maṯa 18

asa 18

ḏalɩmia ḏeḏi dujia gwula gwɩti

mks. 9:33-37, lk. 9:46-48

1na kaja kono na calɩmis wila ḏi yecu naleicɩno, əḏi gwiro gwun gwubuṯano ŋele ŋeḏi kanyin? 2na yecu orniḏa ŋaɽe ŋɩti ŋuwila lugwun, nuḏuḏɩneje kɩligi ganu lagin, 3nuleicɩno, gwerkwe ganu, nyi gweiceijɩno, ḏa nya late lɩmawɩrla ga nyalmaro gi nyaɽe nyitinyiti no, nya late ləḏi ŋele ŋeḏi kanyin no. 4na dino gwun gwətiene gwulo gwuŋun gi ŋaɽe ŋeno gwiro gwun gwubuṯano ŋele ŋeḏi kanyin. 5na gwun gwəmɩnyu ŋaɽe ŋetɩdo ŋiro gi ŋeno gwan jiri jinyi gwinyiəmɩnyi.

diminu ga gwan ḏakaja liji lun liro kaja

mks. 9:42-48, lk. 17:1-2

6namɩni gwun gwobɩlkejo ŋete gi nyaɽe nyeno nyun nyiti nyun nyəmɩnyi, ŋwiŋir lugwun ŋukanane ele kwulo gwuŋun yun yɩbuḏo nalgwuwini gi ḏɩrawe gwəḏɩreḏe. 7ŋuɽun ŋɩki kɩḏilio gi gwune ŋuɽun ŋijo ŋe ḏobɩlkeḏɩnə. namɩni arram ŋila, na ŋɩki kwiji gwun gwatɩn ŋuɽun ŋe ḏobɩlkeḏɩnə wila.

8na ḏa ḏi ḏuŋa ḏimaŋobɩlkejo i lara, uɽəḏi ga ŋaḏiwinɩ lugwuŋa. gwiŋir lugwuŋa ŋa gwəḏi gi ḏɩmiḏa ŋa gwiro gɩbɩjo i luḏan, gi gwune aŋan əṯi ŋwara ŋwɩttən i di dɩttən ŋaŋaŋgwuli kigo gi gɩḏilio. 9na ḏa gei guŋa gɩmaŋobilkejo weləḏi ga ŋaguwini lugwuŋa. gwiŋir lugwuŋa ŋa gwəḏi gi ḏɩmiḏa ŋa gwiro gaḏuny gi gwune aŋan əḏi kigo yeḏi jenam ŋa gwəṯi jei jɩttən.

10jil muma ŋate ŋanyanŋələḏəṯɩni ganu ŋete gi nyaɽe nyeno nyun nyoga no, nyi gweiceijɩno, kalo geḏi kanyin liji lagin leḏi kanyin laṯɩdaŋa ga gi jei ganu jeḏi baba gwi gwun gwaṯɩje kanyin. 11gi gwune ŋaɽe ŋeḏi liji ŋɩmila lulbunyi lulkədə ga lun luḏuḏo.

ŋuɽun ŋun ŋɩlɩbo ŋeḏi goŋol gun gɩḏuḏo

lk. 15:3-7

12nyaluməḏɩmu nyalarau? ḏa gwiji məṯi joŋolia ḏuɽi di na ḏa ŋɩmaḏuḏe gete, jate jɩlouwɩrico jun jiro ḏuɽi ṯoḏɩnekwoɽo na ṯoḏɩnekwoɽo ŋwurgwom elo nuwele gubunya gun gɩḏuḏo na? 13na ḏa gɩmubuje, gwugɩdilane ganu gun gɩḏuḏo kworo gwun gwiro ḏuɽi ṯoḏɩnekwoɽo na ṯoḏɩnekwoɽo jun jate jɩḏuḏo no. 14na ŋiro ḏino ŋate ŋiro ŋuɽun ŋun ŋɩbunyɩlo baba gwi gwun gwaṯɩje kanyin, ŋete gi nyaɽe nyeno nyun nyoga ŋai no.

galakwe gwaro gi liji lun lɩki

lk. 17:3

15na dino ḏa məgalo mape ŋɩdio ŋɩki lugwuŋa, wiḏi lugwun nyuməḏɩjo ŋuɽuna ŋuŋun ŋun ŋɩki berene. na ḏa maŋaḏiŋɩnə maro magalo mɩna. 16namɩni ḏa gwate maŋaḏiŋɩna no, nyamɩni wele nyangwoḏene gwiji gwete i lɩttən, kəni a ŋuɽun ḏuḏɩni ga ḏɩteɩjo ga ḏe luŋa lun liro lɩttən i ṯəɽɩl. 17na ḏa gwate majidiŋɩna no, uməḏɩjil liji leḏi kɩniso; namɩni ḏa gwate madiŋɩna liji leḏi kɩniso no, ouwɩricil ŋuro lugwuŋa gi gwiji gwun gwiro ga dino na gwete gwun gwaṯɩmeje ṯulba.

