'Olic 25
25
O Pilongoc to Pikrid ato Pidipot no Tapang
O 'olic ni Tafiti.
1 Tapangaw, pasayra kako i Tisowanan a mitolon,
2Kawasaw ako, deng Kiso ko piti'eran ako.
Nanay caay pakangodoen Iso kako a pakatoled,
aka ka palata'angen ko 'ada ako.
3Caay ko mamatfad ko miti'eray i Tisowanan,
o matfaday i, oya padteng sanay a pacoli i Tisowanan a tamdaw.
4 Tapangaw, nanay pahapinangen kako to lalan Iso,
pasifana'en kako to lalan Iso.
5Nanay kriden kako a papido^do to so'linay a lalan Iso,
nawhani o pa'oripay i takowanan a Kawas Kiso.
Hinatala kako i Tisowanan to romi'ami'ad to dadayadaya.
6 Tapangaw, nanay haenen Iso to hatiniay ko sini'ada ato caay ka falic a olah Iso i takowanan.
7Nanay hpolen Iso ko raraw ato patlac ako to nano ka^manganho,
Tapangaw, nanay haratengen kako, nawhani o nga'ayay, caay ka falic ko olah Iso.
8O nga'ayay, o mo^celay ko Tapang saka,
pahapinangen Ningra ko ciraraway a tamdaw to dado^doen a lalan.
9Kriden Ningra ko misapo^neray ko faloco' a tamdaw a papido^do to mo^celay a lalan,
pasifana'en Ningra cangra to nafaloco'an Ningra.
10O so'linay a caay ka falic a olah no Tapang ko sapikrid Ningra to ma'imeray to katatlekan ato limo'ot Ningra.
11 Tapangaw, nanay do^doen ko niktonan Iso a sowal a mihpol to raraw ako,
nawhani tadakarteng ko raraw ako.
12O mangodoay to Tapang i,
o papahapinangen no Tapang to dado^doen ningra a lalan.
13O mamalmed a rihaked ko 'orip nangra,
o rarihaday ko aro' no wawawawa nangra tonini a sra.
14Sawidangen no Tapang ko mangodoay Cingraan a tamdaw,
pahapinangen Ningra to katatlekan a sowal cangra.
15Mararid kako a hinatala to Tapang,
nawhani o pa'oripay a paliyas Cingra i takowanan nai katalawan.
16 Tapangaw, nanay sikolenho kako a minengneng,
kaadayayen kako, nawhani o tadancaay kako,
matked ako ko pades.
17Nanay palasawaden Iso ko roray no faloco' ako a ma^min,
pa'oripen kako a paliyas nai latiih ako a ma^min.
18Nanay haratengenho Iso ko nika pades ako a misemsem,
hpolenho ko raraw ako a ma^min.
19Nengnengen, wata: ko nika 'aloman no 'ada ako,
wata: ko nipi'intel nangra i takowanan.
20Nanay dipotenho kako, pa'oripenho kako,
nanay caay ka tfaden Iso kako,
nawhani Kiso ko nikiliman ako to papa'ading.
21Nanay o nika so'lin ato nika mo^cel ako ko sakarihaday ako,
nawhani Kiso ko kacifaloco'an ako.
22Kawasaw, nanay pa'oripen Iso ko Israil,
nanay paliyasen Iso cangra nai latiih nangra a ma^min.
Currently Selected:
'Olic 25: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
