Matta 17
17
Ŋwurujini ter gi je ganu jegen
1A dina ma ŋwamun ro nyiril ŋwodha Buṯrusuŋw a Yaⓐguub a megen gwina gwan Yuuẖanna, ŋwulodha alalo kamarigen yeta ina yolalaŋ cucun. 2Ŋwurujini ter gi je ganu jegen; ŋwuro gi je ganu ŋinena aŋin, a ciraŋ juŋun pidhe bibrul, alare gumgum. 3A Muusaŋa Iliiya gwai aŋina degen, alabiŋi Yasuuⓐ ŋalai. 4A Buṯrus abiŋaijo Yasuuⓐuŋw, ŋwaici, Kweleny gwai, gwiŋir ŋinena jilo mina, abricije anageta jutu thiril, ŋaludhijo geta, aludhijo Muusuŋw geta, aludhijo Iliiyaŋw geta. 5Dina jilo nanaŋ dabiŋi, an giburu ilalaŋ, ŋwulgiriba; a gwulo ila kiburu, ŋwarnu, Ŋari ŋiny ŋiro ibiŋa ŋina ŋuminyiny, ŋina ŋathiny iŋiriye dhugore. Deŋinaijul. 6A dina ma calmiz juŋun diŋini dhuŋuna ibidhe alide kwiyaŋ, aldhenya gwuleny. 7A Yasuuⓐ ila, ŋwulmini, ŋwulaici, Dirul, athanya dhenyo no. 8A dina maldaŋa galo, athil baŋudhi kwijo gweda no, albaŋa Yasuuⓐuŋw cucun. 9A dina ulilo amarigena nono, ŋwulabiŋaijo ŋwari lati labiŋaijo kwijo gweda dhuŋuna dhina dhaŋadhilo no, di ma Ŋari ŋa liji dire dai. 10A calmiz juŋun othaije galo, alaici, Kworaŋ athibi jathib arnu aram Iliiya gwila kwereny? 11Ŋwulabiŋaijo, ŋwulaici, Titiganu Iliiya gwila kwereny, gwageta ŋida peth momaŋ. 12Abi nyi gwa gwabiŋaijaje, ŋajaici, Iliiya gwimila di, athil liŋidhi no, albi upijo dhuŋuna dhina dhiŋiradhi ganu dilupijo; a minoŋ ko laji lanure Ŋari ŋa liji ŋina. 13Abi calmiz liŋa darnu labiŋaijuŋwulo Yuuẖanna al Maⓐmadaan.
Ŋwugeta ŋare momaŋ ŋina ŋuthi ŋurinya
14A dina malobani kalo gina gijina liji, a kwiji gweta ila dugun, ŋwide ŋwurko ŋwai ŋwora ganu dugun, ŋwaici, 15Kweleny gwai, inujiny ŋare; ŋathirure ŋwudhibaini; ŋwamun ŋwoinyadho athuŋw ida kiga a ŋau ganu. 16Nyibudhijo calmiz juŋa, nyari ŋinyil gitijo momaŋ, athilbi uthii ŋoma no. 17Albi Yasuuⓐ abiŋaijo, ŋwulaici, Liji lai lina like a lina liro jirila, nyaŋa lara alaje ŋwamun uman manaŋ? Nyaŋa lara nyi gwajabiŋaijo ŋwamun uman manaŋ? Udhijiny ŋare mina. 18A Yasuuⓐ lo ŋurinya, a ŋuriny tu dugun, an ŋari eŋiradhadha ganu gi saaⓐa ibije. 19A calmiz ila di Yasuuⓐ girimu, alabiŋaijo, alaici, Kworaŋ athanabi uthi ŋoma ŋanateye no? 20Ŋwulaicinu, Ŋinena athanya uthii uminyuŋw gwoinyadho gi dugor ganu dalo no. Titiganu nyi gwa gwacaijinu, Ada nyaŋa lina liŋirii nyuthi imaan gwitiny dogo gwiro ŋinena kwari gwina gwiro mastarda, nyaŋa laii uthi ŋoma laii abiŋaijo len ibile, lanyaici, Aro galo, miriginy, ŋa doga galo kalo ibige, a la doga galo; a dhuŋun dheda dhati dhajenaijo ganu no. 21A nyuriny nyina nyiro minoŋ nyati nyuthi ŋoma nyateyeni minoŋ dhuŋun dhai dheda no abi dhuŋun dhai dha dhabiŋaijo Kaloŋa a dha dhijalo jamu.
Gwabiŋu dhuŋuna dha ai gwuŋun ŋwamun ganu ram
22A dina jalilo Jaliil, al Yasuuⓐ abiŋaijo, ŋwulaici, Ŋari ŋa liji ŋaji ŋadhedhini gi doi ganu da liji. 23A ŋaji ŋalrinya, a ma ŋwamun ro thiril ŋadire manaŋ. A mal diŋini dhuŋuna ibidhe, alka dugore gwuleny.
Yasuuⓐ gwathimeje thulba
24Dina malobani Kafranaaẖuum, a liji lina lathimeje thulba ila di Buṯrus, alabiŋaijo, alaici, Muⓐallim gwuŋa gwati gwathimeje thulba na? 25Ŋwulaici, Ye. A dina muŋwuni kiru, a Yasuuⓐ abiŋaijo, ŋwaici, Simⓐaan, ŋa gwarakwai ŋinena athi leleny la gidhila ibiga imeje thulba? gi keleŋa gegen, i gi liji liter? 26A dina muŋw aicinu, Gi liji liter, a Yasuuⓐ aicinu, Abi keleŋa giro ẖurr. 27Abi gi dhuŋun ibidhe, athil kijo dhugore no, idhi gi baẖr, ŋuleje s̱unnaara ŋau ganu, a lum lina laŋwawala kwerkwereny, ŋabiliŋaje ŋwinyu ganu a ŋa gwaŋa gwarush; ŋapai, ŋaldhedha gwan thulba dhiny a dhuŋa.
Currently Selected:
Matta 17: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
