'Olic 18
18
O Radiw ni Tafiti tona Pakalowid
(2 Samuil 22.1-51)
O 'olic ni Tafiti, o matayalay no Tapang. Mapatorod i kakridan no paradiway. Itiya yo mapa'orip no Tapang cingra a paliyas nai kamay ni Sawlo ato romaroma a 'ada ningra toyanan a romi'ad, onini ko sapa'olic ni Tafiti to Tapang.
1 Tapangaw, Kiso ko sakaci'icel ako,
tadamaolah kako i Tisowanan.
2O midipotay takowanan a 'ongcoy ato pisitaraan ko Tapang,
o mitahpoay takowanan a pilimekan ako ko Kawas ako,
o midipotay takowanan a sapatada ato mipa'oripay i takowanan a 'icel,
o piki'adingan ako Cingra.
3Mitahidang kako a milongoc i papahmeken a Tapang,
saka, pa'oripen Ningra kako a paliyas nai 'ada.
4Mifedfed ko towaso no patay a mitaliyok i takowanan,
mistol ko kalidkid no mitkopay i takowanan.
5Mifedfed ko towaso no kaitiraan no patay i takowanan,
mitala ko tilo no tadem i takowanan.
6Yo mapades kako i, mitahidang kako to Tapang,
milongoc kako to pipadama no Kawas ako.
Matngil Ningra i Fangcalay Pita'ongan Ningra ko ngiha' ako,
micomodto i tangila Ningra ko ngiha' ako a milongoc to pipa'orip Ningra.
7Itiya i, mangernger ko sra,
mangiyangi ko paranaan no lotolotok,
nawhani makter ko Kawas.
8Masadak i ngoso' Ningra ko 'acfel,
masadak i ngoyos Ningra ko mayamayamay a namal ato marengrengay a 'acfel.
9Fawahen Ningra ko kakarayan a ma^pod,
ira i pasaripa'an Ningra ko kohtingay a to'em.
10Midakaw Cingra to kirupim a ma^fer,
pakaynien Ningra i sapikpik no fali ko saka kaliki a ma^fer.
11O to'man ko sapitahpo Ningra to tireng Ningra,
mataliyok no cinanomay a kiftolay a to'em Cingra.
12Masadak ko masa'ikayay a so^da ato marengrengay a 'afel nai 'dil i ka'ayaw Ningra,
mapowak koya koftolay kohtingay a to'em.
13Pakaklengen no Tapang nai kakarayan,
pasadaken no Isatakaraway ko ngiha' Ningra.
14Pana'en Ningra a paliwasak ko 'ada Ningra,
pasadaken Ningra ko fitili' a milaplap i cangraan.
15 Tapangaw, kapo'iyen Iso ko 'ada,
kakter han Iso a micli' cangra i,
talahkalto ko tatnaan no riyar,
mahapinangto ko paranaan no sra.
16Laya' sa to kamay ko Tapang nai kakarayan a mirpet i takowanan,
pasadaken Ningra kako nai talolongay a nanom.
17Pa'oripen Ningra kako a paliyas nai kamay no ci'icelay a 'ada,
paliyasen Ningra kako nai mi'intelay takowanan a tamdaw,
nawhani ikaka ako ko nika ci'icel nangra a ma^min.
18Yo mapades kako i, looden nangra kako,
nga'ayay ira ko Tapang a midipot i takowanan.
19Maolah Cingra i takowanan saka, pa'oripen Ningra kako,
kriden Ningra kako a paliyas nai kacalemceman.
20O nika mo^cel ako saka, pakaolahen no Tapang kako,
o nika awa no raraw ako saka, palmeden Ningra kako.
21O mido^doay kako to lalan no Tapang,
caayho pipacoli kako to Kawas ako.
22O ma'imeray kako to rikec Ningra a ma^min,
caayho piliyang kako to limo'ot Ningra.
23Mafana' Cingra to nika awa no patlac ako,
o miliyasay kako a miraay to tatiihay.
24Orasaka, do^doen no Tapang ko nika mo^cel ako a pakaolah i takowanan,
nawhani mafana' Cingra to nika awa no raraw ako.
