন্নেতজক আরো চিসলো দাৎখাপনা রা·আংজক।

চিসলনি সাক্কাও গিত্তেল যীশু

21উয়া সময়ও কুরীণী সংজিলমানি শিমোন মিংগিবা সাকসা মান্দি সংচানি রি·বাএ উয়া রামা গিত্তা রি·য়াংআমিং। বিয়া আলেকসান্দর আরো রূফনি ফাগিবামিং। সিপাইরাং বিখো যীশুনি চিসলখো রিপ্পিএ রা·আংনা রিম·জক। 22বিসং যীশুখো গল্‌গথা, ফি·স্খাওদে স্খু বিখ্রক মিংগিবা হা·দামওনা রিম্মাংজক, 23জা·মানো বিসং যীশুনা সিম্মিলা বিৎচিখো ব্রিনগিবা চু বিৎচিখো রিংনা হন·জক, ইন্দিবা বিয়া উখো রিংজাজক। 24উনি জা·মানো বিসং যীশুখো চিসলো দাৎখাপজক। সিপাইরাং যীশুনি বা·রারাংখো সুয়ালে রা·না ইন্নে বা·রারাংখো লটারি খা·ল্লে সা বাদাকাখো মান·জক ইখো হা·আইনা নিনা হাম·জক।

25ফ্রিংও স্খু বাজিও যীশুখো বিসং চিসলো দাৎখাপামিং। 26‘‘যিহূদীরাংনি রাজা’’ ইন্নে গ্রো নাংআনি খাৎথাখো বিসং যীশুনি সাক্কাও চকজক। 27বিসং সাকগ্মি ডাকাতখোবা যীশুমুং চিসলো দাৎখাপজক, জাক্রাচা সাকসা আরো জাক্কাসিচা সাকসাখো দাৎখাপজক। 28উনি গিম্মিন রংথালগিবা শাস্ত্রনি ইয়া খাৎথা চু·সকজক: ‘‘পাপীরাংমুং বিখো চানফাজক।’’

29আরো উয়া রামা গিত্তা রি·য়াংগিবারাং স্খু রকরেকে বিখো খাল·স্থাপে আগানজক, ‘‘আহা, না·আনা থরম নকখো ফি·এ দা·আবা সালগিত্থামোন উখো রিকফিলনা মান·গিবা! 30চিসলনি দা·আও হং·খাতবায়ে আন·থাংখো জক্কেৎবো!’’

31খামাল দাল·গিবারাং আরো শাস্ত্র স্খিগিবারাংবা যীশুখো খাল·স্থাপনা ইন্নে আন·থাংথাংও আগানগ্রিকজক, ‘‘বিয়া গিপ্পিনরাংখো জক্কেৎনুয়ামিং, আন·থাংখোদে জক্কেৎনা মান·জা। 32হাইওয়া খ্রীষ্ট, ইস্রায়েলরাংনি রাজা! চিসলোনি বিয়া হং·খাতবাখানা জেদাক্কে আনচিং বিখো বিবিরা·না মা·ন্না।’’

যীশুমুং চিসলো দাৎখাপা মান·গিবারাংবা বিখো ইনস্থেকজক।

গিত্তেল যীশুনি সিয়া

33জা·মানো সালজাৎচিও চি·গ্মি বাজিওনি গিত্থাম বাজিওনা দিপ্পাৎ হা·সং গিম্মিক আন্দালে দংজক। 34গিত্থাম বাজিও যীশু রাক্কে চ্রিকে আগানজক, ‘‘এলোই, এলোই, লামা শবক্তানী,’’ জেখো ফি·স্খাওদে ‘‘আংনি ইসল, আংনি ইসল, মুয়ানা না·আ আংখো ওয়াতগালজক?’’

35সেফাংও চাদেংএ দংগিবারাংওনি মিত্তামরাং ইখো খিন্নাএ আগানজক, ‘‘খিন্নাবো, খিন্নাবো, বিয়া এলিয়খো রিক্কামিংআ।’’

36উনো মান্দি সাকসা খাত্তাংএ মেসেং বিৎচিও সপন্‌জ গি·সাখো সিম·জক আরো উখো গি·সা গ·ল্লারেংনি স্খুও সিকসেপে যীশুনা রিংনা হন·জক।

বিয়া আগানজক, ‘‘নিনা দা·আও এলিয় বিখো হং·খাতেতনা রি·বামা রি·বাজা।’’

37উনি জা·মানো যীশু রাক্কে চ্রিকে জাংগি গালজক। 38উনোন থরম নকনি দিমফেংগিবা পর্দা চিৎগ্মি দাক্কে সাক্কাওনি খা·মাওনা দিপ্পাৎ দ্রাকারিজক। 39যীশুনি মিকখাংও চাদেংএ দংগিবা সিপাই দাল·গিবা যীশুনি ইন্দাকে সিয়াখো নিক্কে আগানজক, ‘‘বিবিন বিয়া ইসলনি দেফান্থি হং·আমিং।’’

40মিচিক মিত্তামরাং চে·ল্লাও চাদেংএ ইরাংখো নিএ দংআমিং। বিসংনি গিসেপো মগ্‌্‌্‌দলীনী মরিয়ম, চনগিবা যাকোব আরো যোষেফনি মা·গিবা মরিয়ম আরো শালোমী দংআমিং। 41যীশুনি গালীলও দংমিত্তিংও ইয়া মিচিকরাং যীশুমুং দিমদাক হা·দকচা রি·য়াংফানুয়ামিং আরো বিনা দাকচাকে হ·ন্নুয়ামিং। আরো যীশুমুং যিরূশালেমো রি·বাগিবা বাং·বিয়া মিচিকরাংবা উয়োনা দংআমিং।

গিত্তেল যীশুখো গপ্পা

42উয়া সাল থারিয়ানি সাল হং·আমিং আগানস্খাওদে নেং·থাকানি সালনি স্খাংগিবা সালমিং। 43উনসালো হান·থামাংওন অরিমাথিয়া সংনি যোষেফ পীলাতচা রি·য়াংএ খেনমানগিজা যীশুনি বে·এনখো হাম·জক। বিয়া দাল·বাৎগিবা খ্রিমানি মান্দিরা·খো মান·গিবা সাকসামিং আরো বিয়া আন·থাংবা ইসলনি সংনকনা নিচাকসোয়ে দংআমিং। 44যীশু থেংরিন সিজক ইখো খিন্নাএ পীলাত আইয়াও ইনমানজক। বিবিন যীশু সিয়ামা সিখুজা ইখো হা·আইনা বিয়া সিপাইরাংনি দাল·গিবাখো রিংগামে সিং·জক। 45বিবিন বিয়া সিজক ইন্নে সিপাইরাংনি দাল·গিবাচানিখো হা·আইনা মা·ন্নে পীলাত বে·এনখো যোষেফনা হন·জক। 46যোষেফ রি·য়াংএ বা·রা ফাৎসা ব্রিএ রা·বাজক আরো যীশুনি মাংগিসিখো খা·মাও অন্নে উয়া বা·রাচা বিল·রিরিমে দনজক, আরো রং·থিখো খিত্তে থারিগিবা গোপরামও উয়া বে·এনখো দনজক। জা·মানো বিয়া গোপরামনি মিকখাংও রং·থি গি·সাখো রমথম্মে দনফেংজক। 47যীশুনি মাংগিসিখো বানো দনজক উখো মগ্‌্‌্‌দলীনী মরিয়ম আরো যোষেফনি মা·গিবা মরিয়ম নিকজক।

Currently Selected:

মার্ক 15: GLNT

Highlight

Copy