Matta 14
14
Ai gwa Yuuẖanna al Maⓐmadaan
1Gi lamun ibile a Hiiruudus, gwina gwiro kweleny, diŋini khabar ga Yasuuⓐ. 2Ŋwabiŋaijo jadham juŋun, ŋwulaici, Yuuẖanna al Maⓐmadaan gwiro, gwimadire dai; a minoŋ ŋiro ŋina ŋinaŋ ŋimupini ŋeda gwai. 3Hiiruudus gwimuthi Yuuẖannuŋw, ŋwuguke, ŋwugeta karkon gwan Hiiruudiiya, gwina gwiro kwa gwa megen gwina gwan Fiilibbus. 4Ŋinena abiŋaijo Yuuẖanna, ŋwaici, Gwati gwaudhi gi dhuŋun dha naamuus daŋago no. 5Athuŋw bupe duŋw rinya, ŋwubi dhenya lijo, gwuminyu liji darnu gwiro nebi. 6Abi dina ma lamun ila lina liliŋinu lai Hiiruudus, ŋwugeta ⓐazuuma, a ŋera ŋa Hiiruudiiya uni degen, ŋwulrithijo, ŋwiŋiriye Hiiruudusuŋw dhugore. 7A ŋeda abiŋaijo jiriny jai ja Kalo, ŋwaici, Ŋidi peth ŋina ŋiny othaije galo, ŋaŋal dhedha. 8Ŋinena abiŋaijanu nana gwuŋun kwereny, ŋwaici, Dhedhiny lira la Yuuẖanna al Maⓐmadaan gi sinia alaŋ. 9A malik ka dhugore; abi jiriny jai ja Kalo, a gi dhuŋun dha liji lina lijilai galo ⓐazuuma, ŋwamar ŋwari laldhedha. 10Ŋwukejiye karkon aluradha Yuuẖannuŋw lira galo. 11Alapa lira luŋun gi sinia alaŋ, aldhedha ŋera, ŋwapai, ŋwulela di nana gwuŋun. 12A calmiz juŋun ila alapai aŋina yuŋun, algwurce, alela alabiŋaijo Yasuuⓐuŋw.
Eny gwa liji lina liro khamsa alaaf
13Dina ma Yasuuⓐ diŋini dhuŋuna ibidha, ŋwuni gi felluuka ganu, ŋwela gi leba; a ma liji aŋa algwuje, alela gi ŋwen ŋwora ŋwai. 14A ma Yasuuⓐ tu gi felluuka ŋwaŋa lijo loinyadho, ŋwulina, ŋwuliŋireye nono lina luma. 15A dina ma kalo ro ŋibilbil a calmiz juŋun ila dugun, alaici, Kalo ibiga giro leba a lamun limabire; dhiŋudhi lijo alela gi ŋwen dileliya ŋida ŋa dheny. 16Albi Yasuuⓐ aicinu, Lati lar lela no; dhedhilo nyaŋa ŋida ŋa dheny. 17Alabiŋaijo, alaici, Anaŋa luthi ⓐesh thudhina a ŋwum ram dogo. 18Ŋwulaici, Upijinyilo mina. 19Ŋwabiŋaijo lijo ŋwari lajalo karo alaŋ, ŋwapai ⓐesh ina iro thudhina a ŋwum ram, ŋwubaŋalaŋ gi Sama, ŋwaici Kaloŋa shukran, ŋwurta ⓐesh ganu, ŋwudhedha calmiz juŋun, a calmiz dhedha lijo. 20Aleny peth, alpa; alothadha gwudhibur liduŋw gwina gwidi galo, alago nyuni die‐a‐ram nyoinyadho alaŋ. 21A liji lina lithi lar khamsa alaaf lina liro loma, a keleŋa ŋa la lai je ter.
Yasuuⓐ gwidhidhi ŋau alaŋ
22An Yasuuⓐ dhiŋadhadha calmiz juŋun ganu aluni gi felluuka, ŋwari gwalmadhina alela kimumu giter, ŋwubimadhe, ŋwudhiŋa lijo. 23A dina muŋw dhiŋa lijo, ŋwalo kamarigen dabiŋaijo Kaloŋa; a ma kalo ro ŋibilbil ŋwuje mine cucun. 24Abi felluuka je ŋau keligeny ganu, a ŋau alilo ganu; ŋinena gwumadhilo karun ganu. 25A dina ma kalo ro keligeny ganu gile, a Yasuuⓐ ela degen, ŋwelila ŋau alaŋ. 26A ma calmiz juŋun aŋa delila ŋau alaŋ, aldhenya, alarnu, Dhigirim dhiro; alure gwula gwuleny, aldhenya. 27Anbi Yasuuⓐ abiŋadhaijo ganu, ŋwulaici, Iŋiriyul dugore, nyi gwiro; athanya dhenyo no. 28Abi Buṯrus abiŋaijo, ŋwaici, Kweleny gwai, ada ŋa gwimaro abiŋaijiny, nyila ŋau alaŋ, nyila duguŋa. 29Ŋwaici, Ila. A ma Buṯrus tuya gi felluuka ganu, ŋwela ŋau alaŋ, ŋwela di Yasuuⓐ. 30Abi dina muŋw aŋa karuna dare gwuleny, ŋwudhenya; ŋwudari gwiduthe, ŋwure gwula, ŋwarnu, Kweleny gwai, gilaŋiyiny. 31An Yasuuⓐ dhiŋadhadha dhoi ganu babraŋ, ŋwumutha, ŋwabiŋaijo, ŋwaici, Ŋa gwina gwuthi imaan gwitiny dogo, kworaŋ ŋabiro dhugore ganu ram? 32A maluni gi felluuka, a karun erna. 33A ŋediŋa lina lijo gi felluuka ila, alorthadha, alaici, Titiganu ŋa gwiro Ŋari ŋa Kalo.
Ŋwugeta lijo momaŋ lina luma gi Janniisaarat
34A malela, alila gi len la Janniisaarat. 35A dina ma liji la len ibile liŋa, alukejiye gi len ibile peth, alunija lijo peth lina luma. 36Athi lari lamini libil la kiraŋ guŋun; a liji peth lina liminu aliŋir nono.
Currently Selected:
Matta 14: HBN
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.
