Loma 6

Mapatay to nika Ciraraw, Ma'orip i ci Kristoan

1Ano hatira i, o sasamaanen ita? O nika rarid ita a ciraraw ko nga'ay, ta matongal a matongal a mahapinang ko mikomi no Kawas i titaanan saan kita haw? 2Caay ka nga'ay! Ano pakayniay i raraw i, o mapatayayto kita, mimaan haca kita a mararid a ma'orip i raraw saw? 3Mafana'to kamo, yo mapaino' kita i, itiya a mapalaccay kita aci Yis Kristo. Pakayni tonini a ino' a mapakapot kita i Cingraan a mapatay. 4Pakayni i nika paino' ita ko sakapikapot ita i Cingraan a mapatay a matadem. Ta matiya o pipalowad no Wama ita ci Kristoan a pa'orip nai patay pakayni i tadamaanay a 'icel Ningra ko nika nga'ay ita i matini a masafa^loh ko 'orip.

5Ano mapalaccayay kita aci Kristo a mapatay i, o milcaday kita i Cingraan a mapalowad a mapa'orip nai patay. 6Mafana' kita, o katlangay a faloco' ita koya mapakapotay i ci Kristoan a mapacek i ciwcika. Onini i, o sapalasawadaw to ciraraway a tireng ita, ta caayto ka lakoli no raraw kita i ikor nonini. 7Nawhani ano mapatayto ko tamdaw i, o matdalayto cingra nai sapalit no raraw. 8Ano mikapotay kita i ci Kristoan a mapatay i, o mikapotay kita i Cingraan a miliyaw a ma'orip saan ko pipaso'lin ita. 9Mafana' kita, o lomowadayto ci Kristo a ma'orip nai patay. Caayto ko mamiliyaw Cingra a mapatay. 10Tona mapatay Cingra saka, caayto ka kowan no raraw Cingra. O miliyaway Cingra a ma'orip. Saka, sahto o mido^doay to nafaloco'an no Kawas ko nika 'orip Ningra. 11Orasaka, ano pakayniay i raraw i, mapatayayto kako. Nikawrira, o 'orip ako anini tona mapalaccayayto kako aci Yis Kristo i, o pasayraayto i Kawas ko faloco' ako, han ko faloco' namo.

12Orasaka, aka papikowanen ko raraw to mamapatay a tireng namo. Ta caay pido^do kamo to 'anof no tireng. 13Aka patoroden i raraw ko tireng namo a malalalosidan no tatiihay a dmak. O mapa'oripayto nai patay kako han ko harateng a pacakat i Kawas to tireng namo a malalalosidan no mo^celay a dmak. 14Nawhani, caayto ko mamapalit no raraw kamo, caayto ko mamakowan no Rikec kamo. O i laloma'ayto no mikomi no Kawas kamo.

Malakoli no Mo^celay a Dmak

15Tona caayto ko makowanay no Rikec kita, o i laloma'ayto no mikomi no Kawas kita saka, manga'ay kita a ciraraw haw? Caay ka nga'ay! 16Mafana'to kamo, ano patorod kamo to tireng a palakoli no nima a mitoor toya tawki i, o koli ningra kamo. Ano malakoli no raraw kamo i, o patay ko pahrekan. Ano mihaklong to Kawas kamo i, o mamalamo^celayto a tamdaw kamo. 17O aahowiden ko Kawas. Nawhani nano koli no raraw kamo i ti:yaho. Nikawrira, masarocodto ko faloco' namo anini a mitoor to nipasifana'an i tamowanan a sowal no Kawas. 18O matdalayto kamo nai sapalit no raraw. Saka, o mo^celay a dmak ko palakoliay tamowanan. 19Matalaw kako to kafokilan namo a mitngil to tatodong no sowal ako. Saka, o i hkalay a sowal ko sapasowal ako i tamowanan. I ti:yaho i, patoroden namo i kaackan, i tatiihay a dmak ko tireng namo a palakoli no tatiihay a dmak. Haenen ko pipatorod namo anini to tireng namo i Kawas a pacakat. Ta o mo^celay a dmak ko palakoliay tamowanan, ta malafangcalay a lalosidan kamo.

20Yo o koliho no raraw kamo i, caay pikihar kamo to mo^celay a dmak. 21Oya nidmakan namo i ti:yaho i, o kakangodoan namo anini. O maan ko ^poc noya dmak namo saw? O patay ko pahrekan noya dmak namo. 22Nikawrira, matdalto kamo anini nai sapalit no raraw. Saka, malakolito no Kawas kamo. O mipacakatayto kamo i Kawas to polong no 'orip namo. O hci nonini a dmak namo i, o mida'ocay a 'orip. 23O hci no raraw i, o patay. Nikawrira, o sapafli no Kawas i titaanan a mikomi i, o mida'ocay a 'orip to nano nika laccay ita ato Tapang ita ci Yis Kristoan.

Currently Selected:

Loma 6: AMIS2019

Highlight

Copy