yuwana 13

asa 13

yecu gwuwei calɩmis ŋwara

1na gwerre gɩmuri ge ḏouwɩrico gate gɩmila no, na yecu gwilɩŋiḏi sa juŋun jɩmila jun jujiwalane kɩḏilio keno nuwele ḏi baba, gi gwune gwəmɩnyu liji luŋun lun lijo kɩḏilio, luləmɩnyi kəbe gi lamon leḏi gɩdo. 2gi gwune jil gi ḏiṯa gwune na iblis əḏɩjo ŋuɽuna gi ḏugwor ganu ḏeḏi yauḏa iskariyuṯi, gwun gwiro ŋaɽe ŋeḏi simian, gwar gwulɩḏəḏə, 3na yecu gwilɩŋiḏi ŋu ma baba gele ŋɩdio wei gi di duŋun, na gwuwiḏi ḏi elo na gwaje gwaɽuwe ḏi elo. 4na dino nudiɽo gi ḏiṯa, nuwal jiria juŋun ki nuape giria ge ḏimuja ŋau nukani gi dɩmi ganu; 5nudoije ŋau kɩɽudo nuiḏeije ga gi ḏuweia calɩmis juŋun ŋwara nulmuje ŋau giria ge ge ḏimuja ŋau gun gikanu gi dɩmi ganu. 6nuwila ḏi simian buṯrus, na buṯrus eicɩno, gwele gwəri, ŋa gwiro gwar gwowei ŋwara ŋwinyi a? 7na yecu wɩrlijo ŋuɽuna nueicɩno, ate ŋalɩŋe gwunnɩno ŋun ŋar ŋilape no, namɩni ŋar ŋalɩŋe gɩdo. 8na buṯrus eicɩno, ŋa gwate gwowei ŋwara ŋwinyi ḏuṯ no. na yecu wɩrlijo ŋuɽuna nueicɩno, ḏa nyi gwate maŋawei no, namɩni alate alaje kal gete no. 9na simian buṯrus eiclɩno, gwele gwəri, ŋwara ŋwədu ŋwiro kuwei no namɩni di ḏinyi na lɽa dino. 10na yecu eicɩno, gwun gwuwone gwate gwubunyu ḏuwona wei mɩna no namɩni ŋwara kuwei, na ŋu gwiŋir nanu wei; na nya liŋir nanu, namɩni nya late liŋir nanu wei no; 11gi gwune gwilɩŋiḏi gwiji gwun gwar gwalɩḏəḏə. na ŋiro dino nuarno, nya late liŋir nanu wei no.

12gwune nulwei ŋwara ŋwagin nukani jiria juŋun nuaɽu nujiga mɩna, nuleicɩno, nya lilɩŋiḏi nyi gwapaŋe lagalo a? 13nyaŋa laṯɩyieico mualɩm na gwele, nyalarne muma, gi gwune nyi gwiro. 14ḏa nyi gwun gwiro gwele na mualɩm mawei ŋwara ŋwalo, na arram nyaŋa dino aṯanyawei ŋwara ŋwalo ŋɩmaga. 15gi gwune nyimajaŋijo ŋuɽuna kəbe ŋun ŋapine lagalo nanyanape dino nyaŋa. 16gwerkwe, gwerkwe ganu, nyi gweiceijɩno, wainy gwate gwubuṯano kwele gwuŋun no, i gwete gwun gwuwəjɩnu gwubuṯano kworo gwun gwuwəju no. 17da ŋɩmanyalɩŋe ŋeno nyalmore ḏa ŋɩmanyalape. 18nyi gwate gwuməḏəṯi lagalo wei no. nyi lilɩŋiḏɩlo lun lɩməṯilo; namɩni kani alṯɩmi ŋuɽuna ŋeḏi gɩḏam geḏi elo, gwun gwanagwiʼe gia abuḏɩjo liḏɩgido luŋun elo. 19na gwunnɩno nyi gwajuməḏɩjo ŋuɽuna gwerre ŋate ŋɩmila no, kani ḏa ŋɩmara ŋɩmila nyaləmɩnyi, nyi gwiro. 20gwerkwe, gwerkwe ganu, nyi gweiceijɩno, gwun gwəmɩnyi gwuməṯo gwun gwuwəjɩŋi gwinyiməṯo dino, na gwun gwinyiməṯo gwuməṯo gwun gwuwəjɩŋi dino.

