Dibandu 35
35
Jacob ukumuga ekumuyi o Sichem uwenda o Bethel
1Yilumbu yimosi Nsambi amaruma Jacob rie: Relama, wenda o Bethel, yetsana guna, avana gurungila yinyensulu yipagu yiNsambi. Avana nyimalabinina nagu ava gumayenarininanga muana nguji agu Esau.
2Jacob amatsingula bisi ndagu andi na botsu abamaba nandi rie: Gusulanu bansambi bangana abavu nenu, keliomisanu na duaranu biduaru bisusu. 3Turelama nowenda o Bethel avana nyurungila Nsambi yinyensulu yipagu, Nsambi agumalabana nami mu temu jimaguga mami na agumalinganga nami mu mulingu ami uotsu.
4Bamawakisa bakosi bangana botsu abamaba nogu ombu Jacob na bipunga wandi. Jacob amayetsiga bakosi beni na bipunga va tsi muiri uneni agumaba bebeli na Sichem. 5Mbana bamayenawenda. Goma jiNsambi jimanyava o misiengi miotsu amimaba yiarina yiari na batu basamaweliga uduka baana bababaala baJacob.
6Jaʼ beni Jacob na botsu abamaba nandi bamatola o Louz aguvu Bethel. 7Avana amarungila yinyensulu yipagu, na amaluga mbura eni rie: Nsambi Bethel; mu mbari avana Nsambi amakelasila ombu gandi ava amayenarininanga muana nguji andi.
8Debora agumaba ndetsi Rebecca amafu, amatsigu va banda Bethel va tsi muiri uneni agu bamaluga Muiri Umatsanga.
9Ava Jacob amaruyila o Mesopotamie Nsambi amamuelabana nandi; amamugabila miula. 10Nsambi amavosa nandi rie: Diina diagu divu Jacob; gugomuenengulungu Jacob tumba gunengulungu Israel. 11Nsambi amamuemutsingula rie: Menu la Nsambi aguvu na Mangolu Motsu. Nyufunisa baana bagu te na bategula bagu boba malongu. Bategula bagu bamosi boba bakaga wandi. 12Nyuguvega bulongu abu nyimavega ombu Abraham na Isaac na o gusu nyubuvega bategula bagu wandi.
13Mbana Nsambi amagusuga va mbura aji amavosila na Jacob; 14Jacob amaretsiga dimanyi vana mbura aji Nsambi amavosila nandi; amawitila pagu jiunu va julu dionyi na matsi wandi; amadivaga yirangumunu yiyingitsi. 15Jacob amaluga mbura aji Nsambi amavosila nandi Bethel.
Duburu duBenjamin na dufu duRachel
16BaJacob bamarambuyila o Bethel na mbe bakivu na dilala dineni utola o dimbu adinengulungu Efrata, avana Rachel amaburila. Amalaba tindi maguga na duburu dueni. 17Ava amagululungu misongu, muburisitsi amamuwarisa rie: Guyalaba keri mu mbari gumamuedila muana dibaala!
18Yika ufu efu, amaluga muana eni Ben-Oni; tumba taji andi amamuluga Benjamin.
19Rachel anofu amatsigu va mugula nsila jiEfrata adinengulungu Bethleem va temu ejiji. 20Jacob amaretsiga dimanyi vana ngila andi: te na namunyi divu dimanyi diRachel.
21Jacob amayenawenda na amarangiga ndagu andi jitsanda o yiari yina yiMigdalEder. 22Ava Jacob amatsanina o bulongu bueni, Ruben amafubana yitsiga na Bila mugatsi taji andi. Jacob amadigulu na amadinyonga.
Jacob amaba na yigumi na baana babeji bababaala. 23Miina mabaana bababaala baLea amama: Ruben tsomi Jacob, na Simeon na Levi na Juda na Issakar na Zabulon. 24Miina mabaana bababaala baRachel amama: Joseph na Benjamin. 25Miina mabaana bababaala baBila muviga uRachel amama: Dan na Neftali. 26Miina mabaana bababaala baZilpa muviga uLea amama: Gad na Asser. Amana la miina mabaana bababaala baJacob abamaburulu o Mesopotamie.
27Jacob amatola ombu taji andi Isaac o Mamre o Quiriat-Arba abuvu Hebron agu Abraham na Isaac bamaletsaninanga. 28Yitsingu yiotsu yilsaac yimaba kama na magumidunana mabilima. 29Bununu bulsaac bumabueji, bilima biandi bimaba bipuela na amafu. Baana bandi bababaala Esau na Jacob bamamutsiga.
Currently Selected:
Dibandu 35: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
