Dibandu 37

JOSEPH

Mandosi maJoseph

1Jacob amatsananga o bulongu buCanaan o yiari ayi taji andi amatsaninanga. 2Ayiyi la yilombi yibaana bababaala baJacob. Ava Joseph amabila yigumi na yisambuali yibilima amakelisanga bindombu na binsabi na amalinganga va mosi na baana bataji bandi abamaburu na Bila na Zilpa bagatsi bataji andi. Joseph amayededanga matamba ombu taji ogu. 3Jacob amarondanga Joseph uviolila baana bandi botsu basusu bababaala mu mbari amamuburila va bununu buandi na amamurariyila yijungi ayimaba tindi yiboti. 4Baana bataji bandi bamalaba yiri taji ogu amamurondanga uviolila jogu botsu, mu dionyi bamamuvinina, posulu tsiogu tsimaba yika minyangila na minyangila.

5Mukolu mosi Joseph amadora ndosi aji amawalulila baana bataji bandi ajimabarombisa umuvina uviolila. 6Amabatsingula rie: Kokolu tsienu guluanu ndosi aji nsidora! 7Tutsitunga mifuna mikunsa o musiru; mufuna ami ubetsi urelama na mifuna mienu amibetsi yiari na yiari mitsigudama va gusu uonyi. 8Baana bataji bandi bamamuwivula rie: Ndeʼ guba kaga uturumanga? Kabogu bamaviolila umuvina mu diambu dindosi tsiandi na nana amatsiwalulilanga.

9Amamuedora ndosi jisusu, na amajiwalulila baana bataji bandi. Amavosa rie: Nsimuedora ndosi! Nsilaba wisi na tsungi na yigumi na mbuelili mosi bitsigudama va gusu ami.

10Amajiwalulila taji andi dedi mosi nana amalejiwalulila baana bataji bandi. Taji andi amamunyangila na amamuwivula rie: Divindugulu dindosi aji gutsidora yi? Guitasi yiri jetu na nguji agu na baana bataji bagu tugudama va gusu agu?

11Jionyi jimapindisa baana bataji bandi mirima, tumba taji andi amajitasanga.

Joseph amasumbusu na baana bataji bandi

12Temu mosi baana bataji baJoseph bamawenda o Sichem uyenakelisanga bindombu na binsabi bitaji ogu, 13yilumbu yimosi Jacob amawivula Joseph rie: Baana bataji bagu tsia o Sichem bekelisili migamba? Ruga, nyigusindiyi ombu gogu. Amagabusila rie: Nyuwenda! 14Jacob amamuruma rie: Weʼ yelaba pa baana bataji bagu baji buranga na pa migamba mivu buranga, kabogu Joseph amawenda o Sichem. 15Mutu amabenguna nandi ava amayenatsiemuyilanga o musiru. Jandi amawivula Joseph rie: Anyi guirombi? 16Joseph amamugabusila rie: Baana bataji bami nyirombi. Gumabalaba? Gurungula undonsa agu bekelisili migamba miogu? 17Dibaala dieni amavosa rie: Bamagusuga vava; nsigulu batsivosanga rie: Tʼwendianu o Dotan. Joseph amaduka baana bataji bandi na amabarasuna o Dotan. 18Baana bataji bandi banomulabilila bamatunga fundu umubokila. 19Bamavosa rie: Labanu mudoritsi umandosi uruga eruyi. 20Ruganu tumubokianu na tumubuayianu o yiduna ayimaleba mamba: tuvosa yiri yibulu yibukanyi yimamuji na tulabanu disukusulu dimandosi mandi.

21Ruben anogulu posulu tsiogu amabusa na amavosa rie: Tuyamubokanu!

22Ruben amabagandisa rie: Duyadekisa malungu; mubuayianu o yiduna ayimaleba mamba ayivu o kumu, ayaboku nenu.

Amaba na tindi ditasa ubapatula Joseph nomugabusa ombu taji andi.

23Joseph amatola ombu baana bataji bandi, bamamuvula yijungi yiandi, yijungi ayimaba tindi yiboti. 24Bamamugaanga na bamamubuaga o yiduna ayimaleba mamba ayimakamuga: yisamaba na mamba. 25Mbana bamatsana uji, banobuaga misu bamalabilila yinombu yibaIsmael abamarugasana o Galaad; basamo bogu bamaba na mifuna mibima bimbunga jiboti jiminongu na minongu abi bamasuvanga o Egypte. 26Kabogu Juda amawivula baana bataji bandi rie: Ubueji uka pa tuboka muana taji etu nosuega dufu duandi? 27Tumusumbisianu ombu baIsmael ayaboku netu; avu tindi muana taji etu.

Baana bataji bamadisinga. 28Ava batiyitsi bamuteti babisi Madian bamavioyila, baana bataji baJoseph bamamupalisa o yiduna ayimaleba mamba bamamusumbisa ombu baIsmael na dufunu dumagumabeji mambongu. Batiyitsi bamuteti bamayenamubega o Egypte. 29Ruben amagabuga o yiduna ayimaleba mamba; amalaba yiri Joseph asaa o yiduna. Amapasa biduaru biandi, 30amagabuga ombu baana bataji bandi na amavosa rie: Joseph asaa o yiduna ayimaleba mamba! Je meʼ aguʼ nyuwendasana.

31Kabogu bamabonga yijungi yiJoseph ayimaba tindi yiboti; bamaboka mulumi yinsabi, bamagolasana yijungi yieni malungu. 32Bamatinda yijungi ayimaba tindi yiboti ombu taji ogu na bamatinda yilumbi rie: Labati adi tumalaba! Gengilati, je ayina yijungi yimuana agu? 33Jacob amayijaba na amagamuga rie: Ayina yivu yijungi yimuana ami! Yibulu yibukanyi yimamuji! Joseph aka misiali misiali!

34Amapasa biduaru biandi na amaduara siela, amakota o bukuili uyenalilanga. 35Baana bandi botsu bababaala na babagetu bamayemubembiga tumba asamagaru. Amavosanga rie: Ngopala o bukuili te na tulaba na na muana ami o mbura jiabafu! Amalilanga muana andi.

36Bisi Madian bamayesumbisa Joseph o Egypte ombu Potifar agumaba yivunda yibagora baPharaon.

Currently Selected:

Dibandu 37: PUU1992

Highlight

Copy