luka 8

asa 8

la lun laṯapijo yecuŋ ŋɩru

1na ŋɩno gɩdo naṯuwewele gi jɩmɩrɩgen na ŋwurgwom naṯuuməḏɩjo naṯualɩmiḏe ŋuɽuna ŋiŋir ŋeḏi ŋele ŋeḏi elo. na lijo calɩmis je jun jiro di na gwuttən, 2na la kworo lun lɩmunŋele muma ḏiŋerom na ŋɩɽainy, gwete gwan mariam majdaliyi gwun man ḏiŋerom du ganu kwoɽoṯəɽɩl, 3na yuna gwun gwiro gwi gweḏi kwusi gwun gwiro wəkil gweḏi ərudus, na susana na lun liro kaja lutu lun gwaṯɩlŋelejo uwə ŋɩdi ŋe ŋagin.

ŋuɽun ŋun ŋɩlɩbo ŋeḏi gwiji gwe ḏɩri

mṯ. 13:1-23, mks. 4:1-20

4ni gwune na liji aɽuwaḏa ldu lutu lun lɩweləḏi lugwun gi jɩmɩrɩgen wei nuluməḏɩjo ŋuɽuna ŋun ŋɩlɩbo. 5gwiji gwe ḏɩri mədu gi ḏauuna ŋwon ŋwe. gwune auunu ŋwe na kworo iḏeḏe gi ṯaṯ elo nalduṯini, nal nyiɽuwə nyeḏi kanyin e. 6na ŋwon kworo ideḏe kɩdol elo, na gwune nalobɩḏa naluḏe gi gwune ŋwate ŋwəṯi gala gorɩwa no. 7na kworo ideḏe gi jugi ganu nalboḏeḏe jugiŋale nal jugi ɽikəje ŋwuɽa. 8na kworo ideḏe kwɩnyəm ganu gwun gwiŋir, nalobɩḏa nallɩŋe nyaɽe nyiŋir nyibuḏo. na kaja gun gijuge gi ḏuməḏo dino nuəmɩḏe nuarno. gwun gwəṯi nəni neḏi diŋɩna, ŋwudiŋɩni.

9na calɩmis juŋun ɽoṯəḏɩjo ŋan ŋuɽun ŋeno ŋun ŋɩlɩbo, 10nuleicɩno, ŋɩmajilḏəḏə nyalɩŋe ŋuɽuna ŋeḏi ŋele ŋeḏi elo ŋun ŋɩlɩbo, namɩni lun lɩṯanu ŋagin ŋiro ŋun ŋɩlɩbo, gi gwune naṯɩldiḏɩŋa ga nate nalaŋu no, naṯɩldiŋɩni nalmɩni ate nalilɩŋe no. 11na ŋuɽun ŋun ŋɩlɩbo ŋiro dino: ŋwon ŋwiro ŋuɽun ŋeḏi elo. 12na lun lijo gi ṯaṯ elo liro lun ŋaṯɩlidiŋɩni, na iblis wila nuəbɩri ŋuɽuna gi dugwor ganu dagin, kani ate aləmɩnyi alkədəḏɩni ga no. 13na lun lijo kɩdol elo liro luŋa ḏa lɩmadiŋɩni ŋuɽuna, nalɩməṯo ḏidila ḏe ganu, nate naṯɩləṯi dro no; naləmɩnyi kaja giti, namɩni gaja ge ḏɩḏeijo nalobɩlkəḏɩni. 14na ŋwun ŋwideḏo gi jugi ganu ŋwiro luŋa lun laṯɩdiŋɩni, na ḏa lɩmawele nal ŋuɽun ŋe ḏɩmiḏi ṯeno ɽikəje, na dutiḏo ŋɩdio na ŋuɽun ŋun ŋaṯɩliŋiri ŋeḏi gɩḏilio, nate nallɩŋe nyaɽe muma no. 15na ŋwun gwijo kwɩnyəm ganu gwun gwiŋir ŋwiro luŋa lun lɩmadiŋɩni ŋuɽuna, nalɩməṯeḏo gi dugwor ganu dun diŋir gworki nalallɩŋe nyaɽe ḏɩməṯo ḏe dugwor.

ḏalɩmia ḏeḏi lambə

mks. 4:21-25

16na gwiji gwate gwoudeije lambə nukɩɽɩbə ga kiḏi ganu no, i nugele kajagar ganu no, namɩni lugele kalo ge ḏoɽeḏa ga kani liji lun lar ləḏio alaŋaḏa bure. 17na ŋate ŋun ŋɩlɩbiḏɩnu ŋun ŋate ŋaŋini no, na ŋɩkiɽɩbəḏɩnu ŋun ŋate ŋalɩŋiḏini na ŋaɽeleḏini no. 18na ŋiro dino jil muma nyalər ləḏiŋɩni aŋe; gi gwune gwun ŋəṯulo ŋulḏəḏə, na gwun ŋate ŋəṯulo no na ŋun ŋɩbunyulo ŋar ŋulape lugwun.

