markus 6

asa 6

yecu gwudonyinu nasira

mṯ. 13:53-58, lk. 4:16-30

1nuwalane kamɩrɩgen yono nuwila kamɩrɩgen yuŋun, na calɩmis juŋun gwujane. 2na gwune na lamon le sabiṯ wila nulalɩmi kwu dunu gweḏi elo. na lutu lun ləḏiŋɩni nalobaga ṯuṯ, naleicɩno ŋu gwəri gwapo ŋuɽuna ne ŋeno? ḏilɩŋeḏena ḏɩrṯa ḏun ḏiḏəḏɩlo kəbe nuape ŋɩru ŋun ŋɩbuḏo ŋəwei di de duŋun? 3gwiji kweno gwədu gwun gwaṯɩkade jɩburə gwun gwiro ŋaɽe ŋeḏi mariam, na megin gweḏi yagub na yusi, na yauḏa na simian na? na lɩmegin lun liro la late ləṯilɩje na? nalobɩlkəḏɩni lugwun 4nal yecu eicɩno, nebi gwate gwete gwun gwate gwaṯɩnəji no, namɩni liji leḏi amɩrɩgen yuŋun na lɩmegin na liji leḏi dunu gwuŋun gwate gwaṯɩlnəji no. 5nate nuəṯi ŋɩma gwaɽe ŋɩru ŋɩbuḏo ŋɩnəwei no, numɩni ŋele di gi liji elo kworo lun leḏeḏo nanu nulmiḏi. 6nuobaga ṯuṯ gi gwune ḏɩməṯo ḏagin ḏɩməmɩrṯəḏe.

ŋɩru ŋeḏi duwəjo dun diro di na gwuttən

mṯ. 10:5-15, lk. 9:1-6

nuwele ŋwurgwom ŋwun ŋwɩtiŋwɩti nualɩmiḏe. 7nuləmɩḏe lun liro di na gwuttən naṯulkuwa lɩttən lɩttən. nulḏəḏə ŋelɩnya ŋeḏi dio ḏe ḏiŋeroma, 8nuluməḏɩjo ŋuɽuna nuarno late lanape ŋɩdio ŋede ŋeḏi ṯaṯ no, almɩni ape ṯuwa ṯeice, nalmɩni apa gia no, na gwurəḏo, na əlŋɩrucu giria ge no; 9nalmɩni kaiaje jɩwɩḏia galo ŋwara, nalmɩni kana ŋwugo gwuttən no. 10nueicɩno, dunu gwun gwanyanəḏi jəḏəṯɩl ga kəbe nyanwele. 11na lun late ləmɩnyeje nuajildeŋɩna no, na ḏa nyalmele nyapənyə ḏɩbuɽɩbuɽə galo ŋwara ŋwalo ḏɩteijo ḏe ga lagin. 12nalwele naluməḏɩjo liji alwɩrla ga ŋuɽun ŋagin ŋun ŋɩki, 13nalti ḏiŋeroma dutu, nalwɩrṯi liji lun leḏeḏo nanu lutu ŋila ŋe nalɩmiḏi.

ḏaiya ḏeḏi yuwana mamadan

mṯ. 14:1-12, lk. 9:7-9

14na gwune na gwele gwun gwan ərudus diŋɩni ŋuɽuna ŋeno gi gwune jiri jeḏi yecu lɩŋiḏɩni muma. na liji laṯarno yuwana mamadan gwiro gwun madiɽo gi ḏaiya na ŋiro dino ŋɩmaŋino lugwun ŋɩru ŋɩbuḏo. 15na liji liro kaja laṯarno iliya gwiro na liro kaja laṯarno nebi gwiro gweṯe i gwete gweḏi nebɩŋa. 16na gwune na ərudus diŋɩni nuarno yuwana gwiro gwuŋəno uɽeḏi lɽa galo. ŋu gwiro madiɽo gi ḏaiya.

