Luka 2

Jesuh A Cun Coeng

1A khohnin a pha vaengah Kaisar Augustus taengkah oltloek lunglai pum a pat. 2Te hlangmi soepnah tah Syria Kurenius kah a taem vaengah lamhmacuek la om. 3Te dongah hlang boeih loh minghlum ham amah kho la rhip cet uh. 4Te vaengah Joseph khaw Galilee, Nazareth kho lamloh Judea kah Bethlehem la a khue David khopuei la cet. Anih te David imkhui kah nurhui pahrhui la om. 5Minghlum ham vaengah amah ham a bae Mary te pumrhih la om pueng. 6A om rhoi kuelhuelh ah a caom tue loh a kae. 7Tedae a capa caming omthang te a cun vaengah tah impahnah.

Tudawn Rhoek neh Puencawn

8Te vaengah amah tekah pingpang ah tudawn rhoek om uh. A tuping te khoyin ah thongim la a khoem uh tih a rhaeh thil uh. 9Te vaengah Boeipa kah puencawn tah amih taengah a phoe pah. Amih te Boeipa kah thangpomnah loh a tue dongah rhihnah neh bahoeng a rhih uh. 10Tedae amih te puencawn loh, “Rhih uh boeh, pilnam boeih taengah aka om ham omngaihnah tanglue te nangmih taengah olthangthen kan thui he. 11Tihnin ah nangmih ham khangkung om coeng. Anih tah David khopuei ah Khrih Boeipa la om coeng. 12Nangmih ham miknoek pakhat om vetih, cahni te a yol phoeiah khongduk dongah a yalh te na hmuh uh ni,” a ti nah.

13Te vaengah puencawn te vaan caempuei rhaengpuei loh tarha a om puei tih Pathen te a thangthen uh. 14Te vaengah, “Pathen te a sangkoek ah thangpomnah om saeh, diklai ah rhoepnah neh hlang rhoek soah a kolonah om saeh,” a ti uh.

15A om van bangla puencawn rhoek tah amih taeng lamloh vaan la cet uh. Tudawn rhoek loh khat neh khat taengah, “Bethlehem la cet pawn sih lamtah olthang aka thoeng he so uh sih. Te tah Boeipa long ni mamih ham a phoe sak,” a ti uh. 16Te phoeiah, tatloe la cet uh tih Mary, Joseph neh khongduk dong ah aka yalh cahni te a hmuh uh. 17A hmuh uh vaengah, te camoe kawng neh amih taengah a thui olka te a doek uh. 18Amih taengah tudawn rhoek loh a thui te aka ya rhoek boeih tah a ngaihmang uh. 19Tedae Mary loh tekah olka te boeih a kuem tih a thinko ah a khing a mong. 20Tudawn rhoek tah amih taengah a thui pah bangla boeih a hmuh uh. A yaak uh dongah te Pathen a thangpom uh tih a thangthen uh phoeiah bal uh.

Yahvin a Rhet Pah

21Hnin rhet cup coeng tih, camoe te yahvin a rhet vaengah tah a ming te Jesuh a sui. Te tah bung khuikah a yom hlanah puencawn kah a sui pah coeng ni. 22Moses kah olkhueng bangla amih kah imcim khohnin te a pha vaengah Jesuh te Boeipa taengah nawn ham Jerusalem la a khuen rhoi. 23Boeipa kah olkhueng dongah a daek bangla bung aka va tongpa a boeih tah Boeipa ham cimcaih la a khue ni. 24Te dongah Boeipa kah olkhueng dongah, “Vahu phiknit mai khaw, vahui ca panit mai khaw,” a ti bangla hmueih te a paek rhoi.

