Margus 13
13
Al Yasuuⓐ abiŋaijo darnu hekal a gidhila laji lerna
1A dina tuyuŋw hekal, a thilmiz dheta dhuŋun abiŋaijo, ŋwaici, Muⓐallim gwai, aŋadhi nyolya ibinya nyiro akwai? a dunu. 2A Yasuuⓐ abiŋaijo, ŋwaici, Au gwa gwaŋadhi duna ibigwa gwipigwipa? Kol geta gati gajalo kol alaŋ giter gina gati gupudhini galo no. 3A dina jaluŋw gi len alaŋ lina lan Zetuun, ŋwudhuni hekal ganu, a Buṯrusŋa, Yaⓐguubŋa, Yuuẖannaŋa, Andaraawusŋa alothaije galo nyigam, alaicinu, 4Aŋajije ŋwamun ŋwina ŋwadhuŋw ŋwai dhuŋun ibidha dhaji dhuthi je ganu, a ⓐalaama gwaji gwaro akwai gwina gwijaŋajo darnu dhuŋun ibidha dhaji dhuthi je ganu. 5Al Yasuuⓐ abiŋaijo, ŋwulaici, Ethadhinul galo dathaji kwiji gweta ukinejo ganu no. 6Liji loinyadho laji lila, ladhedhini jiriny jiny, alarnu, Nyi gwiro al Masiih; alukinejo lijo ganu loinyadho. 7Abi manya diŋini dhuŋuna dha ŋoŋor, a dhuŋun dhina dhabiŋinu dha ŋoŋor, athanya dhenyo no; aram dhuŋun ibidhe dhuthi je ganu; abi lamun lina lamira loma lati limila no. 8Liumam laji ladire gi liumam liter, a gidhila gi gidhila giter; a kwiyaŋ gwaji gwubi galo kalo gitigiter, a gidhuŋur gaje a dhuŋun dhina dhibur; dhuŋun ibidha dhiro dhina dhaje kwerkwereny dha dhikadugore.
9Nya bethadhini galo; lajodhadha gi juriya; a gi majaamiⓐ, a lajipi gwuleny; a nyaŋa linyidhunejo galo gi je ganu ja leleny a ja maluuk ŋinena ro jiriny jiny, danyaro shuhuud degen. 10A aram Dhuŋun dhina Dhiŋir dhabiŋini kwereny gi Liumam ganu peth. 11Abi maji majilodhadha gi juriya dajil akimiye, athajibi dugor mirii no, athanya abiŋinu gi dugor ganu darnu aŋ gwiro gwina gwanya abiŋi no; abi dhina dhajidhedha gi saaⓐa ibije, nyabiŋi; ŋinena nyaŋa lati liro lina labiŋi dhuŋuna ibidhe no, abi Dhigirim dhina Dhiŋir. 12A mega gwaji gwateje megen galo dai, a babo gwateje ŋare galo; a keleŋa gaji gurlani ganu baboŋa lai a nanaŋa lai legen, lanugejiye, alrinya. 13A liji peth laji lajirini ŋinena ranya liji liny; abi gwina gwathimutha dhugore gwortal di ma dhuŋun ibidhe ro peth, ŋeda gwagilaŋini.
