luka 11

asa 11

ḏuməḏɩjo eloŋu ŋuɽun ŋe ŋaŋijɩlo yecu

mṯ. 6:9-13

1na gi gwune ju gi ḏuməḏɩjo eloŋu kalo gete, na gwune nuḏuḏɩni wɽi, na gwete eico gi calɩmis juŋun no, gwele gwəri, alɩmije galakwe anuməḏɩjo eloŋu gi gwune alɩmi yuwana calɩmis juŋun dino. 2nuleicɩno, ḏa nyalmar luməḏɩjo eloŋu nyamɩni arno,

baba,

ouwɩrico jiri juŋa a liji nəji jɩpiḏo pɽul.

na ŋele ŋuŋa ŋila. na ŋuɽun ŋuŋa.

ŋədujɩni kɩḏilio gi gwune ŋandujɩni kanyin.

3ḏəḏije gia ŋwamon wei.

4na ŋijiḏuḏɩjo ganu ŋuɽun ŋun ŋɩki,

gi gwune anaŋa dino ŋaṯaniḏuḏɩjo ganu wei lun ŋaṯijilərrɩjo

ŋun ŋɩki.

na aṯijəḏɩjo ŋuɽun ŋe ḏɩḏeijo no.

ḏuməḏɩjo eloŋu bucu bubruṯ, na ŋuɽun ŋun ŋɩlɩbo ŋeḏi meḏin gwun gwuwiḏi gilio

mṯ. 7:7-11

5nuleicɩno, əḏi gwiro lagalo, gwatɩn meḏin, nuwele lugwun gɩlɩgina ganu, nueicɩno, maḏəri, ḏəḏinyi gia ṯəɽɩl nanu gəmɩju ge, 6gi gwune maḏəri gwete mila kalo gwola ganu, na ŋate ŋəṯilo ŋun ŋilḏəḏə no, 7na ŋu gwun gwijo gɩḏəno nuwɩrlijo ŋuɽuna nueicɩno, ŋiḏiḏiɽio galo no, gibur go gilaŋiṯinu gwunnɩno, na nyaɽe nyinyi nye nyɩḏɩrananye kajagar. nyi gwate gwəṯi ŋɩma gweḏiɽo ŋaŋaḏəḏə no. 8nyi gweiceijɩno, na ḏa gwate madiɽi ŋumulḏəḏə gi gwune gwiro meḏin no, namɩni gi gwune gwijeiju ga gweḏiɽo ŋwulḏəḏə ŋun ŋɩbunyulo. 9na nyi gweiceijɩno, ɽoṯeḏɩl nalajiḏəḏə; bunyil nyalabuje, piḏɩl nalajiḏijo; 10gi gwune gwun gwaṯɩɽoṯeḏe ŋwulape, na gwun gwaṯɩbunyi ŋwulbuje, na gwun gwaṯɩpi gibia gwaliḏijo. 11na əḏi gwiro gwon lagalo gwiro baba, na ḏa ŋaɽe ŋuŋun ŋɩmaɽoṯeḏe gia ŋuḏəḏə gɩḏolia? i ŋɩmaɽoṯeḏe lumi ŋwuḏəḏə ḏuŋɩnyaŋe gi gwune ŋuŋunḏəḏə lumi a? 12i ḏa ŋɩmaɽoṯeḏe loiny ŋwuḏəḏə ḏimu a? 13na dino nyaŋa lun lɩki na ḏa lɩmalɩŋe nyaləḏəḏə nyaɽe nyalo ŋɩdio ŋun ŋiŋir, namɩni ŋiro ŋaḏa ŋutəno baba gweḏi kanyin lulḏəḏə lun liɽoṯeḏo lugwun gwuɽɩwə gwun gwɩpiḏo pɽul?

