Dibandu 48

Jacob ugabila egabili baana bababaala baJoseph miula

1Mambu meni manovioga, batu bamayetsingula Joseph rie: Taji agu ubela ebeli. Amawenda na baana bandi bababaala babeji Manasse na Efraim. 2Batu bamalubusa Jacob rie: Muana agu Joseph uruga eruyi. Jacob amakewarisa na amatsana va tangi andi. 3Jacob amatsingula Joseph rie: Nsambi aguvu na mangolu motsu amalabana nami o Louz o bulongu buCanaan na amakabila miula. 4Amansingula rie: Nyugufunisa te na guba dilongu, nyuvega bulongu buebubu ombu bategula bagu yiri buba buogu te na mutubu.

5Meʼ rie: Baana bagu bababaala babeji aba gumaburila o bulongu buEgypte nesi menu ngaatola ombu gagu o Egypte, boba abami: Efraim na Manasse boba abami dedi mosi na Ruben na Simeon. 6Tumba baana aba gubuesa ubura boba bandeʼ beni; bobialila disiala dibaana bataji bogu. 7Ava nyimaruyila o Mesopotamie, nguji agu Rachel amamfuila mu nsila o bulongu buCanaan ava tumatolila bebeli na Efrata; avana nyimamutsiyila mu nsila Efrata, diwendi rie: mu nsila jiBethleem.

8Jacob anogengila baana baJoseph, amawivula rie: Ababa banyi? 9Joseph amawagula taji andi rie: Abana baana bami bababaala aba Nsambi amayipega.

Jacob amavosa rie: Kokolu babambisini nami yiri nyubagabila miula.

10Jacob amaba na budunga bubununu; asamarungula umuelaba na buranga. Joseph amabambasana baana bandi bababaala nandi; Jacob amababumba na amabagabila miula. 11Mbana Jacob amatsingula Joseph rie: Ngaatasanga umuegulaba, tumba laba Nsambi amandasa nesi baana bagu.

12Joseph amabagusula va tulu taji andi na amagudama va tsi va gusu andi. 13Mbana Joseph amababonga jogu botsu babeji, Efraim o dikaka diandi dimabaala, diwendi rie: o magetu maJacob, na Manasse o dikaka diandi dimagetu, diwendi rie: o mabaala maJacob, amababambasana nandi. 14Jacob amasamba dikaka diandi dimagetu va julu muru uManasse: amabindasana miogu ava amabasakiyila mionyi mu mbari Manasse amaba tsomi.

15Amagabila Joseph miula na amavosa rie:

Nsambi agumawendisa bataji bami, diwendi rie: Abraham na Isaac,

Nsambi agumakwendisa ubanda na duburu duami te na namunyi,

16yiansa ayimakwaka kalala mu purulu tsiotsu

agabili baana bebaba miula!

Bonengulungu na diina diami na dibataji bami, Abraham na Isaac

na bafuni tindi ufuna mu bulongu!

17Joseph amalaba tindi ubiva mu mbari taji andi amasakiga dikaka diandi dimabaala va julu muru uEfraim; amagaanga dikaka ditaji andi, amaronda udigusula va julu muru uEfraim nodivinsa va julu muru uManasse. 18Joseph amatsingula taji andi rie: Tsiri nana tata, mu mbari agugu la tsomi; sakiga dikaka diagu dimabaala va julu muru andi.

19Taji andi amabusa na amavosa rie: Nyidijabi muana ami, nyidijabi; jaʼ wandi oba muneni; jaʼ wandi ofunanga te na bate-gula bandi boba dilongu, tumba ngebi andi omuviolila buneni; jandi na bategula bandi bofunanga te na boba malongu mapuela.

20Muna yilumbu yieni amabagabila miula na amavosa rie: O gusu baIsrael bosalisa miina menu ava bogabila batu miula; bovosa rie: Nsambi aguvayili nana amavayila Efraim na Manasse!

Anana amaveyila buvunda buManasse ombu Efraim. 21Jacob amatsingula Joseph rie: Yika ufu nyifu! Tumba Nsambi oba nenu na odugabusa o bulongu bubataji benu. 22Va julu adi nyiduveyi, jenu na baana bataji bagu, nyigubuesi Sichem dikabu adi nyimadilila na dijenga na pita ombu bisi Amor.

Currently Selected:

Dibandu 48: PUU1992

Highlight

Copy