Dmak 5

Ci Ananiyas aci Sapfira

1Nikawrira, ira ci Ananiyas hananay a tamdaw. Ci Sapfira ko fafahi ningra. Pacakayen nangra ko omah nangra. 2Alaen ni Ananiyas a palanotireng ko pinapina noya 'aca. Oya 'osaw i, patayraen ningra i tarokos. Mafana' ito ko fafahi ningra tonini. 3Nikawrira, pasowal sa ci Pitiro, <<Ananiyasaw, nawiro hai sa kiso a papisafana'en ni Satan ko faloco' iso a papisamangah to Fangcalay 'Adingo a miala a palanotireng to pinapina no 'aca noya omah saw? 4Yo caho ka pacakayen iso koya omah i, o no misoto. Yo mapacakay no miso koya omah i, o no misoto a todong koya 'aca. Nawiro misafaloco' kiso to matiniay a dmak saw? Caay ko tamdaw ko nisamangahan iso. O Kawas ko nisamangahan iso,>> han ningra. 5Mitngil ci Ananiyas tonini a sowal i, polin sato a mapatay. Matngil no tamdamdaw konini a dmak i, tata'ang ko talaw nangra. 6Lowad sato ko kapah a mitafo to horac a tireng ningra. Ta lilid hanto nangra a mipasadak a mitadem.

7Nanoya, mata'lif ko tolo a tatokian i, ira a micomod ko fafahi ningra. Caay ka fanafana' cingra tonini a dmak. 8Pasowal sa ci Pitiro i cingraan, <<Oya nipacakayan namo a omah i, hatiniay ko 'aca haw? Sowalen kako,>> han ningra.

<<Hai, hatiraay ko 'aca noya omah,>> han ningra.

9Saka, pasowal sa ci Pitiro i cingraan, <<Nawiro lalcad sa ko faloco' namo a milifet to 'Adingo no Tapang saw? Nengnengen, irato i fawahan ko namitademay to fa'inay iso. Halo iso a o laliliden nangra a pasadak,>> han ningra. 10Itiya i, fahal sa a mapolin cingra i ka'ayaw ni Pitiro a mapatay. Micomod koya kapah i, ma'araw nangra ko nika patayto ningra saka, lilid hanto nangra a pasadak a mitadem i tatihi no fa'inay ningra. 11Saka, tata'ang ko talaw no kiwkay a ma^min ato romaroma a mitngilay tonini a dmak.

O Kafahka'an a Dmak

12Itiya i, adihay ko nidmakan no tarokos a kafahka'an a dmak i tamdamdaw. Malaccay ko faloco' no mitooray ci Kristoan a ma^min a masa'opo i pangpang ni Solomon hananay. 13Talacowa mangodo mahmek ko finawlan no niyaro' i cangraan, nikawrira, paska a mikapot i cangraan ko romaroma a tamdaw. 14Nikawrira, 'aloman a 'aloman ko mikapotay to sa'opo nangra a paso'linay a mitoor to Tapang a fa'inayan ato fafahiyan. 15Orasaka, liliden no tamdamdaw ko adadaay nangra a patayra i lalan. Halokafoti'an ato sikal a matli nangra. Nga'ay ano mita'lif ci Pitiro i, mapalidolidong ko cimacima, o sanay nangra. 16O romasato, halo i taliyokay no Yirusalim a niyaroaro' a miraod a patayra i ca Pitiroan to adadaay ato mapasemsemay no kaackan a 'adingo. Maadah cangra a ma^min.

O Pikari'ang to Tarokos

17Nikawrira, tata'ang ko 'inap no sakakaay a citodongay to ta'ong ato kapot ningra a ma^min, oya masakapotay a Satukay a tamdaw. Saka, lowad sato cangra 18a mirpet to tarokos a mipacomod i pirofoan. 19Nikawrira, toya lafii i, fawahen no coyoh no Tapang ko sa'def no pirofoan a mikrid i cangraan a pasadak. Sowal sa koya coyoh, 20<<Olili, katayra a tomireng i Fangcalay Pita'ongan. Songila'en ko finawlan a pasowal to pakayniay i saka ci'orip nangra to fa^lohay,>> han ningra. 21Do^do han no tarokos konini a sowal. Yo sakata^ngadanto i, micomod cangra i Fangcalay Pita'ongan a misatapang a pasifana'.

