লূক 2

গিত্তেল যীশু খ্রীষ্টনি আৎচিয়া

1উয়া সময়ও সম্রাট আগস্ত কৈসর আন·থাংনি সং-নকনি দিমদাক মান্দিরাংখো বিমুং চকনা গি·য়েৎজক। 2সিরিয়াখো শাসন দাকগিবা কুরীণিয়নি সময়ও মান্দি চান্না ইন্নে ইয়ান স্খাংগিবা বিমুং চক্কানি হং·আমিং। 3বিমুং চকনা ইন্নে দিমদাকান আন·থাংথাংনি সংচানা রি·য়াংথকনা হা·বাচেংজক।

4-6যোষেফ রাজা দায়ূদনি মা·চংনি মান্দিমিং। রাজা দায়ূদ যিহূদিয়া হা·দকনি বৈৎলেহম সংও আৎচিয়ামিং। উনি গিম্মিন যোষেফ বিমুং চকনা ইন্নে গালীল হা·দকনি নাসরত সংওনি বৈৎলেহম সংওনা রি·য়াংজক। মরিয়মবা বিমুং উয়োনা রি·য়াংফাজক। বিমুংআন যোষেফনি খিম্মানি খাৎথা থিক হং·আমিং। উনসালো মরিয়ম হা·ন্নোগ্মাংমিং আরো বৈৎলেহমও দংমিত্তিংওন বিনি বি·সা বা·আনি সাল সকজক। 7উয়োন বিনি দেজাক্রা দেফান্থি আৎচিজক, আরো বিয়া দেফান্থিখো বা·রাচা বিল·রিমরিমে চারিও থুয়েতজক, মুয়ানা বিসংনা দংচাকেনা হা·দাম চাকজামিং।

সা·গ্রে আরো মেষখো নিরিকগিবারাং

8বৈৎলেহমনি সেফাংও নিরিকগিবারাং হা·বাও দংএ ওয়াল্লো বিসংনি মেষরাংখো নিথিমিংআমিং। 9উনোন রাং·গিত্তিক গিত্তেলনি সা·গ্রে সাকসা বিসংনি মিকখাংও রি·বাজক। উনো গিত্তেলনি রাসংখো বিসংনি সামব্রিও থেং·সুএ নিকজক। উনি গিম্মিন নিরিকগিবারাং নাম্মেন খেনবিজক।

10সা·গ্রে বিসংনা আগানজক, “দা·আ খেন্নাবো, মুয়ানা আংআ না·সংনা নাম্মেন খুসি হং·আনি খাৎথাখো রা·বাজক। ইয়া খুসি দিমদাক মান্দিনান হং·আ। 11দা·আল দায়ূদনি সংও না·সংখো জক্কেৎগিবা আৎচিজক। বিয়ান খ্রীষ্ট, বিয়ান গিত্তেল। 12ইয়া খাৎথা বিবি হং·আমা ইখো হা·আইনানি না·সংনা ইনি চিন হং·জক- না·সং বা·রাচা বিল·রিমরিমে চারিও থুয়েতি দনগিবা সাকসা বি·সাখো নিকনুয়া।”

13উনোন রাং·গিত্তিক উয়া সা·গ্রেমুং বাং·আ সা·গ্রেরাংখো উনো নিকনা মান·জক। বিসং ইসলখো মিৎথেলে আগান্না হা·বাচেংজক,

14“সালগিও ইসলনি রাসং হং·খানা,

হা·গিলসাকও জেরাংখো বিয়া নামনিকবিয়া

বিসংনি থম·থম হং·খানা।”

15সা·গ্রেরাং বিসংওনি সালগিওনা রি·য়াংআনি জা·মানো নিরিকগিবারাং সাকসা সাকগিপ্পিননা আগানজক, “রি·বো, আনচিং বৈৎলেহমচা রি·য়াংনা আরো গিত্তেল আনচিংনা জেখো আগানামিং উখো রি·য়াংএ নিনা।”

16বিসং গং·রাকে রি·য়াংএ মরিয়ম, যোষেফ আরো চারিও থুয়েতগিবা উয়া বি·সাখো সান্দিয়ে নিকনা মান·জক। 17বি·সাখো নিক্কানি জা·মানো উয়া বি·সানি গিম্মিন বিসংনা আগানগিবাখো বিসং আগানজক। 18নিরিকগিবারাংনি খাৎথাখো খিন্নাএ দিমদাকান আইয়াও ইনমানজক; 19ইন্দিবা মরিয়ম দিমদাকখো গিসিকথাংও রা·চিপে দনজক, দারাংনাবা আগানজাজক; আরো উরাংনি বিদিংও বিয়া চানচিয়ে দংজক। 20সা·গ্রেরাং রাক্ষুয়ালরাংনা জেদাক্কে আগানামিং উয়ানদাক্কেন দিমদাকখো নিক্কে আরো খিন্নাএ বিসং ইসলখো মিৎথেলে আরো রাসং চাএতে ফি·ল্লাংজক।

