maṯa 24

asa 24

yecu gwuməḏi ŋuɽuna ŋan ḏɩkeḏa ḏeḏi ḏunu gweḏi elo na gaja gun giṯɩmige gɩḏilio, gwerre ganu ŋate ŋɩmila no

mks. 13:1-27, lk. 21:5-28

1na yecu tu kwu kunu gweḏi elo gwun gwubuḏo, nuar gwele na calɩmis juŋun wila lugwun lar lulaŋijo lɩduno leḏi dunu gweḏi elo gwun gwubuḏo. 2nal yecu wɩrlijo ŋuɽuna nuleicɩno, nyalaŋəḏi ŋɩdio ŋeno wei a? gwerkwe ganu nyi gweiceijɩno, gɩdol ŋate ganje kworo elo ŋun ŋate gaki no.

3na gwune juga gi lɩrgwom elo lun lan seitun, na calɩmis wila lugwun ga kaja naleicɩno, uməḏɩjije ŋuɽuna ŋeno ŋar ŋaje jaḏo? na ŋuɽun ŋɩrṯa ŋəŋino ŋeḏi ḏaɽuwa ḏuŋa, na ḏeḏi gaja gun gɩṯɩmige gɩḏilio? 4nal yecu wɩrlijo ŋuɽuna nuleicɩno, jil muma, gwo gwanyanouwɩrico gwetɩdo gwajɩnḏuji no. 5gi gwune lila lutu jiri je jinyi larno, nyi gwiro kɩrisṯo, nalaliḏuji lutu. 6na nyaləḏiŋɩni dɩrra de na ŋuɽun ŋeḏi dɩrra, aṯaji ḏugwor piḏo ganu no. arram ŋɩdi ŋeno ŋaŋini namɩni ŋeḏi gɩdo ŋore. 7gi gwune liji leḏi amɩrɩgen yete lədiɽo kworo gweḏi amɩrɩgen ŋiro kaja, na ŋele ŋədiɽo ŋele; na jaŋu jaje, na gwɩnyəm gwubəga kalo ŋiro kajakaja. 8na ŋuɽun ŋeno wei ŋiro ŋun ŋidaro ŋəṯi ŋwuɽeḏɩnya.

9na lajiḏəḏə ḏɩḏia ḏe nalajiɽinye, nanyaladonyini gi liji leḏi jɩmɩrɩgen wei gwan jiri jinyi. 10na lobɩlkəḏɩni lutu, na ləḏəḏə gworo kal gete, naṯɩldonyeḏiḏi gworo kal gete; 11na nebɩŋa lədiɽo lutu lun liro lɩwɩɽɩgal, nalaḏuji lutu; 12na gi gwune ŋuɽun ŋun ŋɩki ŋimobəḏəṯɩni, ḏəmɩnyo ḏeḏi lutəno ḏɩmanyidi 13namɩni gwun gwuḏuḏɩnɩjo gɩdoŋ gwəkədəḏɩni ga; 14na ŋuɽun ŋeno ŋiŋir ŋeḏi ŋele ŋeḏi elo ŋuməḏɩni kɩḏilio wei gwan ḏɩteijo ga gi liji leḏi jɩmɩrɩgen wei, na kaja keno gɩṯɩmige gɩḏilio.

15na dino ḏa nyalmaŋu gwaŋe gwun gwaṯɩki duno gweḏi elo gwun gwubuḏo, ŋun ŋarɩŋe ḏaniyal gwun gwiro nebi gwuḏudɩnu kalo gun gipiḏo pɽul, gwun gwəgiri ouwɩrico ŋwulɩŋe, 16na ouwɩricɩlo lun lijo yauḏia alabɩra ŋwurgwom, 17na gwun gwijo kwu dunu elo gwate gwagwuləḏa ga gwanapa ŋɩdio kwu dunu gwuŋun no; 18na gwun gwijo gi ḏɩri ganu gwate gwanaɽuwa gwanapa giria guŋun no. 19na ŋɩki lagin lun lɩgwuli na lun liji nyaɽe ŋan kaja gəwei. 20namɩni uməḏɩjil eloŋu kani nyate nyabɩre ḏoɽom ḏe i lamon le sabiṯ no, 21gi gwune kaja kono ḏɩḏia ḏaje gworki ḏun ḏate ḏɩmanɩɽe ḏiro dino uro kaja gun gigelɩnge gɩḏilio kəbe na gwunnɩno, i ḏate ḏaje minu no. 22na ḏa ŋwamon ŋweno ŋwate ŋwumouɽəne ga no, gwiji gwate gwetɩdo gwankəḏəḏɩni ga no; namɩni lɩmulwəɽəḏɩjo ŋwamon ganu gwan luŋa lun lɩməṯɩnu leḏi elo. 23na kaja kono ḏa gwete majeicɩno, eʼe, kɩrisṯoŋ gwo ŋɩne, i ŋɩnəwei gwo gwanyanidəḏɩjo; 24gi gwune laje lədiɽo lun liro lɩwɩɽɩgal lun larno lan kɩrisṯo, na nebɩŋa lun liro lɩwɩɽɩŋal nalaŋiḏi ḏəŋinio ḏun ḏɩbuḏo gworki na ŋidi ŋun ŋɩmobeje liji ga ṯuṯ, lar laḏuji liji lun lɩməṯɩnu leḏi elo ḏa ŋɩmandro. 25eʼe, nyi majuməḏɩjo ŋuɽuna gwerre ŋate ŋɩmila no. 26na dino na ḏa lɩmajeicɩno, eʼe, ŋu gwo kiḏɩwer, nya lo lətu; i eʼe ŋu gwo gidəno gwe gwo gwanyanidəḏɩjo; 27gi gwune ḏɩmana ḏeḏi ŋau ḏaṯɩduḏə kalo gun gaṯɩn anyin abuḏa na yoɽa ga kalo gun gaṯɩn anyin bɩɽe, na ŋaro dino ḏaɽuwa ḏeḏi ŋaɽe ŋeḏi liji. 28gi gwune ŋalo ŋun gijɩne aŋɩnu yun ŋɩmai, ŋɩnəwei na ŋwibɩrṯa aɽuwaḏa lḏu.

