Matta 21

Yasuuⓐ gwudhi Urushaliim gwiro ŋinena gweta gwina gwidhinyu lijo kalo ga ŋoŋor

1A dina maljaijo Urushaliimuŋw githo, alule Betfaaji, gi len la Zetuun, a Yasuuⓐ ukeje calmiz juŋun ram, 2ŋwulabiŋaijo, ŋwulaici, Idhul gi len lina lijudhi kwereny, a nyaŋa laji labuje ŋurigaŋa ŋeta ŋina ŋigukinu dhar dhai kwidom, ŋijila ŋari ŋai ŋuŋun. Nya gudia, nyiludhija. 3Abi ada kwiji gweda gwimajabiŋaijo, ŋajaici, Ŋardhau nyabi gudu, nyabaicinu, Ŋibupo Kweleny, a ŋajabricijo nyanodhadha ganu. 4A dhuŋun ibidhe uthi je ganu dhina dhabiŋu nebi ro kwereny, ŋwarnu, 5Abiŋaijul ŋera ŋa S̱aahyuun ŋwaŋa malik gwuŋun gwidhi dugun, gwirudhinu, gwudhi ŋurigaŋ alaŋ, a ŋari alaŋ ŋa ŋurigaŋ. 6A calmiz ela, alare gwiro ŋinena abiŋaijina Yasuuⓐ. 7Alodha ŋurigaŋa a ŋari ŋuŋun, annigeta ciraŋ alaŋ jegen, analije Yasuuⓐuŋw alaŋ. 8A liji loinyadho gwuleny gilce ciraŋa jegen gi dhai alaŋ, a liter urta durna da jari, aligilice galo gi dhai alaŋ. 9A liji lina limadhinudhi a lina ligwujo alure gwula gwuleny, alarnu, Us̱anna, Ŋari ŋai ŋa Daawud. Gwiŋir dhugore gwina gwidhi jiriny jai ja Kweleny; Us̱anna kalo gina gijudhi ro kabo. 10A dina muŋwobani Urushaliim, a liji peth ali galo dir, alarnu, Ei gwiro ibigwa? 11Abi liji larnu, Yasuuⓐ gwiro gwina gwiro nebi gwa Naas̱ira gwa Jaliil.

Ŋwiŋiriye hekal

12A Yasuuⓐ uni hekal ganu gwa Kalo, ŋwuteye lijo peth lina lathinje delaŋ ŋida ŋegen, alelaŋ ŋida ŋiter, ŋwupeje darabeza galo da liji lina lathupeye gwarush ganu, ŋwupeje jibura galo ja liji lina lathelaŋ jiridhir. 13Ŋwulabiŋaijo, ŋwulaici, Dhulinu, ŋwarnu, Dunu gwiny gwaro dunu gwa dhabiŋaijo Kaloŋa; abi gwimanya ruje dunu gwa ŋwuram. 14A liji lina lirima gi je a lina ladhibainu ila dugun gi hekal; ŋwulgeta momaŋ. 15Abi dina ma leleny la gusus ŋa jathib lai aŋa ŋiro ŋina ŋathalije lijo galo dir ŋina ŋapuŋwulo, a keleŋa ure gwula gi hekal ganu alarnu Us̱anna, Ŋari ŋai ŋa Daawud; alkadugore gwuleny, 16alaicinu, Ŋa gwidiŋinu dhuŋuna dhina dharal dhai a? Al Yasuuⓐ aicinu, Ye. Nyaŋa lati limabiŋaijo dhuŋuna dhina dhulinu gi jitham ganu na? Ŋwinyu ŋwa keleŋa a ŋwa ŋwugur ŋa gwimajarima orthadhuŋw.

Gwudha gwina gwati gwuthi ŋwudha no

17Ŋwulgathani, ŋwela ŋwutu len, ŋwela Betⓐanya, ŋwujalo mine. 18A ma kalo ure manaŋ, ŋwaura gi len, a jamu eny ganu. 19A dina muŋw aŋa gwudha gweta gi dhai, ŋwunela, athuŋwun bujo ŋida ŋeda no, abi nyuni dogo, ŋwabiŋaijo, ŋwaici, Athana ŋa gwarire fruuta manaŋ gi gidhila no. An gwudha odhadha ganu. 20A dina ma calmiz aŋa dhuŋuna ibidhe, alali galo dir, alarnu, Gwudha gwardhau, ŋwunbi odhadhadha ganu babraŋ? 21Albi Yasuuⓐ abiŋaijo, ŋwulaici, Titiganu nyi gwa gwacaijinu, Ada nyaŋa lina lathii uminyi dhuŋuna dugor dai dalo peth, nyaŋa lina lati lathii agrithini gi dugor ganu no, nyaŋa lati lodhapai dhuŋuna ibidha dha gwudha cucun no, nyaŋa laiiuthi ŋoma laii abiŋaijo lena ibila, lanyaici, Dira galo, ŋela ŋule baẖr ganu, a lando. 22A dhuŋun peth dhina dhanya dhabiŋaijo Kaloŋa, nyothaijo galo, nyuminyu, dhaji dhanyapai.

Liji lothaijo Yasuuⓐuŋw galo, alaici, Ŋeleny ŋuŋa ŋidhi na?

