Migaga Mimatubula 31
31
KANGUALI NA DUFU DUMOISE
Josue yivinga yiMoise
1Moise amamuetsingula baIsrael mambu memama rie: 2Namunyi nyina kama na magumabeji mabilima, nyisaa na mitogu na va julu vana Fumu amansingula rie: Ndeʼ gugosabuga Jourdain. 3Fumu Nsambi enu owendanga jaʼ beni va gusu enu na odubokila abetsani o disimu dina yiri dudila malongu mogu. Josue owendanga va gusu enu nana Fumu amavosila. 4Fumu ovayila malongu meni dedi mosi nana amavayila Sihon na Og, bakaga baAmor aba amabunga na malongu mogu wandi. 5Fumu obawakisa ombu genu dukabavayila dedi mosi nana nyimadurumina. 6Duyaregama na duyakambulu! Duyalaba goma, sunsanu mirima; mu mbari Fumu Nsambi enu owendanga nenu agodulibana via, na agodusila pinsa.
7Moise amanengila Josue na amamutsingula va misu mabaIsrael botsu rie: Guyaregama na guyakambulu mu mbari gutolisa batu bebaba o bulongu abu Fumu amavangana uvega bataji bogu. La ndeju agubadilisa buonyi. 8Fumu jaʼ beni owendanga va gusu agu, jaʼ beni obanganga nagu na agogulibana via, na agogusila pinsa, guyalaba keri, sunsa murima.
Diruma uranganga migaga kadi yiiima yimusambuali
9Moise amasona migaga miemimi na amamiwakisa bisi Levi abamaba bavagulitsi bapagu, abamanangulanga yigara yipangini yiFumu nesi ombu bivunda biotsu biIsrael. 10Moise amabavega diruma diedidi rie: Kadi yilima yimusambuali va temu jidujegusu na jiduyitsu diwendi rie: feta masamba, 11ava baIsrael botsu bokelasila va gusu Fumu Nsambi enu va mbura aji osola, ndeʼ gukaranga migaga miemimi va gusu baIsrael botsu. 12Gukagukiga batu, diwendi rie: nesi babaala nesi bagetu nesi bangebi nesi benyi aboba nenu yiri jogu botsu bogulu na bowiji uduma Fumu Nsambi enu ukelisanga nodedilanga mambu motsu mamigaga mieni. 13Baana bogu abagomijaba bomigulu na bowiji uduma Fumu Nsambi enu, temu jiotsu aji dutsaninanga o bulongu abuba abuenu o disimu dina diJourdain.
BaIsrael boliyila Nsambi nsima
14Fumu amatsingula Moise rie: Gtilu temu aji gufuila jika bebeli. Nengila Josue, wendanu o Ndagu Yibenguna. Nyumuvega maruma mami.
Moise na Josue bamawenda o Ndagu Yibenguna. 15Fumu amalabana o ndagu va gari dimungi; dimungi dieni dimasikama va dikotulu diNdagu. 16Fumu amatsingula Moise rie: Gulu namapapa gufu. Batu bebaba bokebivisa nokota o muyitsa ubansambi bangana babulongu abu bewendi. Bondiyila nsima na bokubula pangini ami aji nyimavangana nogu. 17Muna yilumbu yieni nyubanyoyila tindi kabu. Nyubaliyila nsima te na ngomuebakipa. Bolabanga tindi maguga maminongu na minongu te na bokewivula rie: Mbe Nsambi aji netu mbe tulaba maguga mamunongu egugu? 18Ngomuebakipa muna yilumbu yieni mu diambu dimabi ama bamavaga ava bamayitsila bansambi bangana. 19Tsie sonianu duimbu duedudu. Dulonsianu baIsrael yiri boduwimbilanga na duonyi duba bumbeji buami va gari ogu. 20Mu mbari nyubega batu bebaba o bulongu abu nyimavangana uvega bataji bogu abuvu na tindi digumba; bojanganga te na bogukurungu nesi uvonga; mbana boyitsanga bansambi bangana nobasalilanga bondensanga nobunsanga pangini ami: 21mbana ava bolabila maguga mamunongu na munongu, duimbu duedudu adugorungula ulibunu adu bowimbilanga duba nderi mbeji jibatu bebaba. Nyijabi nana batu bebaba bavu ne mbe basakakota o bulongu abu nyimavangana pangini ubavega.
22Muna yilumbu yieni Moise amasona duimbu duFumu na amadulonsa baIsrael.
23Fumu amavega maruma memama ombu Josue muana dibaala uNoun. Amavosa rie: Guyaregama na guyakambulu, la ndeju agutolisa baIsrael o bulongu abu nyimavangana ubavega; meʼ beni nyubanganga nagu.
24Moise anomana usona mambu mamigaga mieni mu dibuku, 25amavega bisi Levi abamanangulanga yigara yipangini yiFumu diruma diedidi rie: 26Bonganu dibuku diedidi dimigaga miNsambi nodisunsa va mugula uyigara yipangini yiFumu Nsambi enu, dionyi diuba vana nderi mbeji enu. 27Nyijabi bumbini buenu na ugala umirima mienu. Pa duilasi Fumu bumbini buenu ava nyikivu nenu, tsie dubila ava nyufuila? 28Bengusananu bivunda biotsu bibifumba bienu na bibagora va gusu ami; nyuvosa mambu maduimbu duFumu va misu mogu nesi va misu mabisi julu nesi mabisi butamba. 29Nyijabi yiri nyinofu dukebivisa na dupembuga nsila aji nyimadulonsa: te na dibi diududala ava duvayila amagaa mawelimina va gusu Fumu umunyoyisa na bisalu bienu.
Duimbu duMoise
30Moise amatubula mambu motsu maduimbu duedudu va misu madibuli diotsu dibaIsrael.
Currently Selected:
Migaga Mimatubula 31: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
