মথি 7
7
গ্রো রি·ম্মানি বিদিংও স্খিয়া
1“না·সং দা·আ গিপ্পিনরাংনি গ্রোখো রি·ম্মাবো জেদাক্কে না·সংনি গ্রোখোবা রি·ম্মা হং·জা, 2মুয়ানা জেদাক্কে না·সং গিপ্পিনরাংনি গ্রোখো রি·ম্মা, উয়ানদাক্কে না·সংনি গ্রোখোবা রিম·নুয়া, আরো জেদাক্কে না·সং থয়ে হ·ন্না উয়ানদাক্কেন না·সংখোবা থনুয়া।
3“নাং·নি জংআদানি মিক্রোনও দংগিবা বিসেমসেমখোন নিক্কিংআ, ইন্দিবা আন·থাংনি মিক্রোনও দংগিবা বলথংখো মুয়ানা নিকজাংআ? 4আন·থাংনি মিক্রোনোন বলথং দংওদে বাদিকে নাং·নি জংআদাখো ইন্দাকে আগানজক, ‘রি·বাবো, নাং·নি মিক্রোননি বিগিনচিখো ওত্তে গাল্লেতনা? বু·এ চা·গিবা! 5স্খাং নাং·নি মিক্রোননিখো বলথংখো ওত্তে গালবো, উনোদে নাং·নি জংআদানি মিক্রোননিখো বিগিনচিখো গালনা না·আ নিকসেংনুয়া।
6“জেআন রংথালা উখো আচাকনা দা·আ হ·ন্না। না·সংনি মুক্তাখো ওয়াকনি মিকখাংও দা·আ গাল্লাবো। মুয়ানা উরাং আন·থাংনি জা·চকচা উরাংখো গা·ফিন্নেকনা আরো না·সংখো চিকফিলনাবা দংআ।
বি·আনি গিম্মিনো খু·রাচাক্কা
7“বি·বো, উনোন না·সংনা হ·ন্নুয়া; সান্দিবো, উনোন না·সং নিকনুয়া; দ·গাও দকথাকবো, উনোন না·সংনা এংএ হ·ন্নুয়া। 8বি·গিবা মা·ন্না; সান্দিগিবা নিক্কা; আরো দ·গাও দকথাকগিবানা দ·গা এংএ হ·ন্না। 9না·সংনি গিসেপো আন·থাংনি দেফান্থি রুটিখো হা·ম্মোদে বিনা রং·থিখো হ·ন্না, ইন্দাকগিবা মান্দি দংআমা? 10বা না·থকখো হা·ম্মোদে চিপ্পুখো হন·গিবা সা দংআ? 11না·সং নামগিজা হং·এবা আন·থাংনি দেদ্রাংনা নাম্মাখো হ·ন্না হা·আইওদে, ইন্দাকোদে সালগিও দংগিবা না·সংনি ফাচা জেরাং বি·আ বিসংনা বিয়া নাম্মাখোন হ·ন্নুয়া, ইয়াদে খাকখেতান! 12গিপ্পিন মান্দিরাংচানিখো নাম্মা বেওয়ালখো মা·ন্না হা·ম্মোদে না·সংবা বিসংমুং উয়ানদাক্কে দাকবো। ইয়ান মোশিনি নিয়াম আরো আগানসোগিবারাংনি স্খিয়ানি মিংসংগিবা খাৎথা।
আপচনা আরো আপদালা দ·গাচল
13“আপচনগিবা দ·গাচল গিত্তা নাপবো, মুয়ানা নামগিজাচানা রা·আংগিবা রামানি দ·গা দা·ল্লা আরো উনি রামাবা আপদালা। উগিত্তা বাং·আ মান্দিরাংআন নাপ্পা। 14ইন্দিবা জাংগিচানা রা·আংগিবা দ·গা আপচনা, উনি রামাবা আপচনা। উখো বাং·গিজা মান্দিরাংআন সান্দিয়ে মা·ন্না।
বু·এ চা·গিবা আগানসোগিবারাংখো হা·আইয়ানি চল