21যিহূদীরাংনি দাকবেওয়াল গিত্তা বি·সাখো বিগিল রাতনা আৎচিয়ানি সাল চেত চু·সকানি জা·মানো উনি বিমুংখো যীশু মিংজক। মা·নি অক্কো খে·না স্খাং সা·গ্রে বিনা ইয়া বিমুংখোন হ·ন্নামিং।

থরম নক্কো বি·সা যীশু

22জা·মানো মোশিনি নিয়াম গিত্তা বিসংনি রংথালানি সাল চু·সকজক। উনোন যোষেফ আরো মরিয়ম যীশুখো গিত্তেলনি মিকখাংচা রা·আংনা যিরূশালেম সংজিলমাচানা রিম্মাংজক, 23মুয়ানা গিত্তেলনি নিয়ামও চক্কা দংআ, “স্খাং আৎচিগিবা দিমদাক মি·আসা বি·সাখো গিত্তেলনি ইন্নে চান্নুয়া।” 24ইনাআগ্রে গিত্তেলনি নিয়ামও জেদাক্কে “দো·খ্রু জোরাসা বা কইতর বি·সা মাংগ্মিখো” বলি হ·ন্না চক্কা দংআ উয়ানদাক্কেন বিসং উরাংখো বলি হ·ন্না রি·য়াংজক।

25-26উনসালো যিরূশালেমো শিমিয়োন মিংগিবা সাকসা থরমি আরো ইসলখো অলাখিগিবা মান্দি দংআমিং। ইসল বাসোকো ইস্রায়েলরাংনি দুকখো হা·রিকনুয়া উনি গিম্মিন বিয়া নিচাকসোংআমিং। গিসিক রংথালগিবা বিনি সাক্কাও দংআমিং আরো সিনা স্খাং বিয়া গিত্তেলনি উয়া খ্রীষ্টখো নিকনা মা·ন্নুয়া ইন্নে বিনা ফারাকামিং।

27উনসালো শিমিয়োন গিসিক রংথালগিবাচা যিহূদীরাংনি থরম নক্কো রি·বাজক। মোশিনি নিয়াম গিত্তা জেখো দাকনা নাংআ উখো দাকনা ইন্নে যীশুনি মা·গিবা ফাগিবা বি·সা যীশুখো রা·এ উয়োনা রি·বাজক। 28উনোন শিমিয়োন বিখো গিপ্পাকজক আরো ইসলখো রাসং চাএতে আগানজক,

29“গিত্তেল, না·আ নাং·নি আগানা গিত্তা নকখলথাংখো

দা·আও থম·থমে ওয়াত্তেতিংজক,

30-31মুয়ানা মান্দিখো পাপওনি জক্কেৎনা ইন্নে

দিমদাক মান্দিনি মিক্রোনরাংও

না·আ জেখো দাকসোজক,

আংআ উখো নিকনা মান·জক।

32গিপ্পিন জাতরাংনা ইয়াদে রামা ফিন্নিকানি সেং·আ হং·আ,

আরো নাং·নি ইস্রায়েল জাতরাংনা

ইয়াদে রাসংনি হং·আ।”

33বি·সানি গিম্মিন শিমিয়োন জেখো আগানজক উনা বি·সানি মা·গিবা ফাগিবা আইয়াও ইনমানজক। 34উনি জা·মানো শিমিয়োন বিসংনা ফাত্তিজক আরো যীশুনি মা·গিবা মরিয়মনা আগানজক, “ইসল ইখোন বাচ্ছিজক, ইয়া বি·সানি গিম্মিন ইস্রায়েলনি গিসেপো বাং·আন গা·আকনুয়া, দা·আবা বাং·আন জক্কাখো মা·ন্নুয়া। বিয়া ইন্দাকগিবা গি·সা চিন গিত্তা হং·নুয়া জেনি সাক্কাও বাং·এন খাৎথা আগান্নুয়া, 35আরো উনি গিম্মিন বিসংনি গিসিকনি চানচিয়ারাং ফারাকনুয়া। আরো মি·ল্লামচা সু·য়া গিত্তা দুক নাং·নি খা·থংখো সু·নুয়া।”

