luka 6

asa 6

ḏidɩmino ḏeḏi lamon le sabiṯ

mṯ. 12:1-14, mks. 2:23—3:6

1na gi lamon lete le sabiṯ nalwele gi dɩri ganu, na calɩmis juŋun nalakɩre ŋwona nalmururinyi di de dagin naleʼe. 2na lɩbarɩsi eico kworo no, gwudaro gəko ŋaṯɩlarre ŋun ŋɩtumuḏu gi lamon le sabiṯ? 3nai yecu wɩrlijo ŋuɽuna nuieicɩno, nya late legiri ŋuɽuna ŋun ŋarrilo ḏauuḏ na? gi gwune iṯi jaŋu na liji lun lijille 4nuəḏi kwu dunu gweḏi elo, nuape gia gun gaṯɩlgegile, nuʼe nuḏəḏə liji lun lijille dino, gun gitumuḏu gi liji namɩni gaṯi jɩsis e cucun. 5nuleicɩno, ŋaɽe ŋeḏi liji ŋiro gwele gweḏi sabiṯ.

6na dino gi lamon le sabiṯ gɩdo nuəḏi kwu dunu gweḏi elo nualɩmiḏe. na gwəmɩnyo je gwun gwoḏeḏo ḏi elo ḏun ḏiro ḏiŋir. 7na jalgaṯɩm na lɩbarɩsi nanaŋalaḏe gwəri gwuŋele muma gi lamon le sabiṯ, kani albuje ŋuɽun ŋun ŋalŋicɩgi. 8namɩni ŋu nulɩŋe ḏuməḏɩno ḏagin nueico gwəmɩnyəŋe gwun gwoḏeḏo ḏi elo no, diɽu, ŋaḏuḏɩni kɩlɩgi ganu. nudiɽi nuḏuḏɩni. 9nal yecu eicɩno, nyi gwajiɽoṯəḏɩjo galo ŋuɽun ŋe ŋete, nyaŋa larno ŋuɽun ŋɩrṯa ŋiŋir ŋilape gi lamon le sabiṯ? ilape ŋɩru ŋiŋir i ŋɩki, ilmiḏi i ilɽinye a? 10nuniŋələḏəṯɩni ganu wei nueico gwəmɩnyəŋe no, wali ḏi ḏuŋa ganu. nunarre dino, na ḏi ḏuŋun nuaɽuwaḏe muma. 11na luŋa nalenyeḏe ḏɩɽeḏiḏia ganu cicer, naluməḏeṯe laginŋu nalarno lao larre ŋuɽuna ŋɩrṯa yecu gwe.

duwəjo dun diro di na gwuttən

mṯ. 10:1-4, mks. 3:13-19

12ni ŋwamon ŋwono oudu nuwele gi lɩrgwom elo gi ḏuməḏɩjo eloŋu nuṯɩmi gilioŋ gi ḏuməḏɩjo eloŋu. 13gwune na galo uɽe nuəmɩḏe calɩmis juŋun, nulməṯo kworo jun jiro di na gwuttən jun jiḏəḏɩlo jiri jan duwəjo dino. 14simian gwun gwiḏəḏi jiri jan buṯrus, na megin gwan anḏarawus, na yagub na yuwana, na bilibus na barṯalmawos, 15na maṯa na ṯoma, na yagub ŋaɽe ŋeḏi alba, na simian gwun gwaṯɩleico gwigiyur, 16na yauḏa ŋaɽe ŋeḏi yagub, na yauḏa iskariyuṯi gwun gwumaro gwuŋa. 17nalgwuli nalḏuḏɩni ga kalo gun guwɩra ga. na liji lutu lun liro calɩmis juŋun, na lutu gworki lun liro kaja gi liji leḏi yauḏia wei na urucəlim, na gi diɽil de ḏɩrawe ḏeḏi sur na saida, lun lɩwiḏi lar gwaldeŋɩnejo nulgele muma ŋɩɽainy ŋagin, 18na lun laṯɩl ḏiŋerom apijo ŋwuɽedɩnya; naṯuliŋiri nanu. 19na liji wei nalbunyi gwalḏɩmumi nanu, gi gwune ŋɩma ŋaṯɩduḏo lugwun laṯulmiḏi wei.

