Luuga 24

Kimu gina gudho ganu

1Gi lamun la asbuuⓐ lina liro lira, alapa ŋela ŋina ŋiro gwudhurul ŋina ŋigetilo momaŋ, alŋela kimu ro gile. 2Albuje kolya dijalo gi dhiria a kimu jalo kina. 3Aluni, athilbibujo aŋina ya Yasuuⓐ gwina gwiro Kweleny no. 4A dina irelo je galo gi dugor ganu degen gi dhuŋun ibidhe, al liji ram dhunejo galo lina liro loma, ligeno ciraŋa jina jipidho bibrul, alare gumgum. 5A la dhenya gwuleny, alrilini galo, albi loma abiŋaijo, allaici, Kworaŋ nyabi bupe kwijo gwina gwimidho kalo ga liji lina laio? 6Gwati mina no, abi gwimadire. Aŋidhanul dhuŋuna dhuŋun dhina dhabiŋaijaje dina gwoma dinejuŋw Jaliil. 7Ŋwarnu, Aram Ŋari ŋa liji ŋaldhedha lijo lina like, a ŋalrinya gi lure alaŋ lina limaliganu, a ma ŋwamun ro thiril ŋadire manaŋ. 8Alaŋidhani dhuŋuna dhuŋun. 9Algathani kimu, alaurai, alabiŋaijo calmiz juŋun dhuŋuna ibidhe peth jina jiro die‐a‐gwetipo, a jiter peth. 10Maryam al Majdaliiyaŋa liro lina labiŋaijo lina lukejinu dhuŋuna ibidhe Yuwanna gwai, a Maryam, gwina gwiro nana gwa Yaⓐguubŋa, a la liter lina lijilai. 11A degen dhuŋun dhegen ro ŋinena dhuŋun dhina dhati dhuthi je ganu no, athilbuminyu no. 12A Buṯrus dire, ŋworta kimu, ŋwujule ganu, ŋwaŋa ciraŋa dijalo cucun, ŋwaurai, ŋwire je galo ŋinena ma dhuŋun ibidhe uthi je ganu.

Yasuuⓐ gwuŋinu gi dhai dhina dhiludhi ⓐimwaas

13Gi lamun ibile a calmiz ram ela gi len leta lina lan ⓐimwaas, lina lijaijo Urushaliimuŋw githo gwar miil kworoŋo‐thiril. 14Alabiŋaijiye degen ganu dhuŋun dhai ibidhe peth dhina dhimuthi je ganu. 15A dina abiŋilo alothaijiye galo, a Yasuuⓐ doga, alligwudhie. 16Albidhimetha, lekajilo dilliŋa. 17Ŋwulabiŋaijo, ŋwulaici, Nyaŋa labiŋaŋa dina idhanya, nyaka ŋida gi dugor ganu? 18A gweta degen abiŋaijo, gwina gwan Kiluuba, ŋwaici, Ŋa gwati gwiro kwiji gwa Urushaliim na, ŋanbi jalo gwetipo, athaŋabi diŋinu dhuŋuna dhina dhuthi je ganu na? 19Ŋwulabiŋaijo, ŋwulaici, Dhuŋun dhiro dhaŋ? Alaici, Dhuŋun dha Yasuuⓐ gwa Naas̱ira dhiro, gwina gwiro nebi gwina gwathapai dhuŋuna dhina dhinaŋ, athuŋw abiŋi dhuŋuna dhina dhinaŋ gi je ganu ja Kalo a gi liji peth. 20A leleny la gusus a leleny luri odhadha gi juriya, alare gwai, alrinya gi lure alaŋ lina limaliganu. 21Abi anaŋa luminyu darnu ŋeda gwairo gwa dhubire Israayiiluŋw, abi gwimai, a ŋinena ŋwamun ro thiril ma ŋidi ibiŋe upini. 22Abi la coŋ lina lathanalje lalijije galo dir, lina lijo kimu ro gile; 23athilbibujo aŋina yuŋun no, alila, alarnu, malaayka ram luŋinu degen, allaici gwimamidhe. 24A liji coŋ lina lijanalai alela kimu, albuje dhuŋuna diro ŋinena abiŋina la, athilbaŋudhi no 25Ŋwulabiŋaijo, ŋwulaici, Jirila jai jina jati jathuminyi dhuŋuna dhina dhabiŋu nebiŋa no. 26Aram al Masiiẖ gwati gwaiuthi dhuŋuna ibidhe peth na, ŋwuni gi majdh gwuŋun? 27Ŋwari ŋwulabiŋaijo dhuŋuna peth dha jitham dhina dhuladhinu dugun gwai, ŋwulaŋajo dha Muusa kwereny, a dha nebiŋa liter. 28Dina mal doga gi len lina liludhina, ŋwari ŋwudoga kwereny. 29Albekajo, alaici, Aljalo, kalo ga gara garo ŋibilbil, a lamun laji lerna. Ŋwuni kiru, allijalo. 30A dina jaijilo tharabeza galo, alari leny, ŋwapai ⓐesh, ŋwuyabiŋaijo Kaloŋa, ŋwurta ganu, ŋwuldhedha. 31A je jegen ure ganu, alliŋa, ŋwurinyini, athil aŋudhi no. 32Alabiŋaijiye, alarnu, Dina abiŋaijije gi dhai, jaŋajo dhuŋuna dha jitham anaŋa lati liŋir dugore gwuleny na? 33Andiredha ganu, alaurai Urushaliim, albuje calmiz jina jiro die‐a‐gwetipo dijalo liduŋw, a liji lina lathilije. 34Alarnu, Kweleny gwimadire titiganu, ŋwuŋinijo Simⓐaanuŋw. 35Allabiŋaijo dhuŋuna dhina dhuthi je ganu gi dhai, a dhina dhaŋadhilo dina urtudhuŋw ⓐesh ganu.