17namɩni ərudus wəje gwiji numəṯo yuwanaŋ nalgaki kɩrkon gwan ərudiya gwun gwiro gwa gweḏi megin gwan bilibus; gi gwune gwago ərudus, 18gi gwune eico yuwana ərudusŋ no, ŋuɽun ŋeno ŋɩtumuḏu gi ḏaga gwa gweḏi magalo. 19na ərudiya nudonye nuarno gwuɽinye; numɩni ate nuəṯi ŋɩma no, 20gi gwune ərudus gwuḏonyo yuwanaŋ na gwilɩŋiḏi gwiro gwəmɩnyo gwun gwiŋir gwɩpiḏo pɽul, naṯudɩme. na gwune nudiŋɩni nate nulɩŋe gwarre galakwe no, naṯudiŋɩni gwidilo ganu. 21na lamon wila lun liŋir gwune na ərudus ŋele gɩmuri gi lamon lun lilɩŋinu le, nuwəɽeice liji ldu lun luɽun luŋun, na lele leḏi ajana, na liji leḏi amɩrɩgen yun yan jalil lun laṯɩlarno lɩbuḏo. 22na gwune na ŋera ŋeḏi ərudiya nuəḏi nuriṯe nuiŋiri ərudusŋaije dugwore liji le lun lijille ga. na gwele eico ŋeria no, ɽoṯeḏijinyi ŋɩdio ŋun ŋalbunyi ŋaŋalḏəḏə. 23nuərɩmɩjo nueicɩno, ŋɩdi ŋun ŋalɽoṯeḏe lugwi ŋaŋalḏəḏə, nyi gwaŋaḏəḏə ŋelɩnya ŋinyi kɩḏɩriḏ. 24nutu kɩluḏo nueɩco nanaŋ gwuŋun no, nyi gwaɽoṯeḏe aŋe? nueicɩno, eico nyi bunyu lɽa leḏi yuwana mamadan. 25nuəḏi coucou nueico gwelɩnya no, nyi bunyu lɽa leḏi yuwana mamadan gwunnɩno gi sinia elo. 26na gwele rone gi ḏugwor ganu ḏuŋun gworki nuḏe gi ḏərɩmiə na liji lun lijille ga nate nuəṯi ŋɩma gwadonye no. 27na gwele kuwa ajana yete coucou ŋuwele ŋuape lɽa luŋun. nuwele nuɽuḏo lɽa luŋun kɩrkon, 28nuapa lɽa luŋun gi sinia elo nuḏəḏə ŋeria. na ŋera ḏəḏə nanaŋ gwuŋun. 29gwune na calɩmis juŋun ḏiŋɩni, nalwila nalape aŋɩna yuŋun nalkwuri kil.

ḏaɽuwa ḏeḏi duwəjo

mṯ. 14:13-14, lk. 9:10

30na ḏuwəjo nalaɽuwaḏa ldu ḏi yecu, naluməḏɩjo ŋuɽuna wei ŋun ŋarrɩlo na wei ŋun ŋalɩmilo. 31nuleicɩno, wilal nyaŋa cucun kiḏɩwer nyanje ga mɩce. gi gwune liji lutu laṯɩwila namɩni laɽu lele late laṯɩnɩjiga naneʼe ŋɩdio no. 32nalwele murkab gwe kiḏɩwer kaja ŋagin. 33nal liji lutu aŋu lɩmele nallɩŋe naleneḏe ŋwara ŋwe leḏi jɩmɩrɩgen naldarane nalaɽuwaḏe ldu lugwun. 34gwune na yecu duḏə nuaŋu liti lutu nulino gi gwune liro gi joŋol jun jate jəṯi gwaɽa no; nulalɩmi ŋuɽuna ŋutu.

