Maroko 16

O Kalomowad ni Yis a Ma'orip nai Patay

(Matay 28.1-8; Luka 24.1-12; Yohani 20.1-10)

1Nanoya, mahrek ko Pasla'an a Romi'ad i, mi'aca to fangsisay a sapaiyo ci Mariya no Maktala ato ci ina ni Yakop ci Mariya aci Salomi to sapisipasip to tireng ni Yis. 2Yo dafak no sa'ayaway a romi'ad no fa^lohay a lipay yo sadak saho ko cidal i, tayra cangra i tadem. 3Yo i lalanho cangra i, masasowasowal cangra, <<Cima hakini ko papatado titaanan a miwalin to fokloh nai fawahan no tadem?>> saan cangra. 4(Nawhani tadatata'ang koya fokloh.) Nikawrira, ca'ngaw sa cangra a minengneng i, mawalin ito koya fokloh. 5Comod sa cangra i laloma' no tadem i, ma'araw nangra ko ccay a kapah. Maro' cingra i sakawanan. Ciriko' cingra to tomli'ay a kafafang. Saka, mackok cangra a minengneng.

6Sowal sa koya kapah, <<Aka ka ckok! Mafana' kako o mikilimay kamo toya nipacekan i ciwcika a Nacali a Yis. Awaayto i tini Cingra, lomowadayto Cingra a ma'orip nai patay! Nengnengen, ini ko pitlian nangra i Cingraan. 7Olili. Katayra i nisawawaan Ningra a pasowal. Songila'en ci Pitiro a somowal, <I 'ayaw to namo Cingra a tayra i Kalili, masanosowal Ningra i tamowanan, o mama'araw namo Cingra itira,> >> han ningra.

8Mirmir sato koya fafahiyan a matalaw saka, pkaw sa cangra a milaliw nai tadem. Caay pasowal cangra to maan aca i cimacimaan, nawhani matalaw cangra.

Ira a matilid i katlangay a cudad konini a tosir (1)

O Pipa'araw ni Yis ci Mariyaan no Maktala

(Matay 28.9-10; Yohani 20.11-18)

[ 9Nalomowad ci Yis a ma'orip nai patay to sa'ayaway a romi'ad no fa^lohay a lipay, ci Mariya no Maktala ko a'ayaway a nipa'arawan Ningra. (Onini a fafahiyan i, o nano nifahfahan ni Yis ko papitoay a palafoay nai cingraan i 'ayaw.) 10Tayra cingra a pasowal i nano kapot ni Yis a tamdaw. Mararom tomangic cangra itiya. 11Mitngil cangra to sowal ningra to nika piliyaw ni Yis a ma'orip ato pipa'araw ni Yis ci Mariyaan i, caay paso'lin cangra.

O Pipa'araw ni Yis to Tatosaay a Nisawawaan

(Luka 24.13-35)

12Nanoya, yo romakat ko tatosa nangra a tayra i omaomahan i, o mafalicay a tireng ko sapa'araw ni Yis i cangraan. 13Saka, patiko konini a tatosa a pasowal i romaroma a nisawawaan i, caay paso'lin cangra.

O Pipa'araw ni Yis i Ccay ko Safaw a Nisawawaan

(Matay 28.16-20; Luka 24.36-49; Yohani 20.19-23; Dmak 1.6-8)

14Nanoya, yo mitahka ko ccay ko safaw a nisawawaan i, pa'araw ci Yis i cangraan. Kakteren ni Yis cangra to nika ^ca paso'lin ato nika 'atkak no faloco' nangra. Nawhani caay paso'lin cangra to sowal no paka'araway to nika lomowad Ningra a ma'orip nai patay. 15Pasowal sa ci Yis i cangraan, <<Katayra kamo i polong no hkal a patnak i tamdamdaw a ma^min to Nga'ayay Ratoh. 16O paso'linay ta mapaino'ay a tamdaw i, o mamapa'orip. Nikawrira, o caay paso'lin a tamdaw i, o mamapastek i raraw. 17O mamapafli ko paso'linay a tamdaw to 'icel to sapidmak to kafahka'an. O ngangan Ako ko sapifahfah nangra to palafoay a pasadak nai tamdaw. O papasowal cangra to fa^lohay a no 'Adingoan a sowal. 18Ano mirperpet cangra to 'oner, ano minanonanom to sawarak i, caay ko aadada cangra. O romasato, o mamaadah ko nikapaan nangra a adadaay,>> saan.

Makakoy ci Yis a Talakakarayan

(Luka 24.50-53; Dmak 1.9-11)

19Mahrek ko Tapang ci Yis a pasowal i cangraan i, makakoy Cingra a talakakarayan a maro' i kawanan no Kawas. 20Saka, lowad sato ko nisawawaan a tayra i cowacowa a patnak to Nga'ayay Ratoh. Mikapot ko Tapang i cangraan a matayal. Pakaynien no Tapang i nipidmak nangra to kafahka'an ko nipipahapinang to nika o so'linay ko nipatnakan nangra a sowal.]

Ira haca a matilid i katlangay a cudad konini a tosir (2)

[ 9 Tayra a miraod koya fafahiyan i ci Pitiroan ato widawidang ningra a miparatoh to polong no nitngilan nangra a ratoh. 10 Ikorto i, to^to sa ci Yis a miocor to nisawawaan Ningra nai kawali tahira i ka^tip a papipatnak tonini a fangcalay, caay ko mamapohed a Ratoh to saka ci'orip no tamdamdaw to mida'ocay.]

Currently Selected:

Maroko 16: AMIS2019

Highlight

Copy