Migaga Mimatubula 27
27
BAISRAEL USANGILA BESANGILI PANGINI
Mamanyi mamarelugu va mukongu uEbal
1Moise na bivunda biIsrael bamaruma batu diruma diedidi rie: Jenu BaIsrael kelisanu migaga miotsu ami nyiduveyi namunyi. 2Ava dusabuyila Jourdain uwenda o bulongu abu Fumu Nsambi enu oduvega, dukareliga mamanyi maneni na dukamasinga pembi. 3Dukasona mambu motsu mamigaga mieni muna mamanyi meni. Ava dusabuyila Jourdain duwenda o bulongu abu Fumu Nsambi enu oduvega abuvu na tindi digumba nana Fumu bataji benu amadutsingulila. 4Ava dusabuyila Jourdain vana julu mukongu uEbal dukareliga mamanyi meni ama nyidurumi ureliga na dukamasinga pembi. 5Avana durungila Fumu Nsambi enu yinyensulu yipagu, yinyensulu yipagu yimamanyi, duyadukusu ne budilu bumosi mu monyi. 6Dukarungisa yinyensulu yipagu yiFumu Nsambi enu na mamanyi mamfuimbila. 7Dukavagula pagu tsikabusulu tsimaboti, avana dujanganga nolabanga nsangu va gusu Fumu Nsambi enu. 8Dukabaka mambu motsu mamigaga mieni muna mamanyi meni.
9Moise na bisi Levi abamaba bavagulitsi bapagu bamatsingula baIsrael botsu rie: BaIsrael, volatianu, guluanu! Namunyi jenu dumakaluga batu baFumu Nsambi enu. 10Dudedilanga diufi diFumu Nsambi enu na dukipanga maruma mandi na migaga miandi abi nyiduveyi namunyi.
11Muna yilumbu yieni Moise amarumina batu diruma diedidi rie: 12Ava dusabuyila Jourdain, yifumba yiSimeon na yiLevi na yiJuda na yiIssakar na yiJoseph na yiBenjamin boba o julu mukongu uGarizim ugabila batu miula. 13Mbana yifumba yiRuben na yiGad na yiAsser na yiZabulon na yiDan na yiNeftali boba o julu mukongu uEbal utubulanga milogu.
Yigumi na milogu mibeji
14Bisi Levi bobanda uvosa na mufi maneni na baIsrael botsu rie: 15Ka muna mulogu gu uvu na jandi oyivali bakosi vo oyivayi bakosi babudilu uyitsa o musuega; bisalu bieni bivu nsoruru ombu Fumu! Batu botsu bowaka rie: Anana! 16Ka muna mulogu gu uvu na jandi oyilensi taji andi na nguji andi! Batu botsu bowaka rie: Anana!
17Ka muna mulogu gu uvu na jandi oyikuekisi bilimba bimandilu mamutu nandi! Batu botsu bowaka rie: Anana!
18Ka muna mulogu gu uvu na jandi oyirombisi yidunga upembuga nsila! Batu botsu bowaka rie: Anana!
19Ka muna mulogu gu uvu na jandi oyikambisi muenyi, nesi yisiana nesi mukuili! Batu botsu bowaka rie: Anana!
20Ka muna mulogu gu uvu na jandi oyifubini yitsiga na mugatsi utaji andi mu mbari elensi taji andi! Batu botsu bowaka rie: Anana!
21Ka muna mulogu gu uvu na jandi oyifubini yitsiga na yibulu! Batu botsu bowaka rie: Anana!
22Ka muna mulogu gu uvu na jandi oyifubini yitsiga na yibusi yiandi, muana umugetu utaji andi nesi nguji andi! Batu botsu bowaka rie: Anana!
23Ka muna mulogu gu uvu na jandi oyifubini yitsiga na nguji jimugatsi andi! Batu botsu bowaka rie: Anana!
24Ka muna mulogu gu uvu na jandi oyiboki mutu nandi o musuega! Batu botsu bowaka rie: Anana!
25Ka muna mulogu gu uvu na jandi oyisingi ufutu ubokisa mutu agugaa na diambu! Batu botsu bowaka rie: Anana!
26Ka muna mulogu gu uvu na jandi oyibusi udugusu mambu mamigaga miemimi na agemikipi! Batu botsu bowaka rie: Anana!
Currently Selected:
Migaga Mimatubula 27: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