Pasa'opoen no sakakaay a citodongay to ta'ong ato kapot ningra ko polong no kalas no niyaro' no Yutaya a papilaoc. Ta ocoren nangra ko tamdaw i pirofoan a papipasadak a patayni toya tarokos. 22Nikawrira, yo tangasato koya midipangay a tayring i pirofoan i, awaay koya tarokos itira. Saka, patatiko sa cangra a pakafana' tonini i milaocay. 23Sowal sa cangra, <<Yo tayra kami i pirofoan i, masongila' a maciker ko pirofoan. Irato a tomireng i fawahan koya misimaway. Nikawrira, fawah han niyam a minengneng i, awaay ko cimacima i laloma'!>> han nangra. 24Mitngil tonini a sowal ko kakridan no midipangay a tayring no Fangcalay Pita'ongan ato kakrikridan no citodongay to ta'ong i, o mamasamaan konini a dmak hakini saan ko nika rawraw no faloco' nangra to pakayniay tonini a dmak no tarokos. 25Itiya i, ira a tayra ko ccay a tamdaw a pasowal i cangraan, <<Oya nirofoan namo a tamdaw i, ira i Fangcalay Pita'ongan i matini a pasifana' to tamdamdaw!>> saan. 26Orasaka, lahaklong sato a tayra ko kakridan no midipangay a tayring ato mihaklongay a tayring a mikrid toya tarokos. Nikawrira, caay ka ri'angen nangra, nawhani ano haenen ita i, latek tkolen no finawlan kita to fokloh a mipatay saan ko nika talaw nangra.

27Kayat hanto nangra ko tarokos a patireng i ka'ayaw no lomaocay. Saka, liclic hanto no sakakaay a citodongay to ta'ong cangra 28a somowal, <<Akato pakaynien i ngangan ni Yis ko nipipasifana', han kamo a milalang kyami. 'Arawhani, palosiyangen namo konini a sowal a mipakafana' i polong no finawlan no Yirusalim. Onini a tadah no rmes i, o sapa'orongaw namo i tamiyanan to nika patay noya tamdaw!>> han ningra.

29Paca'of sa ci Pitiro ato romaroma a tarokos a somowal, <<Caay ka ^ca o tatooren niyam ko sowal no Kawas. Caay ko tatooren niyam ko sowal no tamdaw. 30Oya nipacekan namo i ciwcika a mipatay ci Yis i, palowaden no nita'ongan no tato'asan ita a Kawas a pa'orip nai patay. 31Pacakaten no Kawas ci Yis a pakamaro' i kawanan Ningra a palaKakridan a palaPa'oripay. Onini i, o sakapasasiyoraw no Israil to faloco' a pasayra i Kawas ta mahpol ko raraw nangra. 32O pawacayay toya dmak kami. Haloya nipaflian no Kawas i mitooray to sowal Ningra a Fangcalay 'Adingo a mipawacay toya dmak,>> han nangra.

33Mitngil ko milaocay i pilaocan tonini a sowal i, rokrok sa ko faloco' nangra a makter. Sapipatayan saan cangra to tarokos. 34Nikawrira, ira ko ccay nangra o lomaocay a Farisay a tamdaw ci Kamalil hananay a kakangodoan no finawlan a pasifana'ay to Rikec. Tireng sa cingra i Pilaocan a somowal to sapacna'aw to tarokos a patalapapotal. 35Ta pasowal sa cingra i lomaocay, <<Kamo o finacadan ako a Israil, ano o sasamaanen namo konini a tamdaw i, pina'on kamo. 36Nawhani i 'ayaw i, ira a tomireng ci Tiutas a misatadamaamaan to tireng. O mihaklongay cingraan a tamdaw i, ma^deng spat a so'ot (400) ko tamdaw. Nikawrira, namapatay no tao cingra i, liwasak sato a ma^min koya mihaklongay cingraan a tamdaw. Awaayto ko ^po^poc noya dmak ningra. 37I ikor nonini yo pisa'osian no kitakit to tamdaw i, ira ci Yuta no Kalili. Kayhiden ningra ko 'alomanay a papitoor cingraan. Nikawrira, patayen no tao cingra. Saka, liwasak sato a ma^min ko mitooray i cingraan a tamdaw. 38Orasaka, sowalen ako kamo i matini, Akato pikihar tonini a tamdaw. Pakonira han cangra. Ano o no tamdawan a nisafaloco'an konini a dmak i, o mamalasawadto. 39Nikawrira, ano nai Kawasay konini a dmak i, caay ko mamafilo namo a mipalasawad konini a dmak nangra. Ano haenen namo i, latek o pacoliay kamo to Kawas,>> han ningra.

Saka, layap hanto no lomaocay ko sowal ni Kamalil. 40Pacomod hanto nangra koya tarokos ta sti' hanto nangra. <<Akato pakaynien i ngangan ni Yis ko nipipasowal,>> han nangra a milalang. Ta tdal hanto nangra cangra. 41Orasaka, salipahak sato ko tarokos a masadak to Pilaocan. Nawhani <<O nisa'osian no Kawas kami to matatodongay a mapakangodo tona mitoor kami ci Yisan,>> saan cangra. 42Saka, ano i Fangcalay Pita'onganto, ano i lomaloma'anto i, mararid cangra to romi'ami'ad a mipasifana', mipatnak to nika o Kristo ci Yis.

Currently Selected:

Dmak 5: AMIS2019

Highlight

Copy