'Olic 59
59
O Pilongoc to Sadipot
O nito^to'an ni Tafiti a 'olic, yo ocoren ni Sawlo ko tamdaw a midipdip to loma' ni Tafiti to sapipatayaw cingraan. Mapatorod i kakridan no paradiway. O no <<Caay ko Tatastasen>> a hacong ko saparadiw.
1Kawasaw ako, nanay paliyasen kako nai 'ada ako,
dipoten kako a paliyas nai mari'angay i takowanan.
2Nanay pa'oripen kako a paliyas nai tatiihay a tamdaw,
ta maliyas ako ko mipatayay a tamdaw.
3Nengnengen, misa'imer cangra to sapikari'angaw i takowanan,
masakapot ko miforiforay a tamdaw a pacoli i takowanan,
caay ko nano patlac ako konini,
caay haca ko nano pidmak ako to maan a tatiihay a dmak.
4 Tapangaw, awaay ko patlac ako i, tamor sa cangra to sapikari'angaw i takowanan.
5 Tapangaw, o mikomoday a Kawas, kalomowad a padama i takowanan!
O Kawas no Israil, nanay tapalen kami!
Mamana lomowad Kiso a mitfoc to roma a finacadan,
aka ka sini'adaen cangra o tatiihay o pacoliay a tamdaw.
6Minokay cangra to dadaya i,
matiya o miltohay a waco cangra a misarakarakat to niyaro'.
7O katalawan a mitngil ko pisamsam nangra a mipatalaw,
matiya o fonos ko sowal nangra,
ira a mimaan ko mitngilay to sowal ita saan cangra.
8Nikawrira, Tapangaw, matawa Kiso i cangraan,
lokesen Iso ko kasakitakit.
9'Icelaw ako, mica'ngaw kako i Tisowanan,
Kawasaw, o pilimekan ako Kiso.
10Maolah ko Kawas ako i takowanan,
tayni Cingra a mipadama i takowanan,
pa'arawen Ningra kako to nika lowid no 'ada ako.
11Kawasaw, aka hadefeken Iso a mipatay cangra,
ta caay katawal no finawlan ako Kiso.
Tapangaw, o midipotay Kiso i tamiyanan.
Mamana pakayni i 'icel Iso a milaplap a mipalasawad i cangraan.
12Matomes no tatiihay ko ngoyos nangra,
sahto o sakaciraraw ko sowal nangra.
Mamana tahafikod cangra a mapolin to nano pisalata'ata'ang nangra.
Nawhani o mi'kakay, o misa'fitay cangra,
13mamana pasayra Kiso i cangraan a makter a mitkop i cangraan,
mamana ^minen Iso a mitkop cangra.
Ta mafana' ko kasafinawlan to nika o mikowanay ko Kawas to Israil ato
o mildefay to polong no hkal ko pikowan Ningra.
14Minokay ko 'ada ako to dadaya i,
matiya o miltohay a waco cangra a misarakarakat to niyaro',
15matiya o waco a talacowacowa a mikilim to kakaenen,
ano caay ka fcol cangra i, milaltoh cangra.
16Nikawrira, o raromadiw kako a pahmek to 'icel Iso,
o mamilkal kako a romadiw to dafadafak to mida'ocay a olah Iso.
O pilimekan ako Kiso,
o midipotay Kiso i kapadesan ako.
17Midipotay i takowanan, o papahmeken ako Kiso,
o pilimekan ako ko Kawas,
o maolahay i takowanan a Kawas.
Currently Selected:
'Olic 59: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