ŋɩmaga ŋun ŋiro gwerkwe

mṯ. 12:46-50, mks. 3:31-35

19na nana gwuŋun wila lugwun na lɩmegin, nate naləṯi ŋɩma lila lugwun no gi gwune liji lutu. 20naluməḏɩjo naleicɩno, nana gwuŋa na lɩmagalo lo lɩḏuḏɩnu kɩluḏo lar laŋaŋu. 21nulwɩrlijo ŋuɽuna nuleicɩno, nana gwi na lɩmagəri liro lun laṯɩdiŋɩm ŋuɽuna ŋeḏi elo nalɩduji.

yecu gwuḏuḏɩni ḏironia nyɩkwom

mṯ. 8:23-27, mks. 4:35-41

22na lamon lete ŋu na calɩmis juŋun naləḏi kwu murkab ganu. nuleicɩno, ilmuri kɩməmu ŋun ŋiro kaja geḏi lɩbu. nalwele. 23na gi gwune jilo gi ḏiwila nuḏɩre. na ḏɩron wila gworki gi lɩbu elo, na ŋau enyeḏe, nalje gɩṯo gi ḏaiya. 24nalwila lugwun naldiɽio naleicɩno, gwele gwəri, gwele gwəri, ilar lai. nudiɽo nugireṯɩnya ḏɩronia na ŋau ŋun ŋərɩl ḏɩron; nalouwiḏe ga nalje nyɩkwom. 25nuluməḏɩjo nuleicɩno, ḏɩməṯo ḏalo ḏaḏa? naldonye nalobaga ṯuṯ, naluməḏəṯe nalarno, iyo kweno gwiro aŋe? gəko nugele ŋuɽuna gi ḏɩron dino na ŋau, naləṯeɩjo nəni.

yecu gwuḏi ḏiŋeroma kwiji gweḏi jaḏarin

mṯ. 8:28-34, mks. 5:1-20

26nalṯɩmi kamɩrɩgen yeḏi lijɩrgisin yun yijo kɩɽelo jalil. 27na gwune nudu ga kwɩnyəm elo, nalobeḏeṯe gwəmɩnyo gwe gweḏi amɩrɩgen, gwəṯi ḏiŋeroma kaja gwola ganu, na gwate gwatɩnkani jiria no, na gwate gwanje kwu dunu no namɩni gwaṯɩje kalo geḏi nil. 28na gwune nuaŋu yecuŋ nuəri gwula nuiḏi gi jei ganu lugwun, nuuməḏɩjo ŋwal ŋwɩbuḏo, a gwar i gwada ŋa yecu ŋaɽe ŋeḏi elo gwun gwolenelo? nyi gwo gwuɽoṯeḏo lugwuŋa cagi aṯɩŋwigwurṯɩmɩnio no. 29gi gwune nugele ŋuɽuna gi ḏiŋerom nuarno ḏədu kwiji. gi gwune ŋwamon ganu ŋwutu gwiməṯu, naṯɩldɩme gwukanano ga ajirɩjir ye na jalbaja, naṯulḏa ganu ŋun ŋɩkaiilŋe, naṯi ḏiŋerom ireije kiḏɩwer. 30na yecu ɽoṯəḏɩjo nueicɩno, ŋa gwan əḏi? nueicɩno, jutu ganu; gi gwune ḏiŋerom dutu dəḏi lugwun. 31nalɽoṯəḏe lugwun gworki gwo gwagele ŋuɽuna luldeije kalo gun gwola ganu. 32na ŋɩnəwei juḏur jijo jutu jiṯi ga gi lɩrgwom elo. nalɽoṯeḏe lugwun gworki lulouwɩrico nalɩnəḏi ganu. nulouwɩrico. 33na ḏiŋerom du kwiji ganu naləḏi gi juḏur ganu, nalriḏe lɩrgwoma nanu nalouṯaḏe gi lɩbu nalḏɩreḏe. 34na gwune na laɽa aŋu ŋuɽuna ŋun ŋɩmila nalabɩre; nalwele nalwɩreji ŋuɽuna elo kamɩrɩgen na ŋwurgwom ganu. 35na liji duḏo lar laŋu ŋuɽuna ŋun ŋɩmila. nalwila ḏi yecu, nalbuje gwiji gwun gwuman ḏiŋerom du ganu, gwukanu na gwəṯi ŋadɩgɩɽenya ŋiŋir gwijiga ŋwara ganu ŋweḏi yecu, naldonye. 36naluməḏɩjo dino lun gwaŋəḏɩlo galakwe gwugelɩnu muma gwun gwəṯi ḏiŋeroma. 37nalɽoṯeḏe lugwun wei leḏi ŋwurgwom ŋweḏi lijaḏərin nalarno gwele lagin, gi gwune lɩmal ŋɩḏe e gworki. nuəḏi kwu murkab ganu nuaɽuwe. 38namɩni gwiji gwun gwuduŋɩne ḏiŋeroma ganu nuɽoṯeḏe lugwun gworki nuarno gwalgwije. namɩni yecu kuwa nueicɩno, 39aɽuwəḏi dunu lugwuŋa ŋumə ŋuɽuna ŋun ŋɩmagal elo ərrɩjo. nuwele nuluməḏɩjo kamɩrɩgen wei ŋun ŋɩmal yecu ərrɩjo.

