Migaga Mimatubula 32

1Julu liga matuji mbana nyuvosa; butamba gulu ama nyivosi.

2Malongi mami madekingi

nana maberi mamfuia

mambu mami magolumuyi nana disala,

nderi manogu mu bisinga na nderi

maberi mamamba mu magaji!

3Nyutubula buneni budiina diFumu.

Jenu baIsrael dumisanu

buneni buNsambi etu!

4Fumu avu dimanyi,

bisalu biandi bivu bidugu;

mambu mandi motsu mavu mawelimina.

Avu Nsambi asigama na

avu asungama na agaa na dupasu.

5BaIsrael bamakebivisa,

Fumu agaa na mbela;

dusaa baana bandi

duvu batu babi na mimbini.

6Je anana duigabusilili Fumu diboti,

jenu biduka na abagaa na diela?

Agaa taji enu? Agaa musunditsi enu?

Tsiri jandi agumadusunda na

agumaduvega mangolu?

7Rangiminanu temu tsikala,

rangiminanu bilima abimavioga

te na kula tsiotsu,

wivulanu bataji benu

jogu bodulonsa na bivunda bienu

jogu bodutsingula.

8Ava Nsambi Aguvu Uneni,

amaveyila disiala ombu bisi bulongu

amakakasana batu na amabatabulila

mandilu dedi mosi na dutalu dubaIsrael.

9Dikabu dibaIsrael divu batu bandi,

Bategula baJacob bavu bisolu biandi.

10Fumu amarasuna baIsrael o tsi jigumuga,

o mbura jibupinsa agumagumbanga nduku tsikulini.

Amabagaga na amababamba,

amabakelisa nana yikokosi yiandi

11Avu nderi mbira ajibandimini;

jipurumuyi va julu baana bandi

jisilisi mapapi mandi na jibabongi;

jibalinsi va julu mapapi mandi.

12Munongu mosi Fumu amawendisa batu bandi,

vasamaba bansambi basusu ne jimosi.

13Amamatisa baIsrael o julu tsimikongu

aguna bamaji milunda mimanungi;

amabafifisa buji bumamanyi

nesi matsi mamabapalila va

yilala yimamanyi.

14Bangombi na bindombu

bamabavega dile,

amabalisila nyama tsibaana

babindombu na tsibalumi

babindombu na tsibabinsabi,

bamaji fufu jible,

bamanu mamba mamirayisan.

15Jenu baIsrael dumavonga na dumatopulu uji;

dumavonga tindi uvonga,

dumarandana te na dumaputa!

Va julu vana dumaliyila

Nsambi agumadusunda nsima;

dumalensa dimanyi didugobutsu duenu.

16Jenu baIsrael dumarangisa

diwavi diandi

na bansambi bangana

dumamunyoyisa na nsoruru tsienu.

17Jenu baIsrael dumavagulila

bakosi abagaa Nsambi pagu,

ombu bansambi aba dusamalejabanga,

ababanoruga yika namapapa

aba bataji benu basamadumanga.

18Jenu baIsrael dumaliyila

dimanyi adimadubura nsima,

dumalibana Nsambi agumadubura!

19Fumu amadilaba na

amanyoga tindi unyoga

baana bandi bababaala na babagetu.

20Amavosa rie:

Ngomuebagengila mbana

nyulaba disukusulu diogu

nana diubila!

Bavu mimbini na baana

abagaa na dululu.

21Bamarangisa diwavi diami

na bansambi bangana

abagaa tindi Nsambi:

bamanyoyisa na bakosi bogu bakulini.

Meʼ wami nyubawavisa na

batu abagaa tindi batu,

nyubanyoyisa na dilongu adivu

yika biduka na biduka.

22Nyiina, nyunyoga tindi munyongu

ukambusa butamba na biandi biotsu

umanyensa nesi mabandu mamikongu.

23Nyubafunisila mabi motsu;

nyubatindila mbansa tsiami tsiotsu.

24Dungosu dunsala dubabokisa,

dibagu diubagudisa na yivunga yineni wandi.

Nyutsagumusa bibulu bibukanyi

ubamborumuna nesi miangala mibanyoga.

25O gusu kana boboku na majenga

na o gari tsimandagu boboku

na bivunga bineni:

dufu dugaanga batu botsu

nesi mufudu nesi numba

nesi muana aguvu va tulu

nesi yinunu.