yecu gwiʼi liji lun liro alɩb ṯoḏɩne

mṯ. 14:15-21, lk. 9:11-17, ywn. 6:1-13

35gwune na galo ro garage na calɩmis juŋun wila nuleicɩno, galo ŋiro kiḏɩwer na galo gimele wɽi. 36kuwəḏɩlo alwele gi dɩri na ŋwurgwom ŋwun ŋwujeicɩlo galo aleḏɩla ŋɩdio ŋe ḏiṯa. 37nal yecu uməḏɩjo nuleicɩno, ḏəḏɩlo nyaŋa alʼe. naleicɩno, anawele aneḏɩla gia geḏi jɩnei di analḏəḏə alʼe a? 38nulwɩrlijo ŋuɽuna nuleicɩno, nya ləṯi gia umɩnyo? wiḏɩl nyaŋaḏa. gwune nallɩŋe nalarno go ṯoḏɩne na ŋwumi ŋwɩttən. 39nugele ŋuɽuna lagin nuarno, alijiga wei ŋwudu ŋwudu karom elo gun gigɩlo. 40nalijiga doico ḏuɽi di na ḏuɽi ṯoḏɩne. 41nuape gia ṯoḏɩne na ŋwumi ŋwɩttən, nuŋalaḏe kanyin nueico eloŋu sukran, nubɩleṯɩnya gia ganu, nuḏəḏə calɩmis juŋun nalḏəḏə liji. nulunɩjo ŋwumi ŋwɩttən dino. 42nalʼe wei nalpe. 43nalenyeji jɩḏi dɩ na gwuttən ŋɩdi ŋun ŋiṯɩlɩne ganu ŋeḏi gia na ŋwumi. 44na lun liṯi gia liro alɩb ṯoḏɩne lun liro ləmɩnyo.

yecu gwuwiḏi ŋwara ŋwe gi ḏɩrawe elo

mṯ. 14:22-27, ywn. 6:16-21

45nuremeṯeḏeice calɩmis juŋun naləḏi kwu murkab ganu, naldarane nalmuri kɩməmu geḏi amɩrɩgen yun yan beṯsaida gwune nuwɩreiji liji elo. 46gwune nulwɩreiji elo nuabo gi lɩrgwom elo gwar gwuməḏɩjo eloŋu. 47gagarage murkab gwijo kɩlɩgi ganu gi ḏɩrawe na ŋu gwijɩre ga kwɩnyəm gwetɩdo 48nal yecu aŋu lirtonyɩḏo ŋɩru ŋeḏi ŋwuɽɩ nalakajɩlo ḏɩron, na gɩṯo gala ḏuɽa nuwila lagin ŋwara ŋwe gi ḏɩrawe elo nuarno luldara. 49gwune nalaŋu wiḏi gi ḏɩrawe elo nalarno gumɩḏi ŋiro, naləri gwula. 50gi gwune wei nalaŋu nalubəga, nuluməḏɩjo nuleicɩno, bɩɽiḏɩl nanu. nyi gwiro, ayaḏonyɩḏa no. 51nuwele nuəḏi lagin kwu murkab ganu na ḏɩron ji nyɩkwom, nalobaga ṯuṯ gworki naluməḏɩni ŋwuɽa ganu ŋwagin. 52gi gwune late laḏɩŋano ŋuɽuna ŋeḏi gia no na dugwor dagin dɩbɩɽe.

ḏiŋiriḏa nanu janisaraṯ

mṯ. 14:34-36

53na gwune nalmuri gi ḏɩrawe nalwele kamɩrɩgen yun yan janisaraṯ nalṯuḏɩni murkab kɩməmu elo. 54gwune naltudo kwu murkab, kaja kono na liji lɩŋe. 55naleneḏe gi jɩmɩrɩgen cono wei naṯɩlapa liji lun leḏeḏo nanu jaɽagar je kalo gun gɩdiŋɩnɩlge gwo. 56na galo wei gunwele, ŋwurgwom na gi jɩmɩrɩgen na geḏo ganu, nalḏɩri liji galo gi daṯ elo lun leḏeḏo nanu, naluməḏɩjo nalarno, lulouwɩrico alḏɩmumi ḏiɽil ḏeḏi giria guŋun na wei lun lɩmaḏɩmumi nalmide.

Currently Selected:

markus 6: OTR1966

Highlight

Copy