18gwerkwe ganu nyi gweiceijɩno, ŋun ŋanyalgaki ga kɩḏilio ŋaje ŋigəkɩni kanyin, na ŋun ŋanyalkədə ga kɩḏilio ŋaje ŋɩkəḏədɩni ga kanyin.

ḏaɽuwaḏa ldu ḏe ḏuməḏɩjo eloŋu

19na gwerkwe ganu nyi gweiceijɩno dino, na ḏa lɩttən ŋɩmaga lagaloŋu lɩmuməḏəṯe ga kɩḏilio gwan ŋuɽun ŋəḏi ŋun ŋɩɽoṯəḏɩlo, ŋalil baba gwinyi ərrɩjo gwun gwaṯɩje kanyin. 20gi gwune ḏa lɩmaɽuwaḏa idu lɩttən i ṯəɽɩl jiri je jinyi na ŋɩnəwei nyi gwaje kɩlɩgi ganu lagin.

arram ŋanje ŋan ḏɩḏuḏa ŋuɽun ganu ŋun ŋiki, na ŋuɽun ŋun ŋilibo ŋeḏi gaḏam gun gate gaṯar sukran no

lk. 17:4

21na buṯrus wila lugwun nueicɩno, gwele gwi, ŋwamon umɩnyo ḏa magəri minyiəpijo ŋuɽuna ŋun ŋɩki ŋamɩni ḏuḏɩjo ganu? ŋwamon ganu kwoɽoṯəɽɩl a? 22na yecu eicɩno, nyi gwate gwaŋeico ŋwamon ganu kwoɽoṯəɽɩl no, namɩni kabe ŋwamon ganu ḏuɽi kwoɽoṯəɽɩl ŋwamon ganu kwoɽoṯəɽɩl.

23na dino ŋele ŋeḏi kanyin ŋiro gi gwele gwete gwar gwalḏuɽə lɩwainya le luŋun. 24na gwune nuiḏeije ga gi ḏiḏuɽəḏo, nalgwuloḏa gwete gwun gwəṯi gəmɩju jɩnei alɩb di. 25na gi gwune ŋate ŋəṯulo ŋun ŋulwəɽɩjo gəmɩju no, na gwele gwuŋun umə aleḏɩla ŋu, na gwa gwuŋun na nyaɽe nyuŋun, na ŋɩdi wei ŋun ŋəṯulo ŋulgele kəmɩju. 26na dino na wainy idi gi jei ganu lugwun nueicɩno, məṯi ḏugwore lugwi na nyi ŋaŋalwəɽəṯɩjo wei. 27na gwele ino wainya kweno nukədə ga, nulḏuḏɩjo gəmɩju ganu wutiwuti. 28namɩni wainy kweno tuḏə nubuje gwete gi lɩwainy lun laṯəpe ŋɩru kal gete gwəṯi gəmɩju lugwun jɩnei ṯoḏɩne. numəṯo nugwulo kwulo nueicɩno, wəɽɩjinyi gəmɩju gun gəṯo. 29na wainy kweno gwun gwaṯape ŋɩru kal geṯe nuculɩjo galo ŋwurko ŋwe, nuɽoṯəḏɩjo gworki nueicɩno, məṯi ḏugwore lugwi na nyi ŋaŋnlwəɽəṯɩjo wei. 30nate nuəmɩnyi no numɩni wele nugele kɩrkon kəbe nuwəɽəṯɩjo gəmɩju. 31na lɩwainy aŋu lun laṯape ŋɩru kal geṯe, nalrone gworki, nalwila naluməḏɩjo gwelɩnya gwagin wei ŋun ŋərrine. 32na gwele gwuŋun nuorniḏe nueicɩno, ŋa wainy gwun gwɩki, nyi maŋaḏuḏɩjo gəmɩju keno wei gi gwune gwuɽoṯeḏo lugwi. 33na ŋate ŋiŋir ḏa ŋa dino ŋəmɩno wainya gwun gwaṯɩlape ŋɩru kal gete, gi gwune inəḏaŋa na? 34na gwele gwuŋun ɽe ganu nulḏəḏə gi liji lun laṯɩdɩme kɩrkona lun laṯɩpi liji, kəbe nuwəɽəṯɩjo gəmɩju wei gun gəṯu. 35na ŋiro dino baba gwinyi gwun gwaṯɩje kanyin gwajərrɩjo lagalo, ḏa nyaŋa gi dugwor ganu dalo gwete gwete ŋate ŋanyanḏuḏijo magalo ganu ŋuɽun ŋun ŋɩki no.

Currently Selected:

maṯa 18: OTR1966

Highlight

Copy