Matta 12

Anaŋa lapaŋa gi lamun la Sabith

1Kaija ibige a Yasuuⓐŋa ela gi dhiruiny ganu dha ŋwon gi lamun la Sabith; a calmiz juŋun al jamu eny ganu, algrithe ŋwona coŋ aleny. 2Abi mal Farriisiyiin aŋa, alabiŋaijo, alaici, Aŋadhi calmiz juŋa japo dhuŋuna dhina dhati dhaudhi gi dhuŋun dha naamuus dha dhapai gi lamun la Sabith no. 3Ŋwulbaici, Nyaŋa lati labiŋaijo kitham gi dhuŋun dhina dhapo Daawud dina ithilo jamu ganu, liji lai lina ligwudhi lai na? 4Ŋwuni gi dunu gwa Kalo, ŋweny ⓐesh ina yathi liji gitijo Kaloŋa, ina yati yaudhi duŋweny, i liji lina lidhilai no, athibi gusu eny cucun. 5Gwati gwulinu gi naamuus darnu, gi lamun la Sabith gusus gathikie Sabithuŋw gi hekal ganu, athilbi bujo lom na? 6Abi nyi gwa gwacaijinu, Gweta gwina gwibuthanu gi hekal gwo mine. 7Abi ada dhuŋun ibidhe dhimaje ŋwura ganu ŋwalo, Dhugor dhiny dhibupo ŋimira, gwat gwiro garini no, nyaŋa lati lakimio lijo lina lijuro ganu no. 8Ŋari ŋa liji ŋiro Kweleny gwa lamun la Sabith.

Iŋir nono gwa kwiji gweta gwina gwaio dhoi nono

9Ŋwugathani kaloŋa ibige, ŋwela gi majmaⓐ gwegen. 10A kwiji gweta je mine gwina gwaio dhoi nono, alothaije galo, alaici, Gwaudhi gi dhuŋun dha naamuus digeta kwijo momaŋ gwina gwuma gi lamun la Sabith a? Alari gwalugeje, alteje galo. 11Ŋwulabiŋaijo, ŋwulaici, Ei gwo dagalo gwina gwuthi kaŋala getipo, ada gimiduthe gi dhel ganu gi lamun la Sabith, gati guŋw mutha guŋw waladha galo por na? 12Abi kwiji gwati gwinunu gwuleny kaŋal na? Gi dhuŋun ibidha gwaudhi gi dhuŋun dha naamuus dapai dhuŋuna dhina dhiŋir gi lamun la Sabith. 13Ŋwabiŋaijo kwijo, ŋwaici, Wali dhoi ganu dhuŋa. Ŋwuwal ganu; a dhoi iŋir ŋwuro ŋinena dhoi dhiter.

Algeta dhuŋuna nyim dhina dhadhil dhai rinya Yasuuⓐuŋw

14Abi Farriisiyiin tu, alabiŋaijiye alarnu gwal dha rinya akwai? 15Dina ma Yasuuⓐ liŋa dhuŋuna ibidhe, ŋwugathani kaloŋa ibige, ŋwela; a liji loinyadho gwuje, ŋwulgeta momaŋ peth. 16Ŋwulabiŋaijo ŋwari gwati gwalaŋiye no. 17A dhuŋun uthi je ganu dhina dhabiŋu nebi gwina gwan Ishaⓐya, ŋwarnu, 18Aŋadhul gadham giny, kwiji gwina gwuminyiny, gwina gwathiny iŋiriye dhugore; gwaji gwiny geta Dhigirima nono dhiny, a gaji gaŋiye ẖukum gwiny gi Liumam. 19Gati gila ŋoŋor ŋai i gwula gwai gwipa no; i gati ga kwiji gweda diŋini gwula gwuŋun gi dhai alaŋ no. 20Karo gina gaio athuŋw kio no, a dhar dhina dhiro ŋiminyi athuŋw rinyii no, di muŋw odha hukum di dhinyi. 21A gi jiriny juŋun jaji Liumam uminyi.