ḏɩmoreḏa na ŋuɽun ŋun ŋɩbɩɽe

mṯ. 5:1-12

20nuabuje jei juŋun elo gi calɩmis juŋun nuarno, ḏɩmoreḏa ḏaje lagalo lun late ləṯi ŋɩdio no, gi gwune nyaləṯi ŋelɩnya ŋeḏi elo. 21ḏɩmoreḏa ḏaje lagalo lun liṯɩlo jaŋu gwunnɩno, gi gwune nyalape. ḏɩmoreḏa ḏaje lagalo lun ləri gwula gwunnɩno gi gwune nya laje laki jumo. 22ḏɩmoreḏa ḏaje lagalo ḏa liji lɩmajidonye na ḏa lɩmajidəje kaja, na lɩmajiḏene, na lɩmade jiri jalo gi lun lɩki gwan ŋaɽe ŋeḏi liji. 23diliḏil ganu gi lamon leno nyaḏɩrṯaḏelo; na eʼe gaia galo giŋir gworki kinyin; lɩgwumən lagin lərrɩne nebɩŋaije dino. 24namɩni ŋɩki lagalo nyaŋa lun ləṯi ŋɩdio ŋutu, gi gwune ŋɩmanyalape gi ḏariḏa ga ḏalo. 25namɩni ŋɩki lagalo nyaŋa lun lipe gwunnɩno, gi gwune nya laje laji jaŋu, ni ŋɩki lagalo nyaŋa lun laki jumo gwunnɩno, gi gwune nya laje larone na ləri gwula. 26na ŋɩki lagalo ḏa liji lɩmarno wei nyaŋa liŋir. lɩgwumən lagin lerrɩne nebɩŋaije liro lɩwɩɽɩgal dino.

ḏəmɩnyo gi liji lun lɩkiḏiḏile

mṯ. 5:38-48

27namɩni nyi gweiceijɩno nyaŋa lun lɩḏiŋɩnu, aṯanyaləmɩnyi lun lɩkiḏiḏianyale, naṯanyalərrɩjo muma lun laṯajidonye, 28aṯanyaliŋiriḏi lun laṯajiḏene, uyuməḏəṯɩjo eloŋu gwan luŋa lun laṯajiḏi ganu. 29na gwun gwaŋamɩɽi kirel, wɩrlijo gun giṯaou dino. na gwun gwaɽe lugə luŋa gwo gwadonye panila gwe gwuŋa dino. 30na gwun gwaŋaɽoṯəḏɩjo ḏəḏi, na ḏa ŋɩmulape ŋun ŋijo lugwuŋa namɩni ŋo ŋalɽoṯeḏe. 31na ŋun ŋaṯanyaləmɩnyi nanyarno ŋajil liji ərrɩjo, dujilo nyaŋa dino lagin. 32na ḏa lɩmaṯanyaləmɩnyi lun laṯajəmɩnyi nyaləṯi ŋuɽuna ŋiŋir ḏi elo a? namɩni lun lɩki laṯəmɩnyi lun laṯɩləmɩnyi. 33na ḏa ŋɩmaṯanyalarre ŋiŋir lun ŋaṯajilɩnərrɩjo ŋiŋir nyaləṯi ŋuɽuna ŋiŋir ḏi elo a? gi gwune lun lɩki dino ŋaṯɩlɩnarre dino. 34na ḏa nyalmaḏəḏə gwiji ŋɩdio ŋədi ki nyalmaḏuḏɩnijo gəmɩju gwajiwərɩjo nyaləṯi ŋuɽuna ŋiŋir ḏi elo a? gi gwune liji lun lɩki dino laṯɩḏəḏə gworo ŋɩdio nalaḏuḏɩnijo gəmɩju ŋaliliwəɽɩjo. 35aṯanyalmɩni əmɩnyi lun lɩkiḏiḏianyale naṯanyalərrɩjo muma, na nyalḏəḏə ŋo ŋanyalḏuḏɩnɩjo ŋajilwəɽɩjo; na ŋɩdi ŋalo ŋɩbuḏo gworki, na nyalaro nyaɽe nyeḏi gwun gwolenelo, gi gwune gwiŋir ḏi luŋa lun late laṯaḏɩŋane eloŋu no na lun lɩki. 36əṯɩl ŋino gi gwune baba gwalo dino gwəṯi ŋino.