ḏidiɽo gi ḏaiya ḏeḏi ŋaɽe ŋeḏi yairus, na ḏiŋiriḏa nanu ḏeḏi gwa gwun gwaṯarṯo ŋuwəno

mṯ. 9:18-26, mks. 5:21-43

40na gwune na yecu aɽuwa nalobeḏeṯe liji le lutu gi gwune luŋa wei gwuḏuḏɩnijɩlo. 41na gwəmɩnyo wila gwun gwan yairus; na gwiro gwele gweḏi dunu gweḏi elo, nuiḏi ŋwara ganu ŋweḏi yecu nuɽoṯeḏe lugwun gworki gwawila dunu lugwun, 42gi gwune gwəṯi ŋaɽe ŋetɩḏo ŋun ŋiro gwa ŋaro jɩḏilio di na gwuttən ca, na ŋijo gɩṯo ŋar ŋai. na gi gwune nuar gwele na liji lutu upi nanu. 43na gwa gwete je gwaṯarṯo ŋuwəno jɩḏilio di na gwuttən, na gwimaḏəḏeice ŋɩdio ŋuŋun wei ŋwakim, numɩni ate nuəṯi ŋɩma gwanmiḏe gi lakim letɩdo lagin no, 44nuwila gi ḏuɽo ganu lugwun, nuḏɩmumi ḏiɽil ḏeḏi giria guŋun, na cou na ŋuwən ḏuḏɩni. 45na yecu arno, əḏi gwiro gwiḏɩmumi nanu? na gwune nalde wei, na buṯrus na liji lun lijille naleicɩno, gwele gwəri, liji lutu liro gwoginyejaŋa nalupiaŋa nanu, namɩni arno, əḏi gwiro gwiḏɩmumi nanu? 46na yecu eicɩno, gwete miḏɩmumi nanu; gi gwune nyi malɩŋene ganu ŋɩma mədu lugwi. 47gwune na gwa aŋu gwate gwəṯi ŋɩma gwalɩbe no, nuwila gwubəga nuiḏi ŋwara ganu ŋwuŋun. nuuməḏɩjo gi jei ganu jeḏi liji wei ŋuɽun ŋe ŋun ŋiḏɩmumuŋe nanu na galakwe gwumagelini muma cou. 48nueicɩno, gwa, ḏɩməṯo ḏuŋa ḏimaŋaŋele muma. wiḏi ḏouwɩɽiḏa ḏe.

49na gi gwune ju gi ḏuməḏo, nuwila gwete gweḏi gwele gweḏi dunu gweḏi elo nueicɩno, ŋaɽe ŋuŋa ŋɩmai. ŋagerija mualɩm ga no. 50na yecu diŋɩni nuwɩrlijo ŋuɽuna nueicɩno, ŋaḏonyɩḏa no, əmɩnyu mino naŋəmɩḏe. 51na gwune nalwila dunu, nate nunouwɩrico gwete gwəḏi gɩḏəno no, numɩni ouwɩrico buṯrusŋ na yagub na yuwana, na baba gweḏi ŋaɽe na nana gwuŋun kuwei. 52na liji wei nalərɩḏo naṯɩlpəne gi jabba ganu. nuleicɩno, nyərio gwula no, ŋate ŋaiyo no, namɩni ŋɩḏɩro. 53nalaki jumo, lilɩŋiḏi muma ŋɩmai. 54numəṯo ḏi ḏe ḏuŋun nuəmɩḏe nueicɩno, ŋaɽe ŋe, diɽu. 55na gwuɽɩwə gwuŋun aɽuwa, nudiɽo cou; nugele ŋuɽuna ŋalḏəḏə ŋɩdio ŋe ḏiṯa. 56na babaŋa nana gwuŋun gwe nalobaga ṯuṯ numɩni ŋele ŋuɽuna lo lanuməḏɩjo gwiji ŋuɽuna ŋun ŋɩmila.

Currently Selected:

luka 8: OTR1966

Highlight

Copy