yecu maŋiḏi gwuga

mṯ. 26:20-25, mks. 14:17-21, lk. 22:21-23

21gwune na yecu umə ŋuɽuna ŋeno na ḏugwor ḏuŋun auce ganu, nuarno, gwerkwe, gwerkwe ganu, nyi gweiceijɩno, gwo gwete lagalo gwar gwilɩḏəḏə. 22na calɩmis juŋun ŋalade kworo ŋɩmaga laginŋu gi gwune late lilɩŋiḏi əḏi gwiro gwuməḏu gwe no. 23na gwete gwiḏɩrəḏi yecuŋ gi jabba ganu, na gwiro ṯalɩmis ḏuŋun ḏun ḏaṯuəmɩnyi. 24na simian buṯrus uməḏɩjo ḏi ḏe, nueicɩno, ɽoṯəḏɩjo yecuŋ ədi gwiro gwun gwuməḏu gwe? 25na gwun gwiḏɩrəḏi yecuŋ gi jabba ganu nueicɩno, gwele gwəri, əḏi gwiro? 26na yecu wɩrlijo ŋuɽuna nueicɩno, ḏa nyi maṯiwaje gia gimiḏəḏə na ŋu gwiro. naṯuiwaje gia nuḏəḏə yauḏa iskariyuṯɩŋ, gwun gwiro ŋaɽe ŋeḏi simian. 27gwune nuape gia na seiṯan əḏi gi ḏugwor ganu ḏuŋun. na ŋiro dino na yecu eicɩno, ŋun ŋar ŋalape, apɩlo cou. 28namɩni gwate gwete lagin lun lijille gi ḏiṯa, manlɩŋe ŋɩrṯa ŋiro ŋun ŋuməḏulo no. 29na kworo arno, yauḏa gwiro gwun gwaṯɩdɩme gwurəḏo gweḏi əlgɩrucu na yecu arno, iḏili ŋɩdio ŋun ŋɩbunyɩlo ŋeḏi gɩmuri, i, nuarno ŋilɩḏəḏə liji lun late ləṯi ŋɩdio no. 30nuape gia nudu cou; na galo giro gilio.

ŋuɽun ŋun ŋiya ŋe ḏəmɩnyo

31gwune nutu na yecu eicɩno, gwunnɩno ŋaɽe ŋeḏi liji ŋalbuḏi na ŋa elo buḏi ŋu gwe. 32na ḏa elo mabuḏɩni ŋu gwe, na elo dino mubuḏi kwulo gwuŋun na ŋabuḏi cou. 33nyaɽe nyinyi, ilore lijoga ŋwamon ŋwouwɩrio kuwei. nya linyibunyi ŋiro gi gwune eici liju no, galo gun ginwele nya late ləṯi ŋɩma ganyanwila no, na nyi gweiceijɩne dino gwunnɩno. 34na nyi gwajiḏəḏə ŋuɽuna ŋun ŋiya, niarno, aṯanyəmɩnyi gworo; gi gwune əmɩnyejɩne, aṯanyəmɩnyi gworo nyaŋa ŋɩmaga dino. 35na ŋeno liji wei lalɩŋe nyalro calɩmis jinyi, ḏa nyalməṯi ḏaminyɩḏa ŋɩmaga laaaloŋu.

yecu gwuməḏi ŋuɽuna ŋan ḏidonyɩḏa ḏeḏi buṯrus yecuŋ gwerre ŋuɽun ŋate ŋɩmila no

mṯ. 26:31-35, mks. 14:27-31, lk. 22:31-34

36na simian buṯrus eicɩno, gwele gwəri, ga gwar gwene? na yecu wɩrlijo ŋuɽuna nueicɩno, gwunnɩno ŋa gwate gwəṯi ŋɩma ŋa gwigwujana kalo gun ginwele no, namɩni ŋa gwigwujana gi lamon lun laje lila. 37na buṯrus eicɩno, gwele gwəri, gwudaro gəko nate niəṯi ŋɩma aŋagwujana gwunnɩno no? nyi gwəmɩnyu nyi gwai gwan ŋa. 38na yecu wɩrlijo ŋuɽuna nueicɩno, ŋa gwəmɩnyu ŋa gwai gwan nyi a? gwerkwe, gwerkwe ganu, nyi gweicaŋano, lɩgwugɩɽe late ləri gwula no gwerre ŋa gwinyidonye ŋwamon ganu ṯəɽɩl.

Currently Selected:

yuwana 13: OTR1966

Highlight

Copy