Luka 14

O Piadah ni Yis to Adadaay a Tamdaw

1I ccay a Pasla'an a Romi'ad tayra ci Yis i loma' no ccay a kakridan no Farisay a tamdaw a mikapot a komaen. Itiya i, misa'imer ko papinapina a tamdaw a minengneng ci Yisan. 2Matatama ko nika ira no ccay a mafotosay a tamdaw. 3Licayen ni Yis ko pasifana'ay to Rikec ato Farisay a tamdaw, <<Nga'ayay hakiya, tatiihay hakiya a miadah to adadaay i Pasla'an a Romi'ad?>> han Ningra.

4Trep sa cangra. Tatoy han ni Yis ko kamay noya adadaay a miadah, ta papinokayen Ningra. 5Pasowal sa Cingra i cangraan, <<Ano matfad i tfon ko wawa to fa'inayan, ano ^ca i, o okang no nima namo i, o Pasla'an a Romi'ad anini saka, caay ka nga'ay a tangsol a miala a pasadak, ira ko sanay namo saw?>> han ni Yis.

6Awaay ko sapaca'oca'of nangra tonini a sowal.

O Pisapo^ner to Faloco' ato Pihalhal to Lafang

7Ma'araw ni Yis ko nipipili' no lafang to satadamaanay a kamaro'an saka, patinako han ni Yis cangra a somowal, 8<<Ano matahidang no nima kamo i pitahkaan no pararamoday i, aka ka maro' i satadamaanay a kamaro'an. Nawhani latek ira a matahidang ko ikakaay namo ko nika tadamaan a tamdaw. 9Ano pasowal i tisowanan koya mitahidangay tamowanan a tawki, <Piliyas kiso. O kamaro'an nonini a tamdaw korira,> ano han ningra kiso i, samaan sato ko ngodo iso a maro' i sasafaay a kamaro'an saw? 10Nikawrira, ano matahidang kiso i, kamaro' i sasafaay a kamaro'an. Ta ano ira ko tawki a mitahidangay tisowanan a somowal, <Idangaw, kaitini i tadamaanay a kamaro'an a maro',> ano han ningra kiso i, makahmek kiso i ka'ayaw no mikapotay a mitahka a lafang a ma^min. 11Nawhani o misatakarakaraway a tamdaw i, o mamasapo^ner. O misapo^neray a tamdaw i, o mamapacakat,>> han Ningra.

12Pasowal sa ci Yis toya mitahidangay Cingraan a tawki, <<Ano patala kiso to sakalahok ato sakalafi i, aka pitahidang to widang iso ato salikaka ato malininaay ato cidafongay a fiyaw iso. Ano haenen iso i, latek mitahidang cangra i tisowanan a paco'ay. 13Ano patala kiso to tadamaanay a tahka i, ka o pakoyoc a tamdaw, tatiihay ko tireng, o mapi'iway, o mapohaway a tamdaw ko tatahidangen. 14Ta mapalmed kiso. Nawhani caay pakapaco'ay cangra. Ano o kalomowadanto no mo^celay a tamdaw a ma'orip nai patay i, itiya a mapaco'ay no Kawas kiso,>> han ni Yis.

O Tinako to Tadamaanay a Tahka

(Matay 22.1-10)

15Mitngil tonini a sowal ko ccay no mikapotay ci Yisan a mitahka i, sowal sa, <<Malmeday ko mitahkaay i Kitakit no Kawas,>> han ningra ci Yis.