14Abi maji manya aŋa kwoinya gwina gwikanu ŋidi peth, gwina gwulo gwai nebi gwina gwan Daaniyiil, didhuna kalo gina gati giŋir duŋwun dhuna no, (kwiji gwina gwaji gwabiŋaijo kitham ibiga ŋwaŋa momaŋ,) nyabrico lina lo Yahuudiiya alabira kamarigen. 15A gwina gwaje gi dunu alaŋ athuŋw uludhi galo no, athuŋw udhi kiru diteya kwoiny gwetipo gi dunu gwuŋun no. 16A kwiji gwina gwaje kedho, athuŋw auradhi dapa luga luŋun no. 17Dhuŋun dhaka gi la lina lathaji laje nyari nyai, a lina lathire ŋwamun ibiŋwe. 18Nyabiŋaijo Kaloŋa athi dhuŋun dha dhabira gwalo je kwogai no. 19Ŋwamun ibiŋwe dhuŋun dhaje dhibur gwuleny, dhati dhijo dhiro minoŋ no ŋinena man Kalo geta gidhileo ro kwerkwereny di a ŋinena ro, a dhati dhaje manaŋ no. 20A ada Kweleny gwati gwimuru ŋwamun ibiŋwe ganu no, kwiji gwetipo gwati gwagilaŋ no; abi ŋwumuŋwul urijo lijo ganu lina luthunuŋwul ganu. 21Abi ada kwiji gweta gwimajabiŋaijo, ŋajaici, Aŋadhul al Masiiẖ gwo mina; i gwo mine; athanya uminyu no. 22Liji laji ladire lina liro lidhuŋun, alarnu, liro al Masiiẖ, a nebiŋa lina liro lidhuŋun, alaŋajo lijo ⓐalaamaat a ŋiro ŋina ŋathalije lijo galo dir, dilukinejo lijo ganu lina luthunilo Kalo ganu, ada limuthi ŋoma. 23Nyabi ethadhini galo; aŋadhul, nyi gwimajaŋidhaneye kwereny dhuŋuna peth.
24Abi ŋwamun ibiŋwe maji man dhuŋun ibidhe peth ernadha ganu, a aŋin yaji yarimi ganu, a gwuwa gwati gwora galo no. 25A ŋwudum ŋwa jiburu ŋwaji ŋwida, a ŋoma peth ŋa Sama ŋaji ŋube galo. 26A liji laji laŋa Ŋare ŋa liji dula gi jiburu ganu ŋoma ŋai ŋoinyadho a majdh gwai. 27A ŋaji ukeja malaayka luŋun, alwureje lijo liduŋw lina luthunilo Kalo ganu ŋwumera kworoŋo kalo peth ga kwiyaŋ a kalo peth ga Sama.
Bupe gwina gwiro dharuri di datiŋa galo momaŋ
28Liŋidhul odaijuŋw gwa gwudha. Mathi durna duŋun didiye, alteya nyuni, nyaŋa lathaliŋa darnu kaiyo go githo. 29Minoŋ ko maji manya aŋa dhuŋun ibidhe dhaji dhuthi je ganu, nyaliŋa darnu ŋa githo, ŋwuje kour. 30Titiganu nyi gwa gwacaijinu, Liji lina lijo ŋinena lati lerna di ma dhuŋun ibidhe peth uthi je ganu no. 31Sama a gidhila laji lerna; abi dhuŋun dhiny dhati dherna gatur no. 32Abi kwiji gweda gwati gwiliŋidhi lamun ibile i saaⓐa no, a malaayka lina lathije Sama lati liliŋidhi no, athi Ŋari liŋidhi no, abi Babo gwetipo gwiliŋidhi. 33Athanya ethadhe galo, nya datiŋa galo, nyabiŋaijo Kaloŋa, ŋinena athanya liŋidhi lamun no. 34Ŋari ŋa liji ŋiro ŋinena kwiji gwina gwiludhi kalo golaŋ ganu, ŋwugathani duna gwuŋun, ŋwugathani jadham juŋun dapai ŋiro, ŋwudhedha lijo peth ŋiro ŋegen, ŋwudhedha kwijo gwina gwathijalo kour amr, ŋwaici, Ethadho. 35A minoŋ athanya datiŋa galo; ŋinena athanya liŋidhi lamun lina laji lal kweleny gwa dunu ila, ŋibilbil ŋai, i gile thirir, i ro gile galo, i bigunu. 36Udubidi gwaji gwila babraŋ, a gwajibuje didhre. 37A dhuŋun dhina dhabiŋaijaje dhabiŋaijiny lijo peth, Ethadhul galo.
Currently Selected:
Margus 13: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