Yassuⓐ gwaŋajo lijo dhuŋuna dhina dharildhainu gwathapai ŋiro ŋoma ŋai ŋa Ibliis

22Aludhijo kwijo gweta gwina gwuthi ŋurinya, gwoca a ŋwurimi gi je, ŋwuro girila; ŋwugeta momaŋ, ŋwuthi ŋoma ŋwabiŋi, gwoca ŋwaŋa. 23A liji peth ali galo dir, alarnu, Ŋari ŋa Daawud ŋutu na? 24Abi dina ma Farriisiyiin diŋini, alarnu, Kwiji ibigwa gwathiteye nyurinya gi liji ganu ŋoma ŋai ŋa Baⓐlazabuul gwina gwiro kweleny gwa nyuriny. 25Ŋwubiliŋa dhuŋuna dhina dhijo gi dugor ganu degen, ŋwulaici, Ada gidhila geta gimorlaiji ganu, a gidhila ibige gati gaje no; i ada liji la len letipo i dunu gwetipo limorlaiji ganu, lati laje no. 26Abi ada Sheṯaan gwimorlani ganu gwidom gwuŋun, ŋwuruje ganu ram, a gidhila guŋun gaje akwai? 27Abi ada nyi gwimathiteye nyurinya ŋoma ŋai ŋa Baⓐlazabuul gi liji ganu, abi nyathil keleŋa galo teye ŋoma ŋai ŋa dhei? gaji gajakimiye. 28Abi ada nyi gwimathiteye nyurinya ŋoma ŋai ŋa Dhigirim dha Kalo, gidhila ga Kalo gimila dagalo. 29Kwiji gwate gweda gwina gwathuni gi dunu gwa kwiji gwina gwibur nono, ŋwapai ŋida ŋuŋun ŋwuramai no, ada gwati gwimuŋwguke kwereny no; ada gwimuŋwguke kwereny, gwuthi ŋoma gwapai ŋida ŋuŋun ŋwuramai. 30Kwiji gwina gwati gwiŋiriyana gwai no, gwikiana gwai; a kwiji gwina gwati gwurejana gwai liduŋw no, ŋwudigir ganu. 31Minoŋ nyi gwa gwabiŋaijaje, ŋajaici, Ŋidi peth a lo peth ŋina ŋathil abiŋa Kaloŋa nono ŋaji ŋani dhudhani ganu; abi dhuŋun dha dhilo Dhigirima dhina Dhiŋir dhati dhani dhudhani ganu gatur no. 32Ada kwiji gweta gwimabiŋa Ŋari ŋa liji dhuŋuna nono dhina dhike, gwaji gwani dhudhani ganu; abi ada kwiji gweta gwimalo Dhigirima dhina Dhiŋir, gwati wguthi dhudhanuŋw ganu gatur no kidhila ibiga, i gina gaji gila. 33Getul kware gwiŋir, a fruuta gwuŋun gwiŋir; getul kware gwike, a fruuta gwuŋun gwike. Kwari gwathiliŋini fruuta gwai gwuŋun. 34Nyaŋa lina liro keleŋa ga juma, nyaŋa luthi ŋoma labiŋi dhuŋuna dhina dhiŋir lina liro liji lina like a? Dhugor dhina dhuthi dhuŋuna dhoinyadho dhathabiŋi. 35Kwiji gwina gwiŋir gwathapai dhuŋuna dhina dhiŋir ŋidi ŋai ŋuŋun ŋina ŋiŋir; a kwiji gwina gwike gwathapai dhuŋuna dhina dhike ŋidi ŋai ŋuŋun ŋina ŋike. 36A nyi gwa gwaicajinu, Gi lamun lina laji lal Kalo akimiye gidhileo guŋun dhuŋun peth dhina dhati dhaudhi no dhina dhabiŋinu dhaji dhurlani ganu. 37Gi dhuŋun dhalo dhaji dhaliŋirini, a gi dhuŋun dhalo nyaŋa laji lanakiminadhini.

Ŋeda gwidoinyo dhuŋuna dhan ⓐalaama

38A Farriisiyiinŋa jathib jai coŋ alabiŋaijo, alaici, Muⓐallim gwai, anaŋa lara laŋa ⓐalaama daŋapai. 39Ŋwulabiŋaijo, ŋwulaici, Liji lina like lathibupe ⓐalaama, abi lati laŋa ⓐalaama no, abi ⓐalaama gwaje degen dogo gwa Yuunaan gwina gwiro nebi. 40Gwiro ŋinena jina Yuunaan ŋwamun thiril aŋina a gile kari ganu ga lum lina lipa; minoŋ ko Ŋari ŋa liji ŋaji ŋaje ŋwamun thiril aŋina a gile gi dhugor ganu dha gidhila. 41Liji la Niinawa laji ladire alakimiye lijo ibila, alilo ŋinena athil urlo dugore galo degen gi ŋidi ŋina ŋike gi dhuŋun dhina dhabiŋaijilo Yuunaan; abi ŋinena gwina gwinunu di Yuunaan gwo mina. 42A malika gwa Januub gwai gwaji gwadire, ŋwakimiye lijo ibila, ŋwulilo; a ŋeda gwidhi ro kalo gina girmina gidhila galo ŋwari gwadiŋini dhuŋun dhadhi bebra dha Sulemaan; abi ŋinena gwina gwinunu di Sulemaan gwo mina.

Dhuŋun dhibur kwiji gwina gwati gwimaliŋini momaŋ no

43Mathi ŋuriny tu kwiji ganu athuŋwela kalo gina gudho galo ŋwubupe dari ŋagatho uwa, athuŋw buthi ŋoma no. 44Ŋwaji ŋwarnu, Nyi gwaura gi dunu gwiny gwina gwidhinyina kwereny; a muŋw aura, ŋwubuje gwudho ganu, ŋwudimujini a ŋwudamirini. 45A muŋw ela, ŋwodhami nyurinya kworoŋo‐thiril nyina nyikanu dugun, alinyuni anije; a kwiji ibigwe aji ŋwukani gwuleny gi kwereny. Minoŋ ko liji ibila lina like laji lando.

Limaguri titiganu

46Dina juŋw nanaŋ dabiŋaijo lijo a nana gwuŋun a limegen ila, aldhuna por, alari gwal abiŋi. 47Abi kwiji gweta abiŋaijo, ŋwaici, Aŋadhi, nana gwuŋa a limagalo lo por, alari laŋabiŋaijo. 48Ŋwubabiŋaijo gwina gwabiŋaijo, ŋwaici, Ei gwiro nana gwiny a limaguri? 49Ŋwaŋiye calmiz juŋun, ŋwabiŋaijo lijo, ŋwulaici, Aŋadhul, nana gwiny gwiro ibigwa a limaguri. 50Kwiji gwina gwathapai dhuŋuna dhina dhibupo Babo gwiny gwina gwathije Sama ŋeda gwiro maguri gwina gwiro kwoma, a gwina gwiro ŋera, a nana gwiny.

Currently Selected:

Matta 12: HBN

Highlight

Copy