29na cou ḏa ḏɩḏia ḏeḏi ŋwamon ŋweno ḏɩmete na anyin yerimi ganu, na uwə ate nuoɽa ga no, na ŋwudum bɩɽeṯeḏa ga kanyin; na ŋɩma ŋeḏi kanyin ubəga; 30na kaja keno ŋuɽun ŋəŋino ŋeḏi ŋaɽe ŋeḏi liji kanyin, na liji wei leḏi gɩḏilio lapəne gi jabba ganu, nalaŋu ŋaɽe ŋeḏi liji ŋaɽuwa gi jəbɩɽu jeḏi kanyin ŋɩma ŋe na ḏoɽeḏa ḏe ḏutu. 31nuwəjo liji luŋun leḏi kanyin ŋwal ŋwe ŋweḏi burujo gwun gwubuḏo, nalwəɽeice liji luŋun ldu lun lɩməṯɩnu gala ganu kwoɽo geḏi ḏɩron, na gi ḏiɽil ḏeḏi kanyin uro kiɽelo.

arram liji ləṯigirini

mks. 13:28-37, lk. 21:29-36; 17:26-30

32lɩŋiḏɩl ŋuɽuna ŋun ŋɩlɩbo ŋeḏi gwuwɩḏa, gwune na dɩrna duŋun ar daneḏa naligiliḏo, nyalalɩŋe nyalarno ŋwuram ŋwo gɩṯo. 33na ḏino, gwune nyalaŋu ŋɩdio ŋeno wei, lɩŋiḏɩl ŋu gwo gɩṯo kouwɩr. 34gwerkwe ganu, nyi gweiceijɩno, liji leḏi gwunne late lanete no kəbe ŋuɽun ŋeno ŋila wei. 35kanyin na gɩḏilio lete namɩni ŋuɽun ŋeḏi elo ŋate ŋete no.

36na ŋan lamon leno i sa ceno gwiji gwatɩn gwetɩdo gwun gwilɩŋiḏi no, i liji leḏi kanyin, i ŋare, namɩni baba gwetɩdo. 37na gi ŋwamon ŋweḏi nouwa na dino gworo gweḏi ḏaɽuwa ḏeḏi ŋaɽe ŋeḏi liji; 38ŋiro gi gwune ŋwamon ŋwono ŋwun ŋwijo gwerre kaja geḏi gwəri, liji laṯeʼe naṯɩlyu, naṯɩlago naṯɩlagini kəbe gi lamon lun lɩmali nouwa əḏi kwu murkab ganu; 39nate nalɩŋe no kəbe na gwəri wila nulape wei; na dino ŋaro ḏaɽuwa ḏeḏi ŋaɽe ŋeḏi liji. 40na ləmɩnyo lɩttən lijo gi ḏɩri ganu; gwalape gwete na gwanwalane gwete. 41na la lɩttən laje kele gi ḏɩruḏe, gwalape gwete namɩni gwanwalane gwete. 42na ŋiro dino girinɩl, gi gwune nya late lilɩŋiḏi lamon lun lali gwele gwalo wila no. 43namɩni lɩŋiḏɩl dino, ḏa gwele gweḏi dunu gwilɩŋiḏi gaja gun gagi gwuɽam wila gwangirini, na gwate gwanouwɩrico ḏuno gwuŋun gwaŋaro ŋuɽam no. 44na duḏɩl nyaŋa dino nyajiga muma, gi gwune gaja gum ŋate ganyaŋarno ŋaɽe ŋeḏi liji ŋaɽuwa no.

ŋuɽun ŋun ŋɩlɩbo ŋeḏi jaḏam jun jiŋir na jun jɩki

lk. 12:42-46

45əḏi gwiro wainy gwun gwuḏuḏɩnu ga gwəṯi ŋadɩgɩɽenya, gwun ma gwele gwuŋun duji gwele gweḏi lɩdunu luŋun wei aṯulḏəḏə ŋɩdio kaja ŋagin. 46ḏimoreḏa ḏaje ḏi wainy kweno ḏa gwele gwuŋun mila nubuje gwarro dino. 47gwerkwe ganu nyi gweiceijɩno, ŋu gwuduji gwele gweḏi ŋɩdi ŋuŋun wei. 48namɩni ḏa wainy kweno gwun ŋwɩki gwumar gi ḏugwor ganu ḏuŋun no, gwele gwinyi gwajana gɩttən gi ḏaɽuwa ḏuŋun, 49naṯuiḏeije ga gi ḏɩpiḏo lɩwainya lun laṯape ŋɩru kal gete ŋuŋale, naṯɩlʼe naṯɩlyu luŋaŋale lun lɩrləlo, 50na gwele gweḏi wainy kweno gwila gi lamon lun late lɩṯunɩju na kaja ŋun ŋate gilɩŋiḏulo no, 51na gwuɽu, na gwiḏəḏə gala geḏi liji lun ləṯi ŋuɽuna ganu ŋɩttən. na ŋɩnəwei ḏərio gwula ḏaje na ḏiʼino gi jɩŋaḏ.

Currently Selected:

maṯa 24: OTR1966

Highlight

Copy