15“বু·এ চা·গিবা আগানসোগিবারাংনা সিমসাকবো। বিসং মেষনি বিমাংখো রা·এ না·সংচা রি·বাআ, ইন্দিবা নিং·আচাদে বিসং চা·মিন্নকগিবা মাৎচা গিত্তা দাক্কা। 16বিসংনি জাংগিনি বিথিচান না·সং বিসংখো হা·আইনা মা·ন্নুয়া। বুসু চাগিপাও আঙ্গুর বিথি বা শিয়ালকাঁটাও ডুমুর বিথি নাংআমা? 17উয়ানদাক্কেন গিম্মিক নামগিবা বিফাংও নামগিবা বিথিন নাংআ আরো নামগিজাগিবা বিফাংও নামগিজাগিবা বিথিন নাংআ। 18নামগিবা বিফাংও নামগিজা বিথি আরো নামগিজা বিফাংও নামগিবা বিথি নাংনা মান·জাসা। 19নামগিবা বিথি নাংগিজাগিবা বিফাংখো দে·ন্নে ওয়া·আলো গাল্লানি হং·আ। 20উনি গান্দা আগানিংআ, বু·এ চা·গিবা আগানসোগিবারাংনি জাংগিনি বিথিখো নিক্কে না·সং বিসংখো হা·আইনা মা·ন্নুয়া।
সালগিনি সংনকো সা নাপনা মা·ন্নুয়া?
21“আংখো ‘গিত্তেল, গিত্তেল’ ইনগিবা গিম্মিকান সালগিনি সংনকো নাপনা মা·ন্নুয়া ইন্দাকে হং·জা, ইন্দিবা সালগিও দংগিবা আংনি ফানি নামনিকাখো দাকগিবাসা নাপনা মা·ন্নুয়া। 22উনসালো বাং·আ মান্দিআন আংখো ইন্নুয়া, ‘গিত্তেল, গিত্তেল, চিংআ নাং·নি বিমুংচা আগানসোগিবা গিত্তা খাৎথা আগানজামিংমা? নাং·নি বিমুংচা গিসিক নামগিজাগিবারাংখো হা·রিকজামিংমা? নাং·নি বিমুংচা আইয়াও ইনমানগিবা কামরাংখো বাং·এন দাকজামিংমা?’ 23উনসালো আংআ বিসংখো আগান্নুয়া, ‘আংআ না·সংখো হা·আইজা। নামগিজাখো দাকগিবারাং! আংনি মিকখাংওনি না·সং রি·য়াংবো।’
রকমগ্মি মান্দি
24“উনি গান্দা আগানিংআ, আংনি ইয়া খাৎথারাংখো খিন্নাএ উরাংখো মানিগিবাদে রং·থিনি সাক্কাও নক রিকগিবা বুদ্ধিগ্মাং সাকসা মান্দি গিত্তা দাক্কা। 25জা·মানো মিকখা ওয়াজক, চিরাং দাল·বাজক, বালওয়া রাকজক আরো উয়া নক্কো নাংজক ইন্দিবা উয়া নক গা·আকজাজক মুয়ানা উখো রং·থি সাক্কাও রিক্কামিং। 26আংনি ইয়া খাৎথারাংখো খিন্নাএ উরাংখো মানিজাগিবাদে হান·চেংনি সাক্কাও রিকগিবা সাকসা জাদা মান্দি গিত্তা দাক্কা। 27জা·মানো মিকখা ওয়াজক, চিরাং দালবাজক, বালওয়া রাকজক আরো উয়া নক্কো নাংজক; উনোন উয়া নকবা গা·আকজক। নাম্মেদাক্কেন গা·আকাংজক!”
28যীশুনি খাৎথা আগানা বন·খামও মান্দিরাং বিনি স্খিয়ানা আইয়াও ইনমানজক, 29মুয়ানা বিয়া থরম স্খিগিবারাং গিত্তা স্খিগিজা ইন্দিবা বিল দংগিবা গিত্তা বিসংনা স্খিজক।
Currently Selected:
মথি 7: GLNT
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
This translation was published by The Bangladesh Bible Society in 2004 © BBS 2004.