Suencuek 11

Babylon Imsang

1Te vaengah diklai pum ah ol pakhat neh olka thikat la om. 2Tedae amih te khothoeng la a puen uh hatah Shinar khohmuen ah kolbawn a hmuh uh tih teah te kho a sak uh. 3Te vaengah hlang loh a hui taengah, “Halo, laiboeng saii uh sih lamtah hmai neh tik uh sih,” a ti uh. Te dongah lungto yueng la laiboeng te a khueh tih taplai yueng la lungpaat a khueh uh. 4Te vaengah, “Lo lah, mamih ham khopuei neh rhaltoengim khaw, a soi te vaan duela sa uh sih. Te dongah mamih ham ming khueh sih, diklai pum kah mikhmuh ah vik n'taekyak uh ve,” a ti uh.

5Tedae khopuei te hmuh ham BOEIPA ha pawk vaengah hlang ca rhoek loh rhaltoengim te ana sak uh. 6BOEIPA loh amih he pilnam pakhat neh ol pakhat la boeih a om uh dongah saii ham a mangtaeng uh khaw saii ham a tong uh hatah amih ham lol tlaih pawt la he! 7Ceh, suntla uh sih lamtah amih ol te thoek pah sih. Te daengah ni hlang loh a hui kah hmuilai te a yaak pawt eh,” a ti. 8Te dongah BOEIPA loh amih te diklai hman boeih ah a taekyak tih khopuei thoh ham khaw a toeng uh. 9He kongah BOEIPA loh diklai pum kah ol he pahoi a thoek pah tih a ming te Babylon a sui. Te lamlong tah BOEIPA loh amih te diklai hman boeih ah a taekyak.

Shem Lamloh Abram

10Hekah he Shem kah rhuirhong ni. Shem te kum yakhat lo ca coeng tih tuilii kum phoeiah Arphaxad te a sak. 11Arphaxad te a sak phoeiah Shem khaw kum ya nga hing tih capa rhoek neh canu rhoek te a sak. 12Arphaxad khaw kum sawmthum neh kum nga a lo vaengah Shelah te a sak. 13Shelah te a sak phoeiah Arphaxad khaw kum ya li neh kum thum hing tih a capa rhoek neh canu rhoek te a sak. 14Shelah khaw kum sawmthum a lo vaengah Eber te a sak. 15Eber te a sak phoeiah Shelah khaw kum ya li neh kum thum hing tih capa rhoek neh canu rhoek te a sak. 16Eber khaw kum sawmthum neh kum li a lo vaengah Palak te a sak. 17Palak te a sak phoeiah Eber khaw kum ya li neh kum sawmthum hing tih capa rhoek neh canu rhoek te a sak. 18Palak khaw kum sawmthum a lo vaengah Reu te a sak. 19Reu te a sak phoeiah Palak khaw kum yahnih neh kum ko hing tih capa rhoek neh canu rhoek te a sak. 20Reu khaw kum sawmthum neh kum nit a lo vaengah Seruk te a sak. 21Seruk te a sak phoeiah Reu khaw kum ya neh kum rhih hing tih capa rhoek neh canu rhoek te a sak. 22Seruk khaw kum sawmthum a lo vaengah Nakhaw te a sak. 23Nakhaw te a sak phoeiah Seruk khaw kum yahnih hing tih capa rhoek neh canu rhoek te a sak. 24Nakhaw khaw kum kul neh kum ko a lo vaengah Terah te a sak. 25Terah te a sak phoeiah Nakhaw khaw kum ya neh kum hlai ko hing tih capa rhoek neh canu rhoek te a sak. 26Terah khaw kum sawmrhih a lo vaengah Abram, Nakhaw, neh Haran te a sak.

27Te phoeiah hekah he Terah kah rhuirhong ni. Terah loh Abram, Nakhaw neh Haran te a sak tih Haran loh Lot te a sak. 28Tedae Haran te a napa Terah mikhmuh ah a pacaboeina khohmuen Khalden kho Ur ah duek. 29Te phoeiah Abram neh Nakhaw loh yuu a loh rhoi. Abram yuu ming tah Sarai tih Nakhaw yuu ming tah Haran canu Milkah ni. Haran tah Milkah neh Iskah kah a napa ni. 30Te vaengah Sarai te yaa la om tih camoe khueh pawh.

31Tedae Terah loh a capa Abram neh a capa Haran kah capa Lot khaw, a capa Abram yuu a langa Sarai khaw, a khuen tih Khalden kho Ur lamkah Kanaan khohmuen la caeh ham tun hlah uh dae Haran te a pha uh vaengah teah te kho vik a sak uh. 32Terah kah a tue khohnin he kum yahnih neh kum nga lo. Terah khaw Haran ah duek.

Currently Selected:

Suencuek 11: MCSB

Highlight

Copy