23A dina muŋwila gi hekal, a leleny la gusus a la liji ila peth dugun, gwijo nanaŋ dalimiye, alabiŋaijo, alaici, Ŋa gwathapai dhuŋuna ibidha ŋeleny ŋai ŋa dhei? i ei gwiro gwidhedhaŋa ŋelenya ibiŋa? 24Albi Yasuuⓐ abiŋaijo, ŋwulaici, Nyi ko gwajothaije galo dhuŋun dhai dheta, ada dhiminyilabiŋaijo, a nyi ko gwajabiŋaijo dhuŋuna dha ŋeleny ŋina ŋathinyi ŋapai dhuŋuna ibidha. 25Maⓐmuudiiya gwa Yuuẖanna gwidhi na? gwa liji gwiro, i gwa Sama? Alabiŋini gi dugor ganu degen, alarnu, Ada alimarnu, Gwa Sama gwiro, gwaji gwarnu, Ŋa barau athanya buminyu dhuŋuna dhuŋun no? 26Abi ada alimarnu, Gwa liji gwiro, aldhenya lijo; ŋinena athi liji peth uminyi darnu Yuuẖanna gwiro nebi. 27Alabiŋaijo Yasuuⓐuŋw, alaici, Gwati gwiliŋidhana no. Ŋwulaici, Nyi ko gwati gwajabiŋaijo ŋeleny ŋai ŋina ŋathinyiŋapai dhuŋuna ibidha no.

Odaije gwa keleŋa ram

28Nyabarakwai? Kwiji gweta gwuthi keleŋa ram giro loma; ŋwila ŋari ŋina ŋuranu, ŋwabiŋaijo, ŋwaici, Ŋari ŋai, idhi gi dhiruiny ganu dhiny ŋanapa ŋiro. 29A ŋari aicinu, Nyi gwati gwela no. Ŋwubaji ŋwabiŋini, ŋwela. 30Ŋwari ŋwunila ŋina ŋoganu, ŋwunabiŋaijo minoŋ ko, a ŋari abiŋaijo, ŋwaici, Kweleny gwai, nyi gwela. Athuŋwbi idhi no. 31Ŋari ŋiro ŋirau ŋina ŋapo dhuŋuna dhina dhibupo babo gwuŋun? Alaicinu, Ŋina ŋa kwerkwereny. Al Yasuuⓐ abiŋaijo, ŋwulaici, Titiganu nyi gwa gwacaijinu, Liji lina lathimeje a la lina limiridhi je ganu laji luni kidhila ga Kalo kwereny dagalo. 32Yuuẖanna gwidhi dhuŋun dhai dhina dhiŋir, athanya buminyu no; abi liji lina lathimeje a la lina limiridhi je ganu albuminyi; abi maji manyaŋa athanya urlo dugore galo danya uthi ŋoma nyuminyi no.

Odaije gwa dhiruiny dha dhugur

33Diŋinul odaijuŋw gwiter. Kweleny gweta gwigeto dhiruiny dha dhugur, ŋwulpujo dhuwa dhipa ŋwurel, ŋwukure libugul la ladhuda dugura, ŋwaice duna gwolalaŋ, ŋwugathani lijo lina lathapai ŋiro, ŋwela gi len leta lina lolaŋ ganu. 34A dina ma kalo ro dhura, ŋwukeje jadham juŋun gi liji lina lathapai ŋiro gi dhiruiny ganu, ŋwari jaldhedha ŋida ŋa dhiruiny ŋina ŋure. 35Abi liji lina lathapai ŋiro gi dhiruiny ganu mutha jadham juŋun, alpi geta, alrinya geta, alaice nyol nyai geta. 36Ŋwari ŋwukeje jadham jiter manaŋ joinyadhanu gi kwereny, anure ko. 37Abi gidon ŋwukeje ŋare ŋuŋun degen, ŋwarnu, Ŋediŋa laji ladhenya ŋare ŋiny. 38Abi dina ma liji lina lathapai ŋiro aŋa ŋare, alarnu, Ŋari ŋuŋun ŋiro ŋina ŋiro lira, ilal, alrinya, alapai ŋida ŋuŋun. 39Almutha, aldhiŋa dhuwa por gwai, alrinya. 40A maji ma kweleny gwa dhiruiny ila gwaji gwapaŋa gi liji lina lathapai ŋiro gi dhiruiny ganu a? 41Alaicinu, Gwaji gwarinya lijo ibile lina like, a gwadhedha lijo liter dhiruiny, lina laji luminyi didhedha fruuta gwuŋun muŋwure. 42Al Yasuuⓐ abiŋaijo, ŋwulaici, Nyaŋa lati limabiŋaijo kitham na gina garnu, Kol gina gidoinyo liji lina laico duna gimaji ŋwununi gi ŋwubil peth. Dhuŋun ibidhe dhigeto Kweleny jibalije galo dir gi je ganu dega. 43Gi dhuŋun ibidha nyi gwa gwacaijinu, Gidhila ga Kalo gaji gabrini dagalo a gadhedhini lijo liter lina laji larire fruuta. 44A kwiji gwina gwaji gwide kol alaŋ ibiga gwaji gwakiini, abi gwina gwa kol acaje gwa mirinyadhini ganu. 45A ma leleny la gusus a Farriisiyiin diŋini odaijuŋw gwuŋun aliŋa darnu gwodhadaijo degen gwai. 46Albari gwalmutha, albi dhenya lijo, ŋinena rujilo ŋinena nebi.

Currently Selected:

Matta 21: HBN

Highlight

Copy