Luka 23

O Piliclic ni Pilato

(Matay 27.1-2, 11-14; Maroko 15.1-5; Yohani 18.28-38)

1Orasaka, lowad sato ko 'alomanay a ma^min, ta makidkid ci Yis a mapatayra i ka'ayaw ni Pilato. 2Ta pakokot sato cangra a somowal, <<Ma'araw niyam ko nipisawi nonini a tamdaw to finawlan a milalang to pipasata i hongti no Loma. Ci Kristo, o hongti kako saan cingra,>> han nangra.

3Liclicen ni Pilato ci Yis, <<O hongti no Yutaya a tamdaw kiso haw?>> han ningra.

Paca'of sa ci Yis, <<O sowal iso konini,>> han Ningra.

4Sowal sa ci Pilato i kakridan no citodongay to ta'ong ato finawlan, <<Awaay a matama ako ko maan aca a raraw nonini a tamdaw,>> han ningra.

5Nikawrira, sa'icel sa cangra a somowal, <<Parawraw konini a tamdaw to finawlan. Nai Kalili tangasa i tini i polong no Yutaya a pala ko nipipasifana' ningra a parawraw,>> han nangra.

I Ka'ayaw ni Hiroti ci Yis

6Mitngil ci Pilato tonini i, <<O Kalili a tamdaw konini saw?>> saan cingra a milicay. 7Yo mafana' ci Pilato to nika o makowanay ni Hiroti ko niyaro' ni Yis i, patayraen ningra ci Yis i ci Hirotian. Nawhani ira i Yirusalim ci Hiroti itiya. 8Ma'araw ni Hiroti ci Yis i, salipahak sa cingra. Nawhani namatngilay ningra i 'ayaw ko pakayniay i dmak ni Yis. Saka, halafinto a sapinengnengan cingra ci Yisan. O romasato, cifaloco' cingra to sapinengnengaw to pidmak ni Yis to kafahka'an a dmak. 9Orasaka, adihay ko pilicay ni Hiroti i ci Yisan to masamaamaanay. Nikawrira, caay paca'of ci Yis to maan aca i cingraan. 10Tala'a'ayaw sa ko kakridan no citodongay to ta'ong ato pasifana'ay to Rikec a misa'icel a mipakokot to pakayniay i ci Yisan. 11Lokesen ni Hiroti ato sofitay ningra Cingra a misamsam. Ta pariko'en nangra Cingra to makapahay a kafafang, ta patiko han nangra a patayra ci Pilatoan. 12Nano masasi'adaay ci Hiroti aci Pilato to ha:tiniay. Nikawrira, itiya toya romi'ad a masasinga'ay cangra.

O Pipastek i Patay

(Matay 27.15-26; Maroko 15.6-15; Yohani 18.39--19.16)

13Tahidangen ni Pilato ko kakridan no citodongay to ta'ong ato kakrikridan no niyaro' ato finawlan a misa'opo. 14Sowal sa, <<O misawiay to finawlan konini a tamdaw saan kamo a patayni i takowanan. Nikawrira, liclicen ako cingra i ka'ayaw namo i, awaay a matama ako ko matiyaay o nipakokotan namo a raraw ningra. 15Mahaenay koni Hiroti saka, patikoen ningra i tamiyanan cingra. Awaay ko ccaccay aca a nidmakan ningra a raraw to sapipastekaw niyam cingraan i patay. 16Orasaka, sti' han aca, ta tdalen saan ko harateng ako,>> han ningra.#23.16 Ira ko katlangay a cudad matongal i 17 a tosir To mihcahcaan to Pita'lifan a Lisin i, caay ka ^ca mitdal ci Pilato to ccay a marofoay a pafli i cangraan. (tiri'en i Matay 27.15 ato Maroko 15.6).