Simeon kah Olphong

25Te vaengah hlang pakhat, a ming ah Simeon te Jerusalem ah khoem om. Tekah hlang tah dueng tih cuep. Te dongah Israel kah thaphohnah te a lamtawn tih Mueihla Cim loh anih a om thil. 26Mueihla Cim loh anih taengah, “Boeipa kah Khrih te a hmuh hlan atah dueknah na hmu mahpawh," tila a mangthui tangtae te om. 27Simeon te mueihla loh bawkim khuila a pawk puei. Te vaengah camoe Jesuh amah te olkhueng kah khosing la saii ham a manu napa loh a khuen. 28Te phoeiah Simeon loh a kut dongah a doe tih Pathen te a uem. 29Te vaengah, “Boeikung na sal he na olthui bangla ngaimongnah neh nan hlah coeng. 30Namah kah khangnah te ka mik loh a hmuh coeng. 31Te ni pilnam tom kah mikhmuh ah na tawn pah. 32Vangnah he namtom a pumphoenah la, thangpomnah te na pilnam Israel hamla om coeng,” a ti. 33Camoe kawng a thui soah a napa neh a manu tah a ngaihmang rhoi. 34Simeon loh amih te yoethen a paek tih a manu Mary taeng ah, “Anih he Israel khuiah a yet kah a bungnah neh thohkoepnah ham neh boekoek miknoek la a khueh coeng he. 35Namah neh namah khaw na hinglu thunglang loh n'rhaih ni. Te daengah ni thinko kah poeknah te poeng a pumphoe eh,” a ti nah.

Anna kah Khoboe

36Te vaengah Asher koca kah Phanuel canu tonghmanu Anna om tih a kum khaw muep patong coeng. Anih he a hula lamloh a va neh kum rhih bueng hing rhoi. 37Te phoeiah kum sawmrhet kum li hil nuhmai la om. Anih tah bawkim te hlah tlaih kolla khoyin khothaih yaehnah neh, rhenbihnah neh tho a thueng. 38Pathen uem tue a pai kuelhuelh vaengah Jerusalem kah tlannah aka lamtawn rhoek boeih ham camoe kawng te a thui pah.

Nazareth la Mael

39Boeipa kah olkhueng bangla boeih a soep vaengah te amah kho Galilee, Nazareth la bal rhoi. 40Camoe tah a rhoeng vaengah rhaang tih cueihnah neh bae. Pathen kah lungvatnah long khaw a om thil.

A Napa Im Ah

41Kum takuem yoom khotue ah a manu napa te Jerusalem la cet. 42Kum hlainit a lo vaengah khotue kah khosing bangla amih te cet uh. 43Khohnin te cup tih a bal uh vaengah cadong Jesuh tah Jerusalem ah uelh tih a manu napa loh ming pawh. 44Jesuh te lambong khuiah om tila a poek uh dae hnin at long caeh phoeiah tah a huiko neh a hmat taengah a tlap rhoi. 45A hmuh rhoi pawt dongah anih tlap ham Jerusalem la mael rhoi. 46A thum khohnin a pha phoeiah Jesuh te bawkim khuikah saya rhoek kah a laklung ah ana ngol, amih taengah a hnatun tih amih ana dawt te a hmuh rhoi. 47Anih kah yakmingnah neh ollannah boeih te aka ya rhoek boeih tah limlum uh. 48Jesuh te a hmuh rhoi vaengah let rhoi tih a manu loh, “Ka capa, balae tih kaimih rhoi tlam he nang khueh? Na pa neh kai loh nang kan toem rhoi tih n'yuek sut coeng he,” a ti nah.

49Te vaengah amih rhoi te, “Balae kai nan toem rhoi? A pa im ah ka om ham a kuek te na ming rhoi mahnim?” a ti nah.

50Tedae amih rhoi taengah a thui pah olka te amih rhoi loh a hmuhming rhoi moenih.

Pathen neh Pilnam Loh A Uem

51Te phoeiah amih rhoi taengah cet tih Nazareth la pawk uh. A taengah boengai la om tih olka te a manu loh a thinko ah boeih a khoem. 52Jesuh tah cueihnah neh pumrho ah rhoeng tih Pathen neh hlang taengah lungvatnah a dang.

Currently Selected:

Luka 2: MCSB

Highlight

Copy