yecu wɩrli ŋuɽuna ga ŋan ḏapa ŋɩru ḏigeleja uwə seiṯan gwe

mṯ. 12:22-30, mks. 3:22-27

14nudi ḏiŋeroma ḏun ḏate ḏaṯumə no. na gwune nudi ḏiŋeroma nuumə gwun gwate gwaṯumə no, na liji obaga ṯuṯ. 15na kworo lagin nalarno, ŋu gwaṯɩḏi ḏiŋeroma bilsibul gwe gwun gwiro gwele gweḏi ḏiŋerom. 16na liro kaja nalɽoṯeḏe lugwun dəŋinio ḏeḏi kanyin gwiḏeijɩlo. 17namɩni ŋu nulɩŋe ḏuməḏɩno ḏagin nuleicɩno, ŋele wei ŋun ŋɩkenyɩḏiḏi ganu ŋake, na liji leḏi dunu lun likenyɩḏiḏi ganu laṯe ləṯijaḏaɽa no. 18na ḏa seiṯan makenyɩḏini ganu, namɩni galakwe ŋele ŋuŋun ŋajaḏaṯa? gi gwune nyalaṯarno nyi gwaṯɩdi ḏiŋeroma bilsibul gwe. 19na ḏa nyi maṯɩdi ḏiŋeroma bilsibul gwe, namɩni nyaɽe nyalo nyəḏi əḏi gwe? na ŋiro dino luŋa laro jaḏi jalo. 20namɩni ḏa nyi maṯɩdi ḏiŋeroma lamon le leḏi elo, na ŋele ŋeḏi elo ŋɩmila lagalo gwerkwe. 21na ḏa gwiji gwun gwubɩɽe nanu gwun gwəṯi ŋɩdio ŋe ḏɩrra madɩme duno gwuŋun, ŋɩdi ŋuŋun ŋajaḏaṯa ldu; 22namɩni ḏa gwiji mila gwun gwubɩɽeno nanu lugwun gwalgwurre na gwuḏamane ganu gwaɽe ŋɩdio ŋuŋun wei ŋe ḏɩrra ŋun ŋaṯunŋele ḏugwor, na gwakenya ŋɩdio ganu ŋun ŋapulo. 23gwun gwate gwijanagwe no, gwɩkiḏiḏianagwe, na gwun gwate gwaṯanagwiwəɽeice ldu no, ŋwulwɩreiji elo.

ḏuwɩrla ga ŋuɽun ŋun ŋɩki ḏun ḏate ḏiṯɩminu no

mṯ. 12:43-45

24na gwune na ḏiŋerom du kwiji ganu, nuwewele kalo ŋun ŋate gəṯi ŋau no, nubunyi ḏijaga. na ḏa ŋate gimubuje no, gwarno, nyi gwaɽuwe dunu gwi gwun gwuduḏɩne ganu. 25nuwila nubuje muḏinu ganu gwijiga muma. 26nuwele gwapa ḏiŋeroma kwoɽoṯəɽɩl diro kaja dikeno lugwun, naəḏi nalijiga ŋɩnəwei, na ŋakene kwiji kworo gweḏi uro gwerre.

27na gi gwune ju gi ḏuməḏo dino na gwa gwete əri gwula gi liji nueicɩno, ḏiŋiriḏa ḏaje kare gun gigwuliaŋage na gi jiḏu jun jiɽane. 28namɩni ŋu nuarno, i namɩni ḏɩmoreḏa ḏaje gi liji lun laṯɩdiŋɩni ŋuɽuna ŋeḏi elo nalɩdɩme.

dɩminu ga ŋuɽun ŋeḏi bunya ḏəŋinio

mṯ. 12:38-42, mks. 8:12

29na gi gwune aɽuwaḏo liji ldu lutu nuarno, liji leḏi gwunne lɩki, naṯɩlɽoṯeḏe laŋu ḏəŋinio nate nalinḏəḏə no namɩni ḏəŋinio ḏeḏi yunan gwun gwiro nebi. 30gi gwune na yunan gwiro ḏəŋinio gi liji leḏi ninuwa, na dino ŋaɽe ŋeḏi liji ŋaje ŋəŋini gi liji leḏi gwunne. 31gwele gweḏi gelio gwe gwun gwiro gwa gweḏiɽɩ gi lamon le ḏakɩmiḏa ləmɩnyo le leḏi gwunne nulakɩmi, gi gwune gwuwiḏi kalo gwola ganu geḏi gɩḏilio gwadiŋɩni ḏilɩŋeḏa ḏeḏi suliman; na eʼe gwete gwo ŋɩne gwubuṯano gworki ḏi suliman. 32ləmɩnyo leḏi ninuwa lədiɽi gi ḏakɩmiḏa leḏi gwunne nalakɩmiḏe, gi gwune liwɩrla ga ŋuɽun ŋun ŋɩki ḏuməḏɩjo ḏe ḏeḏi yunan; na eʼe gwete gwo ŋɩne gwubuṯano gworki ḏi yunan.

ḏalɩmia ḏeḏi lambə

mṯ. 5:15; 6:22-23

33gwiji gwate gwete gwun gwoudeije lambə nugele kalo gun gilɩbo no, namɩni kalo ge ḏoɽeḏa ga, kani a liji lun ləḏi alaŋaḏa bure. 34lambə leḏi aŋɩnu liro gei. na kaja gun gagi gei guŋa giŋir, aŋɩnu yuŋa wei enyeḏe bure gwe; namɩni ḏa ŋɩmake namɩni aŋɩnu yuŋa enyeḏe girɩm ganu. 35aŋəḏi bure gwun gwijo lugwuŋa gwo gwaro girɩm. 36na ḏa aŋɩnu yuŋa wei yimaro bure, ŋate yəṯi gala ŋun ŋiro girɩm no, yaro bure wei, gi gwune bure gweḏi lambə gwaŋoɽəḏɩjo galo.