18Nikawrira, laccay sa ko finawlan a micli', <<Patayen Cingra! Tdalen ci Parapas a pafli i tamiyanan!>> saan cangra. 19(Ci Parapas i, nano palowaday to rawraw no niyaro' ato mipatayay to tamdaw saka, marofo cingra.)

20Sapitdalan ci Pilato ci Yisan saka, liyawen haca ningra a pasowal ko finawlan. 21Nikawrira, cli' sa cangra, <<Paceken i ciwcika! Paceken i ciwcika!>> saan.

22Somowal ci Pilato i cangraan to sakinatolo, <<O maan ko tatiihay a dmak ningra saw? Awaay a matama ako ko sakapastek ningra i patay a raraw. Saka, sti' han aca, ta tdalen saan ko harateng ako,>> saan.

23Nikawrira, sa'icel sa cangra a micli' a milongoc to sapipacekaw ci Yisan i ciwcika. Saka, malowid no ngiha' nangra ci Pilato. 24Itiya i, do^do hanto ni Pilato ko pikton to nilongocan nangra. 25Ta tdal hanto ningra koya nilongocan no finawlan a parawraway, mipatayay to tamdaw a marofoay, patorod hanto ni Pilato ci Yis i cangraan, namo sato a harateng han ningra.

Mapacek ci Yis i Ciwcika

(Matay 27.32-44; Maroko 15.21-32; Yohani 19.17-27)

26Yo mikrid ko sofitay ci Yisan i, malitmoh nangra ko minokayay nai omahay a talaniyaro'ay ci Simon o Kirini a tamdaw. Rpet han nangra cingra, ta tlien ko ciwcika i 'afala ningra, a papi'orong a papikotod i aikor ni Yis.

27Mitoor i ci Yisan ko 'alomanay a tamdaw. Ira a mihaklong ko masakapotay a fafahiyan. O tomangicay cangra a mararom to pakayniay ci Yisan. 28Sikol sa ci Yis a pasayra toya fafahiyan a somowal, <<Kamo o fafahiyan no Yirusalim, aka ka tomangic to pakayniay i Takowanan. Ka o pakayniay i tireng ato wawa namo ko tangicen. 29Nawhani ano hakowaay a romi'ad i, <O malmeday ko ma'asicay, o caayho ka hofoc ato caayho ka coco no wawa a fafahiyan,> o sasaan ko tamdaw. 30Itiya i, o sasomowal ko tamdamdaw to lotok, <Kacrar a mitadem tamiyanan,> o sasaan cangra. O sasomowal cangra to taporo, <Tahpoen kami,> o sasaan cangra. 31Ano haenen no tamdaw ko dmak to mangta'ay a kilang i, samaan sato ko pidmak to ma'icangay a kilang saw?>> han ni Yis.

32Ira ko roma a nikridan nangra to tatosa a ciraraway a tamdaw. O papakapoten cangra ci Yisan a mipatay. 33Tahira cangra i <<'Okak no Fongoh>> hananay a pala i, itira a paceken nangra i ciwcika ci Yis atoya tatosa a ciraraway, i kawanan Ningra ko ccay, i kawili Ningra ko ccay. [ 34Sowal sa ci Yis, <<Wamaaw, sololen cangra, nawhani mafokil cangra to tatodong no nidmakan nangra,>> saan.]#23.34 Ira ko awaay a matilid i katlangay a cudad konini a i laloma'ay nonini a [ ] a tosir.

Mararitos cangra a misakilac to riko' ni Yis. 35Tomireng ko finawlan a minengneng, katawaen no kakrikridan no Yutaya Cingra, sowal sa, <<Pakapa'orip Cingra to tao. Ano o nipili'an no Kawas a Kristo Cingra i, mamaan a pa'oripen Ningra ko tireng Ningra!>> saan.

36Halosofitay a misamsam i Cingraan. Raod sa cangra i Cingraan a pafli to 'acicimay a ^pah, 37sowal sa, <<Ano o hongti no Yutaya a tamdaw Kiso i, pa'oripen ko tireng Iso!>> saan.