16Sowal sa ci Yis cingraan, <<Ira ko ccay a patalaay a tamdaw to tadamaanay a tahka, matahidang ningra ko 'alomanay a lafang. 17Yo maraodto ko pitahkaan i, ocoren ningra ko koli a tayra a pasowal to namitahidangan a lafang, <Tatata, mahrekto a mapatala ko maamaan!> han ningra. 18Nikawrira, satapang sa cangra a alapacofacofay. Sowal sa ko saka ccay a tamdaw, <Cakay saho kako to omah saka, o tatayra kako a minengneng. Ma^deng a samaanen, caay ko tatayra kako,> saan. 19Sowal sa ko ccay a tamdaw, <Namicakay kako to lima a ramod#14.19 ramod -- o roma i, raroton (ka'amis). no kolong. O tatayraho kako a milifet tonini. Saka, ma^deng a samaanen. Caay ko mamikapot kako,> saan. 20Sowal sa haca ko roma a tamdaw, <Fa^lohayho kako a ciramod, caay ka nga'ay kako a tayra,> saan.

21<<Nokay sato koya koli a paratoh i tawki ningra tonini a dmak. Kter sato koya tawki no loma'. Ta sowal sa toya koli, <Kalamkamen a tayra i tata'angay a lalan ato mamangay a lalan no niyaro'. Kayaten a patayni ko pakoyocay, tatiihay ko tireng a tamdaw, mapohaway ato mapi'iway,> han ningra. 22Nanoya, sowal sa koya koli, <Tawkiaw, malahcito ako ko sowal iso. Nikawrira, adihayho ko kamaro'an,> han ningra. 23Sowal sa koya tawki i koli, <Olili, katayra haca i kalolalalalan. Patangic han ko i tiraay a tamdaw a mikrid a patayni to saka'alomanaw no lafang i loma' ako,> han ningra. 24Sowalen Ako kamo, oya namitahidangan Ako a tamdamdaw i, awaay ko ccaccay aca nangra a mamitanam to nipatahkaan Ako,>> han ni Yis.

O 'Aca no Mitooray

(Matay 10.37-38)

25Yo ccay a romi'ad, mihaklong ko 'alomanay a finawlan i ci Yisan a romakat. Saka, pasayra sa ci Yis i cangraan a somowal, 26<<O tayniay i Takowanan a tamdaw i, ano caay ka ikaka no nika olah ningra to mama ato ina ato fafahi ato wawa ato salikaka to fa'inayan to fafahiyan ato 'orip no tireng ko nika olah ningra i Takowanan i, caay ka nga'ay a malanisawawaan Ako. 27O caayay pi'orong to ciwcika no tireng a mitoor i Takowanan i, caayay ka nga'ay a malanisawawaan Ako.

28<<Ano cima namo ko sapatirengananay to pikacawan i, misahalakaho cingra a mihapinang to sapatireng a payso. Ma^deng konini a payso hakini saan cingra a misa'osi. 29Ano caay haenen ningra ko dmak i, tado o pipatapang. Ano caay ka lahci i, katawaen no minengnengay a tamdamdaw cingra. 30Sowal asa, <Aya: kora tamdaw. Deng o pisatapang aca ningra a patireng. Caay pakalahci cingra,> saan.

31<<O romasato, ano cimato a hongti, ano sapiloodan to roma a hongti i, misahalakaho cingra a miharateng. Ma^deng hakini ko ccay a 'ofad a sofitay ako a misi'ayaw tora tosa a 'ofad a sofitay nora 'ada a hongti, caay ka saan cingra saw? 32Ano caay ka deng i, yo maraayho koya 'ada a hongti i, o a ocoren ningra ko tarokos a papipasowal to sakalali'ay. 33Malcad tonini, ano cimacimato namo ano caay pifalah to dafong no tireng a ma^min i, caay ka nga'ay a malanisawawaan Ako.

O Awaay ko ^Poc a Cilah

(Matay 5.13; Maroko 9.50)

34<<O nga'ayay ko cilah. Nikawrira, ano malasawad ko kahcid nira i, 35awaayto ko ^poc. Caay ko mamalasra ato mamalahiliw#14.35 hiliw -- tiri'en i Luka 13.8.. Dengto o nika falah i papotal. Kamo o pakatngilay ko tangila a tamdaw i, pitngil!>> han ni Yis.

Currently Selected:

Luka 14: AMIS2019

Highlight

Copy