yecu gwumapi lɩbarɩsi na jalgaṯɩm ḏare

mṯ. 23:1-36, mks. 12:38-40, lk. 20:45-47

37na gwune nuumə na gwubarɩsi uməḏɩjo nuarno gwalgweʼe. nuəḏi nujiga. 38na gwubarɩsi gwune nuaŋu dino nuobaga ṯuṯ, gi gwune gwate gwuwei di gwerre gwate manʼe no gi gwune aṯɩliwone dagin no. 39na gwele gwun gwiro elo eicɩno, nyaŋa lun liro lɩbarɩsi nyalaṯɩwei ḏoɽena na kɩɽudo gi ḏuɽo, namɩni gidəno nyalenyeḏo ŋwuɽama ganu na ŋuɽun ŋun ŋɩki. 40nyaŋa lun liro jɩɽilo, ŋu gwədu gwun gwugelo kɩluḏoŋ gwugelo gidənoŋ dino na? 41namɩni nyalḏəḏə lun late ləṯi ŋɩdio no ŋeḏi gidəno, na ŋɩdi wei ŋajiŋiriḏɩjo. 42namɩni ŋɩki lagalo nyaŋa lun liro lɩbarɩsi, gi gwune laṯanyalḏəḏə eloŋu gani gete geḏi luco i gwijido kworo gwun gwiro di, na nəni nun niro kajakaja, nanyadara ŋuɽuna ŋun ŋɩḏuḏɩnu ga na ḏəmɩnyo ḏeḏi elo. arram nyalduji ŋeno, na nya late nyalouwɩrico ŋəwei no. 43ŋɩki lagalo nyaŋa lun liro lɩbarɩsi, gi gwune nyalaṯəmɩnyi gɩḏoɽ gi lɩdunu leḏi elo ŋun ŋiro lɽa, na ḏɩmɩɽəḏo gi cu. 44ŋɩki lagalo, gi gwune nyalro gi nil nun nate naŋino no, na lun lɩwiḏinelo nate nalilɩŋe no.

45na gwete gweḏi lɩmualɩm leḏi ŋuɽun ŋun ŋigelijɩlo elo musaŋ nuwɩrlijo ŋuɽuna nueicɩno, mualɩm gwəri, ŋuɽun ŋun ŋɩməḏəlo ga gwiḏenije anaŋa dino. 46nuleicɩno, ŋɩki lagalo dino nyaŋa lun liro lɩmualɩm leḏi ŋuɽun ŋun ŋigelijɩlo elo musaŋ, gi gwune nyalaṯapi liji dube dɩki na nyaŋa, nya late laṯɩnḏɩmumi dube lamon le lalo letɩdo no. 47ŋɩki lagalo, gi gwune nyadɩme gala nil neḏi nebɩŋa na lɩmal lɩgwumɩnyo lalo ɽinye. 48na dino nyalteije ga nyaləmɩnyi ŋɩru geḏi lɩgwumɩnyo lalo, gi gwune luŋa lijinyɩḏilo, na nyadɩme gala geḏi nil nagin. 49na ŋiro dino na ḏilɩŋeḏena ḏeḏi elo ḏarno, nyi lɩwəḏɩjilo nebɩŋaije na duwəjo nalalijinye kworo lalɩnḏagɩɽini, 50kani ŋwuɽoṯeḏe gi liji leḏi gwunne ŋuwən ŋeḏi nebɩŋa wei ŋun ŋirəḏi ga uro kaja gun gigelɩlge gɩḏilio, 51uro ŋuwən ŋeḏi abil kəbe ŋuwən geḏi sakaria gun gwaiyo kɩligi ganu geḏi lobo na dunu ŋweḏi elo gwun gwubuḏo. i, nyi gweiceijɩno, ŋaɽoṯeḏini gi liji leḏi gwunne. 52ŋɩki lagalo, nyaŋa lun liro lɩmualɩm leḏi ŋuɽun ŋun ŋigelijɩlo elo musaŋ, gi gwune nyalmape mubɩa gwe ḏilɩŋeḏa; nyaŋa gi lulo lalo nya late lɩməḏi no, nanyalakajo lun lar ləḏi.

53na gi gwune duḏu ŋɩnəwei, na jalgaṯɩm na lɩbarɩsi nalɩkiḏiḏi gworki naliḏeije gwuluməḏɩjo ŋuɽuna gwan ŋɩdi ŋutu; 54nalgwujane nalbunyi ləḏiŋɩni ŋuɽuna ŋədi gi linyu luŋun ŋaliŋicɩgi.

Currently Selected:

luka 11: OTR1966

Highlight

Copy