38<<O hongti no Yutaya a tamdaw konini,>> saan ko nitilidan a paya i fafaed ni Yis.

39Oya ccay noya tatosaay a mapacekay i ciwcika a ciraraway a tamdaw, mitongangan ci Yisan, <<Caay ko Kristo Kiso saw? Mamaan a pa'oripen Iso ko tireng Iso, halo kami a pa'oripen!>> han ningra a somowal.

40Nikawrira, kter sa a pasowal koya roma a ccay a tamdaw, <<Malcadayto kita a mapastek i patay i, caay ka ngodo kiso to Kawas saw? 41O hahatinitini aca kita to nano tatodong no dmak ita. Nikawrira, onini a tamdaw i, awaay ko maan aca a tatiihay a dmak Ningra,>> han ningra a mikakter. 42Ta pasowal sa cingra, <<Yisaw, ano malaHongti to Kiso a miliyaw a tayni i, haratengen kako haw,>> han ningra.

43Pasowal sa ci Yis i cingraan, <<So'linen Ako a somowal kiso, anini a romi'ad malakapot kita i kalipahakan,>> han Ningra.

O Patay ni Yis

(Matay 27.45-56; Maroko 15.33-41; Yohani 19.28-30)

44-45Yo i kalahokanto ko toki haw i, malahdaw ko likat no cidal, matahpo no to'man koya hkal a ma^min tangasa i tolo ko toki to hrek no lahok. Malatosa a macinas ko maca'itay a sapala'ed to Fangcalay Pita'ongan a kiradom. 46Satata'ang sa to ngiha' ci Yis a micli', <<Wamaaw patoroden Ako i Tisowanan ko 'adingo Ako!>> saan Cingra a somowal, ta lafot sato ko sla' Ningra.

47Manengneng no kakridan no sofitay konini a dmak i, hmek sa to Kawas a somowal, <<So'linay, o mo^celay a tamdaw Cingra!>> saan.

48Masa'opo ko finawlan to sapinengnengaw tonini a dmak. Ma'araw nangra konini a masamaamaanay a dmak i, mararom cangra. Alapekpekpek to falohang a minokay. 49Polong no mafana'ay ci Yisan a tamdamdaw ato mitooray Cingraan nai Kalili a fafahifahiyan i, tomireng i ra:ay a minengneng tonini a dmak.

O Pitadem ci Yisan

(Matay 27.57-61; Maroko 15.42-47; Yohani 19.38-42)

50Ira ko ccay a tamdaw ci Yosif hananay a lomaocay. O nga'ayay, o mo^celay a tamdaw cingra. 51Onini a tamdaw i, caay pihayda to nisahalakaan ato dmak no lomaocay. O tamdaw no Arimatiya hananay a niyaro' no Yutaya cingra. O hinatalaay cingra to sakalahciaw no pikowan no Kawas. 52Tayra i ci Pilatoan cingra a mingitangit to sapialaaw to tireng ni Yis. 53Saka, ^pod han ningra ko tireng ni Yis a mitafo to nisanga'an to kliw a kiradom, ta tli han ningra ko tireng ni Yis i fa^lohay a nito^to'an a 'ongcoy a tadem, o awaayho ko matademay itira. 54O saka lima namilipay#23.54 lipay -- o no Payrang a sowal. itiya, o mamaraodto ko Pasla'an a Romi'ad.

55O mihaklongay ci Yisan nai Kalili a fafahifahiyan i, mitoor ci Yosifan a tayra, minengneng cangra to tadem ato nika masamaan ko nipipatli to tireng ni Yis. 56Ta nokay sato cangra a mipatala to sapafangsis a aped ato fangsisay a simal.

Pasla'an a Romi'ad i, mado^do nangra ko Rikec a pasla'.

Currently Selected:

Luka 23: AMIS2019

Highlight

Copy