36-37উয়া সময়ও হান্না মিংআ সাকসা মিচিক আগানসোগিবা দংআমিং। বিয়া আশের মা·চংনি পনূয়েলনি দেমিচিক। বিয়া নাম্মেন বুৎচুমা হং·বিজকমিং। বিলসি স্নিনা দিপ্পাৎ সেগিবামুং দংআনি জা·মানো বিলসি সৎচেতব্রিওনা দিপ্পাৎ বিয়া রান্দি হং·এ দংআমিং। থরম নকখো ওয়াত্তে বিয়া মামুংচান রি·য়াংজানুয়ামিং বাত্তেসা অকগুমিন দংএ আরো বি·এ ওয়াল সাল ইসলখো অলাখিনুয়ামিং। 38বিয়াবা উয়া সময়ও মিকখাংচানা রি·বাএ ইসলখো মিৎথেলজক, আরো ইসল যিরূশালেমখো জক্কেতনুয়া ইন্নে জেরাং নিচাকসোংআমিং বিসংনা উয়া বি·সানি খাৎথাখো আগান্না হা·বাচেংজক।

39গিত্তেলনি নিয়াম গিত্তা দিমদাক কামখো ব·ন্নেতি মরিয়ম আরো যোষেফ গালীলনি নাসরত সংথাংচানা রি·য়াংফিলজক। 40বি·সা যীশু দাল·রোরোএ বিল্লাকবানা আরো হা·আইয়াও চু·সকনা হা·বাচেংজক। বিনি সাক্কাও ইসলনি ফাত্তিয়া দংআমিং।

বিলসি চি·গ্মিনি যীশু থরম নক্কো

41ওয়াতচাংআনি সালো যীশুনি মা·গিবা ফাগিবা বিলসি রিক্ষিত যিরূশালেমচানা রি·য়াংনুয়ামিং। 42যীশুনি বিলসি চি·গ্মি হং·ও দাকবেওয়াল গিত্তান বিসং উয়া পর্বচানা রি·য়াংজক। 43পর্বনি বন·খামও বিসংনি নকথাংচা ফি·ল্লাংমিত্তিংও যীশু যিরূশালেমোন দংরিকজক। ইন্দিবা বিনি মা·গিবা ফাগিবা উখো হা·আইজামিং। 44বিসংমুং রি·ফাগিবা মান্দিরাংমুং বিয়া দংআ ইখো চানচিয়ে বিসং সালসানি রামাখো রি·য়াংজক। জা·মানো বিসং বিসংনি চাচ্চি আরো হা·আইগিবা মান্দিরাংনি গিসেপো যীশুখো সান্দিনা হা·বাচেংজক। 45ইন্দিবা সান্দিয়ে মান·জাএ বিখো সান্দিনা রি·য়াংএ বিসং দা·আবা যিরূশালেমচানা ফি·ল্লাংজক।

46জা·মানো সালগিত্থামনি জা·মানো বিসং বিখো থরম নক্কো মান·জক। বিয়া স্খিগিবারাংনি জাংচিও আসংএ বিসংনি খাৎথাখো খিন্নাংআমিং আরো বিসংখো সিং·আমিং। 47যীশুনি খাৎথাখো খিন্নাগিবারাং দিমদাকান বিনি বুদ্ধিখো নিক্কে আরো বিনি আগানচাক্কাখো খিন্নাএ আইয়াও ইনমানথকজক। 48বিনি মা·গিবা ফাগিবা বিখো নিক্কে আইয়াও ইনমানজক। বিনি মা·গিবা বিনা আগানজক, “আংদে, না·আ মুয়ানা চিংমুং ইন্দাকে দাকজক? নাং·ফা আরো আংআ বাসকিন খাসুয়াংমিকসুয়াং দাক্কে নাং·খো সান্দিংআমিং।”

49যীশু বিসংনা আগানজক, “না·সং মুয়ানা আংখো সান্দিংআ? আংনি ফানি নক্কো আংনি দংনা নাংনুয়া না·সং ইখো হা·আইজামিংমা?” 50যীশুনি আগানাখো বিনি মা·গিবা ফাগিবা হা·আইজাজক।

51উনি জা·মানো বিয়া বিসংমুং নাসরতচানা ফি·ল্লাংজক আরো বিসংনা বাম্মে দংজক। বিনি মা·গিবা ইয়ারাংখো গিসিকো রা·চিপে দনজক। 52যীশু হা·আইয়ানিও, বিলসিও আরো ইসল আরো মান্দিনি খা·সাআও দাল·রোরোবাজক।

Currently Selected:

লূক 2: GLNT

Highlight

Copy