Yasuuⓐ gwuŋinijo calmiz

36Dina abiŋilo minoŋ a Yasuuⓐ dhuna keligeny ganu degen, ŋwulabiŋaijo, ŋwulaici, Amanul ganu. 37Albidhenya gwuleny, alare gi dugor ganu nu laŋadhi dhigirima. 38Ŋwulbabiŋaijo, ŋwulaici, Kworaŋ ŋajibi dugor miri, nya ire je galo? 39Aŋadhul doi diny, nyaŋa ŋwora ŋwiny, nyaliŋa darnu nyi gwiro. Minyilo, nyalaŋa; dhigirim dhati dhuthi aŋina ina yuthi ji a ŋwui, gwiro ŋinena aŋadhinyina no. 40A dina muŋwabiŋi minoŋ, ŋwulaŋajo doi duŋun a ŋwora ŋwuŋun. 41A dina uludhil galo dir, aliŋir dugore gwuleny, athilbuthi ŋoma luminyi darnu dhuŋun ibidhe dhiro titiganu no, ŋwulabiŋaijo, ŋwulaici, Nyaŋa luthi ŋida ŋa dheny mina? 42Aldhedha ji jitiny ja lum lina limanu, a lai. 43Ŋwapai, ŋweny gi je ganu jegen. 44Ŋwulabiŋaijo, ŋwulaici, Dilaŋ jilo, nyi gwabiŋaijaje dhuŋuna dhina dhiro minoŋ, ŋajaici, Dhuŋun peth aram dhuthi je ganu dhina dhuladhinu diginy gwai gi jitham ja Muusa, a ja nebiŋa, a gi mazaamiir. 45Ŋwigiye ŋadigirenya ŋegen dil liŋa jitham. 46Ŋwulabiŋaijo, ŋwulaici, Dhulinu minoŋ, ŋwarnu, Aram al Masiiẖ gwai, a ma ŋwamun ro thiril gwadire dai. 47A dhuŋun dha dhurle dugore galo gi ŋidi ŋina ŋike, al Kalo ubire, dhabai galo gi jiriny juŋun gi liji la ŋwen peth ŋwa gidhila; dhabiŋini kwereny gi Urushaliim. 48A nyaŋa liro shuhuud gwa dhuŋun ibidhe. 49A aŋadhul, nyi gwajukeje gi dhuŋun dhina dhabiŋaijo dhai Babo gwiny; nyabi jalo gi mediina gwina gwan Urushaliim, di ma nyapai ŋoma ŋina ŋulo Kabo.

Alo gwa Yasuuⓐ dina muŋwalo gi Sama

50Ŋwulodha di mal obani Betⓐanya, ŋwalije doi alaŋ, ŋwulbarkiye. 51A dina muŋwulbarkiye, ŋwulgathani, ŋwalo Sama. 52Alorthadha, alaurai Urushaliim iŋir gwai dugore. 53Athil je hekal gigina, athinorthadha Kaloŋa, alneye jiriny juŋun. Amiin.

Currently Selected:

Luuga 24: HBN

Highlight

Copy