ḏakɩmia liji lun liro kaja

mṯ. 7:1-5

37aṯanyakɩmiḏa no na aṯanyakɩmino no. əṯanyalḏuḏɩjo ganu nalajiḏuḏɩjo ganu. 38ḏəḏɩlo lajiḏəḏə; əlmɩḏ yun yiŋir yigwugiləḏɩnu yikədeḏəṯɩnu muma, yiḏidurṯa ga ŋwajilḏəḏə jiria je jalo; gi gwune əlmɩḏ yun yaṯanyayuni yaje yajilwəɽəṯɩjo.

39nuluməḏɩjo ŋuɽuna ŋun ŋɩlɩbo dino, gwiji gwun gwɩrimə gi jei gwəṯi ŋɩma gwagwulo gworo gwun gwɩrimə gi jei a? late lideḏe luŋa berene gi lɩbuɽul na? 40ṯalɩmis ḏate ḏɩbuṯano gi mualɩm gwuŋun no; namɩni calɩmis wei jun jimalɩmini nalro gi lɩmualɩm lagin. p 41gwudaro gəko aṯaŋalaḏe kacɩder gun gijo kei geḏi magalo, namɩni ḏuɽi ḏun ḏijo kei guŋa nate ŋaŋaŋu no? 42namɩni galakwe ŋəṯi ŋɩma ŋeico magalo no, magəri, ouwɩriciŋi ŋaŋawala gacɩdera kei guŋa, namɩni ŋa ŋate ŋanaŋu ḏuɽi ḏun ḏijo kei guŋa no? ŋa kwe gwun gwəṯi ŋuɽuna ganu ŋɩttən, di gwerre ganu ḏuɽi ḏun ḏijo kei guŋa kəbe naŋadaŋa ga muma, ŋa gwəṯi ŋɩma ŋa gwawala magalo gacɩḏera gun gijo kei guŋun.

43gwaɽe gwun gwiŋir gwate gwaṯɩɽe nyaɽe nyun nŋɩki no; na gwaɽe gwun gwɩki gwate gwaṯɩɽe nyaɽe nyun nyiŋir no. 44jaɽe wei jəṯɩlɩŋeni nyaɽe nyagin. na liji late ləṯi ŋɩma lawone ŋwuwɩḏa gi jugi no, i alwone nyaɽe gi ŋwuɽuṯ gi lijibu no. 45gwiji gwun gwiŋir gwaṯɩdi ŋɩdio ŋun ŋiŋir ŋun ŋaṯɩje gi ḏugwor ganu ḏuŋun, na gwiji gwun gwɩki gwaṯɩdi ŋɩdio ŋun ŋɩki ŋun ŋaṯɩje gi ḏugwor ganu ḏuŋun; gi gwune linyu laṯumə gi ḏɩbona ḏun ḏutu ḏeḏi ḏugwor.

ḏidiŋɩna na ḏapa ŋɩru

mṯ. 7:24-27

46na gwudaro gəko naṯinyieico., gwele, gwele, nanɩni nate naṯanyalarre ŋun ŋarɩŋe no? 47gwun gwila lugwi na gwadiŋɩni ŋuɽuna ŋinyi ŋularre dino, nyi gwajaŋijo gwiro gi əḏi. 48gwiro gi gwiji gwun gwuṯo duno, nukwuri gwola ganu ki nugele jama gi loɽi elo. na gwune na gwəri wila na ŋau mɩɽi duno kweno gworki, numɩni gwate nuəṯi ŋɩma gwandigini ganu no, gi gwune jama jijo ga kɩdol elo. 49namɩni gwun gwudiŋɩnu nate nulape no, gwiro gi gwiji gwun gwuṯo duno ga kwɩnyəm, gwate gwəṯi jama no, na ŋau mɩɽi gworki na cou nuiḏi, na ḏɩkeḏa je kwu dunu kweno ḏɩbuḏo gworki.

Currently Selected:

luka 6: OTR1966

Highlight

Copy