maṯa 28

asa 28

ḏiḏiɽo gi ḏaiya ḏeḏi yecu

mks. 16:1-18, lk. 24:1-12, ywn. 20:1-10

1na gwune na lamon le sabiṯ ete, na galo ure ganu lamon lun liro lɽa lun ləduji loro kwoɽoṯəɽɩl, na mariam majdaliya na mariam gwun gwiro kaja wila lar laŋu gil. 2na ḏubaga je ḏɩbuḏo, gi gwune gwiji gweḏi kanyin gweḏi gwele gwugwulu kanyin nuwila nudɩɽio gɩḏolia kouwɩr gwunjiga. 3nuaŋini gi ḏɩmana ḏeḏi ŋau na jiria juŋun jɩpiḏo pɽul gi gili. 4na liji lun laṯɩdɩme nalubəga ŋɩḏe ŋe nalro gi liji lun laiyo. 5na gwiji gweḏi kanyin wɩrlijo ŋuɽuna nueico la no, nyaḏonyɩḏa nyaŋa no, nyi gwilɩŋiḏi nya lo libunyu yecuŋ gwun gwuɽinyinu gi luɽi lun lɩmalɩḏo ganu. 6ŋu gwate ŋɩne no; gi gwune gwimaḏiɽi gi gwune əruŋe. wilal nyaŋu gala gun gɩḏɩme gwele; 7nyamɩni wele cou nyuməḏijo calɩmis juŋun nyaleicɩno, ŋu gwimadiɽi gi ḏaiya, na ŋu gwajidara gwele jalil; na ŋɩnəwei gwanyaŋu. eʼe nyi majuməḏɩjo. 8nalabɩre kil cou ŋɩḏe ŋe na ḏidila ḏe dɩbuḏo, naleneḏe nalar luməḏɩjo calɩmis juŋun ŋuɽuna ŋeno. 9nalobeḏe yecuŋale nuleicɩno, nyaliŋir a? nalila nalməṯo ŋwara ŋwuŋun naliḏi gi jei ganu lugwun. 10nal yecu eicɩno, nyaḏonyɩḏa no, wiḏɩl nyuməḏɩjo lɩmagəri alele jalil nalaje linyiaŋu ŋɩnəwei.

11na gaja gun giwiḏɩlge, na ajana kworo yun yaṯɩdɩme gil nalṯɩmi kamɩrɩgen naluməḏɩjo jɩsis jun jɩbuḏo ŋuɽuna wei ŋun ŋɩmila. 12gwune nalaɽuwaḏa ldu luŋaŋale lun luɽun naluməḏəṯe laginŋu ləḏəḏə ajana əlŋɩrucə yutu, 13naleicɩno, eicɩlo no, calɩmis juŋun jɩmila gilio nalape ŋuɽama, na anaŋa anḏɩro. 14na ḏa mudir madiŋɩni ŋuɽuna ŋeno iliḏi nanu ŋwajikədə ga. 15nalape əlŋɩrucə nalarre gi gwune uməḏijilɩne, naṯi liju umə gwan ŋuɽun ŋeno kəbe na gwunne.

yecu maŋini gi ḏuwəjo jalil

16na calɩmis di na gwete nalele jalil gi lɩrgwom lun laŋəjɩlo yecu. 17gwune nalaŋu nalidi gi jei ganu lugwun, namɩni kworo nate nalidəḏɩjo no. 18na yecu wila nuluməḏɩjo nuleicɩno, ŋele wei ŋiminyilḏəḏə kanyin na kɩḏilio. 19wiḏɩl nyaŋa dino, nyaduji liji wei calɩmis leḏi gɩḏilio, nyalbabṯaije gi jiri jeḏi baba, na je ŋaɽe, na je gwuɽɩwə gwun gwɩpiḏo pɽul, 20nyalalɩmi aldɩme ŋuɽuna wei ŋun ŋuməḏijajɩŋe; na eʼe, iləṯɩje ilakje bubruṯ kəbe gaja gun gagi gɩḏilio ṯɩmi.

Currently Selected:

maṯa 28: OTR1966

Highlight

Copy