Margus 11
11
Yasuuⓐ gwudhi Urushaliim gwiro ŋinena gweta gwina gwidhinyu lijo kalo ga ŋoŋor
1A dina malari lobani Urushaliim, alje githo Betfaaji a Betⓐanya, kalo ga len lina lan Zetuun, ŋwukeje calmiz juŋun ram. 2Ŋwulabiŋaijo, ŋwulaici, Idhul gi len lina lijudhi kwereny; a manya obani, nyalbuje ŋurigaŋa ŋeta ŋina ŋogaŋ ŋigukinu, ŋina ŋoma ŋati ŋulidhina kwiji alaŋ no; nya gudia, nyil udhijo. 3Abi ada kwiji gweta gwimajabiŋaijo, ŋajaici, Kworaŋ nya bare minoŋ? Nya baicinu, Ŋibupo Kweleny, abi ŋaji ŋajil wurejo. 4Alela, albuje ŋurigaŋa ŋigukinu por kour ya dunu gweta kalo gina gathin dai apaiji galo; algudia. 5A liji coŋ lina lidhunadhi mine, allabiŋaijo, allaici, Nyaŋa larau nyabi gudu ŋurigaŋa? 6Allabiŋaijo dhuŋuna dhina dhabiŋaijilo Yasuuⓐ; allabrico alela. 7Aludhijo Yasuuⓐuŋw ŋurigaŋa, angeta ciraŋa alaŋ jegen; an Yasuuⓐ alalaŋ. 8A liji loinyadho gilce ciraŋa jegen gi dhai alaŋ; a liter urta durna da jari, algagitho galo gi dhai alaŋ. 9A liji lina limadhinu a lina ligwujo alabiŋi gwuligwuleny, alarnu, Us̱anna; gwiŋir dhugore gwina gwidhi jiriny jai ja Kweleny. 10Gwiŋir dhugore kidhila ga babo gwega gwina gwan Daawud, gwina gwidhi jiriny jai ja Kweleny. Us̱anna Kalo gina gijudhi ro kabo. 11A Yasuuⓐ obani Urushaliim, ŋwuni hekal; ŋwudatiŋa ŋida peth, alela Betⓐanya calmiz jai jina jiro die‐a‐ram, kalo giro ŋibilbil.
Gwudha gwina gwati gwuthi ŋwudha no
12A bigunu, malgathani Betⓐanya, a jamu eny ganu. 13Ŋwaŋa gwudha gweta romine gwuthi nyuni, ŋwela, ŋwari gwuŋwun bupe ŋwudha; a muŋwobani, ŋwubuje nyuni dogo; lamun lati liro lina lathil ŋwudha ure no. 14A Yasuuⓐ abiŋaijo, ŋwaici, Gwati gweta gweny ŋwudha ŋwuŋa manaŋ gatur no. A calmiz juŋun diŋini.
Yasuuⓐ gwiŋiriyo hekal
15Alobani Urushaliim; a Yasuuⓐ uni hekal, ŋwuteye lijo lina lijo delaŋ ŋida ŋegen, alelaŋ ŋida ŋiter hekal ganu, ŋwupeje darabeza galo da liji lina lathupeye gwarush ganu, ŋwupeje jibura galo ja liji lina lathelaŋ jiridhir. 16Athuŋw abrico kwijo gwetipo gwapai ŋida ŋuŋila hekal no. 17Ŋwulalimiye, ŋwulaici, Gwati gwulinu darnu, Dunu gwiny gwuthi jiriny jan Dunu gwadhabiŋaijo Kaloŋa gwan Liumam peth na? Abi gwimanya ruje dunu gwa ŋwuram. 18A jathib a leleny la gusus diŋini dhuŋuna ibidhe, albupe dhuŋuna dha dhildhirinya; lidhenyo, ŋinena athi liji peth alo galo dir gi taⓐliim dhuŋun. 19A ma kalo ro ŋibilbil, ŋwugathani Urushaliimuŋw, ŋwutuya ganu.
Ŋoma ŋa imaan
20A bigunu, mal madhina gwudha, alaŋa duŋwudhe peth. 21A Buṯrus aŋidhani, ŋwabiŋaijo Yasuuⓐuŋw, ŋwaici, Muⓐallim gwai, aŋadhi gwudha gwina gwiluyaŋa, gwimudhe. 22Al Yasuuⓐ abiŋaijo, ŋwulaici, Uminyul darnu Kalo guthi ŋoma. 23Titiganu nyi gwa gwacaijinu, Ada kwiji gweta gwimabiŋaijo lena ibila, ŋwaici, Idhi, ŋule baẖr ganu; athuŋwbidoinya gi dhugor ganu dhuŋun no, ŋwubuminyi darnu dhuŋun ibidhe dhina dhabiŋuŋw dhuthi je ganu; dhuŋun dhuŋun dhaji dharo ŋinena abiŋuŋwna. 24Gi dhuŋun ibidha nyi gwa gwabiŋaijaje, ŋajaici, Mathanya abiŋaijo Kaloŋa, athanya uminyi darnu nyaŋa luthi ŋida ŋina ŋibupanyalo, a ŋaji ŋanyaluthi. 25A mathanya dhunalaŋ dabiŋaijo Kaloŋa, athanya dhudhani ganu ŋidi ŋike ŋina ŋathil liji apai dagalo, a Babo gwalo gwina gwathije Sama dhudhani ganu ŋidi ŋalo ko ŋina ŋike. 26Abi ada nyaŋa lati limathi dhudhani ganu degen no, a Babo gwalo gwina gwathije Sama gwati gwadhudhani ganu ŋidi ŋalo ŋina ŋike no.
Liji lothaijo Yasuuⓐuŋw galo, alaici, Ŋeleny ŋuŋa ŋidhi na?
27Alaura Urushaliim manaŋ; a dina idhidhi Yasuuⓐ galo hekal, a leleny la gusus a jathib a liji lina lurun alila dugun. 28Alabiŋaijo, alaici, Ŋa gwathapai dhuŋuna ibidha ŋeleny ŋai ŋirau? a ei gwidhedhaŋa ŋelenya ŋa dhaŋa ŋare minoŋ?
29Ŋwulabiŋaijo, ŋwulaici, Nyi ko gwajothaije galo dhuŋun dhai dhetipo. Abiŋaijinyilo, abi nyi gwajabiŋaijo dhuŋuna dha ŋeleny ŋina ŋathinyil apai dhuŋuna ibidha. 30Maⓐmuudiiya gwa Yuuẖanna gwa Sama gwiro, i gwa liji? Abiŋaijinyilo. 31Alabiŋaijiye, alarnu, Ada alŋa limare, Gwa Sama gwiro; gwaji gwarnu, Nya barau athanya buminyu dhuŋuna dhuŋun no? 32Abi ada alŋa limare, Gwa liji gwiro; albi dhenya lijo; ŋinena athi liji peth uminyi darnu Yuuẖanna gwiro nebi titiganu. 33Alabiŋaijo Yasuuⓐuŋw, alaici, Gwati gwiliŋidhana no. Al Yasuuⓐ abiŋaijo, ŋwulaici, Nyi ko gwati gwajabiŋaijo ŋeleny ŋai ŋina ŋathinyiŋapai dhuŋuna ibidha no.
Currently Selected:
Margus 11: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