26Nyimaba na ditasa ubaboka

notsiemusa durangumunu duogu,

27Tumba nyimatasa bavinitsi

bogu bokematisa novosa rie:

Jetu tumababelisa,

tsiri Fumu agumabavayila

mambu meni.

28BaIsrael bavu dilongu

adimatsiemusa dujabu duogu

bagaa na diela.

29Mbe bavu na diela mbe

bamagulu adidi,

mbe bamarangimina adi

bolaba o gusu.

30Tsie mutu mosi obingisila tosini batu?

Babeji borungula ubingisa

tosini beji tsibatu?

Nyiina, pa Dimanyi diogu disamabasumbisa

na pa Fumu asamabadunda!

31Bansambi bogu bagaa dedi na Dimanyi dietu

nesi bavinitsi betu bedijabi.

32Mfuga tsiogu tsiruyili o nungi

jiSodome no bulongu buGomorrhe;

mirayisan miogu migeligu

bisaga biogu bivu nduli;

33Malamu mogu mavu nderi miangala,

mavu tindi ndombu ajiboki.

34Motsu mana magaa masuegu bebeli nami?

Magaa mu bisuegulu biami?

35Kabusulu pila ajiami

na kabusulu wandi ava botsimbulu!

Bilumbu bimaguga mogu

bigotamba nolabana.

36Fumu otabulila batu bandi bunsonsi;

olasa abandi yingeba ava

elabila yiri mangolu

mogu mamabasuka;

nesi abavu baviga nesi abagaa baviga.

37Obawivula rie:

Bansambi bangana baka?

Dimanyi adimaba yisuemunu yienu dika?

38Bansambi beni abamajanganga

nyama tsibibulu biogu na

bamanuanganga malamu mapagu

tsiogu tsiunu baka?

Barelimi bakaduwamusa na kuamusulu tsiogu!

39Kabogu jabanu rie:

Menu aguvu Nsambi,

vagaa bansambi basusu

abebagunu nami;

Nyiveyi monyu na nyibokisi;

nyinemisi na nyibelusi.

Mutu orungula upatula

yima ayivu nami?

40Nyisambi dikaka o julu,

Nyilevi pesi rie:

Nyiji monyu umutubu!

41Pa nyisibi dijenga diami,

pa nyitabuli bunsonsi,

nyugabusila bavinitsi bami pila na

nyukilisa jogu abepini.

42Dijenga diami diubasasa,

mbansa tsiami tsiunyansula

malungu mogu,

malungu ma-abamanemusu na

mabakoli na mabivunda bibavinitsi.

43Jenu bisi malongu, dodisanu

batu baFumu!

Fumu ugabusila egabusili

pila jimalungu mabasalitsi bandi.

Ukilisa ekilisi bavinitsi bandi

etsindulili bulongu buandi

dibumi na batu bandi wandi.

44Moise amawenda na amavosa mambu motsu maduimbu dueni va gusu batu botsu; Josue muana dibaala uNoun amaba nandi.

45Ava Moise amamanina uvosa mambu meni motsu va gusu baIsrael botsu 46amabaruma rie: Namunyi kelisanu tindi ukelisa mambu meni motsu ama nyidurumi ulonsanga bategula benu yiri bokelisanga nokipanga mambu meni mamigaga miemimi. 47Migaga miemimi mivu tsongu enu; miuduvega monyu na miudurombisa utsinganga o bulongu abu Nsambi enu oduvega abuba abuenu o disimu dina diJourdain.

Dufu duMoise dumatubulu

48Muna yilumbu yieni Fumu amaruma Moise rie: 49Mata o julu mikongu miAbarim o julu mukongu uNebo o bulongu buMoab va nsungisini na Jericho; labilila bulongu buCanaan abu nyuvega baIsrael. 50Ndeʼ gufuila o julu mukongu agu gumata, gufu dedi mosi nana muana nguji agu Aaron amafuila o julu mukongu uHor. 51Jenu na Aaron dumapayila dibi va misu mabaIsrael va mamba maMeriba va Cades o kumu jiTsin; dusamalasa bunsambi buami ombu baIsrael. 52Gulabilila bulongu; tumba gugotola o bulongu abu nyuvega baIsrael.

Currently Selected:

Migaga Mimatubula 32: PUU1992

Highlight

Copy