25 Tapangaw, o so'linay a tamdaw i, o so'linay ko pihamham Iso i cingraan,
o nga'ayay a tamdaw i, o nga'ayay ko pihamham Iso i cingraan.
26O makoracay a tamdaw i, o makoracay ko pihamham Iso i cingraan,
o tatiihay a tamdaw i, sa'adaen Iso cingra.
27Pa'oripen Iso ko misapo^neray ko faloco' a tamdaw,
tfaden Iso ko misatakaraway ko faloco' a tamdaw.
28 Tapangaw, likaten Iso ko dawdaw ako,
o palasawaday ko Kawas ako to to'man.
29O pafliay Kiso i takowanan to sapilowid to 'ada a 'icel,
saka, ma^deng kako a mipelpel to pisitaraan nangra a 'adipel.
30O masongila'ay ko dmak nonini a Kawas,
o so'linay a tati'eren ko sowal Ningra.
Matiya o sapatada Cingra a midipot to miti'eray i Cingraan a tamdaw.
31O dengan o Tapang ko Kawas, awaay ko roma,
o dengan onini a Kawas ko piki'adingan ita a 'ongcoy.
32Onini a Kawas ko pafliay i takowanan to 'icel,
Cingra ko sakarihaday no rakat ako i lalan.
33Samatiyaen Ningra o tariktik no tawinaan a malonem ko rakat ako,
saka, sarihaday sa ko rakat ako i tokotokosan.
34Pananamen Ningra kako to sakafana' a milood,
saka, ma^deng kako a minayat to 'ifcangay a focol no pana'.
35 Tapangaw, o pa'oripay i takowanan a sapatada Kiso,
o kawanan a kamay Iso ko midamaay i takowanan,
o pidipot Iso ko sakalomowad ako.
36Kiso ko misakakahaday to lalan ako,
saka, caayho ka tolo' kako.
37Lpelen ako ko 'ada a mirpet i cangraan,
ano caay ka lowid cangra i, caay pitolas kako.
38Malowid ako cangra a milood saka, caayto ka tomireng cangra,
taflik sato cangra a ma^min i pasaripa'an ako.
39Mapafli Iso kako to sapilood a 'icel,
saka, ma^deng kako a milowid to 'ada.
40Kiso ko sapilaliw no 'ada i takowanan,
Kiso ko sakapakatkop ako to mi'intelay i takowanan.
41Mitahidang cangra a milongoc to papa'orip,
nikawrira, awaay ko mama^deng a pa'orip i cangraan.
Pasayra cangra i Tapang a milongoc,
nikawrira, caay pakalayap to ca'of Ningra.
42Fonalen ako cangra a palaaped, samatiya sato o mafiyokay no fali
a alafoh a maliwasak cangra,
sakasaken ako cangra a matiya o pisakasak to alafoh i lalan.
43Pa'oripen Iso kako a paliyas nai pacoliay a finawlan,
Patirengen Iso kako a palakakridan no kasakitakit,
halo roma a finacadan a mihaklong i takowanan.
44Ano matngil nangra ko sowal ako i, tangsol cangra a mihaklong,
mipitosor a ma^min i ka'ayaw ako ko roma a finacadan.
45Matoledto cangra a awaayto ko cdi,
mirmir sato cangra a masadak nai pisitaraan nangra.
46O mida'ocay a ma'orip ko Tapang,
o hahmeken namo ko midipotay i takowanan.
O pa'oripay i takowanan ko Kawas.
O papalosiyangen namo ko nika tadamaan Ningra.
47Cingra ko sakapakalowid ako to 'ada,
Cingra ko sakapisodod no kasafinacadan i takowanan,
48o romasato, pa'oripen Ningra kako a paliyas nai 'ada.
Tapangaw, Kiso ko sakapakalowid ako to 'ada,
pa'oripen Iso kako a paliyas nai mari'angay a tamdaw.
49Orasaka, o papalosiyangen ako i roma a finacadan Kiso,
o papahmeken ako a romadiw Kiso.
50O nipatirengan no Kawas a hongti i,
kinapinapi:nato a pakalowid.
I tini Cingra a pahapinang i nipili'an Ningra ci Tafitian ato tloc ningra to caay ka falic a olah Ningra.
Currently Selected:
'Olic 18: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
