Yuuḥanna 20

ẒUHUUR YASUUV BAVD GIYAAMTU LE MARYAM WA TALAAMIIZU

1Wa fi awwal yoom al usbuuv, Maryam al Majdaliyya jaat le_l gabur badri, wa_d dunya lissav ḍulumma. Wa shaafat al ḥajar marfuuv van al gabur. 2Wa jarat le Simvaan Buṭrus wa le_t tilmiiz at taani al Yasuuv kaan biḥibbu. Wa gaalat leehum, “Hum axadu_s Saiyid min al gabur, wa maa binavrif xaṭṭoohu ween.” 3Wa Buṭrus wa_t tilmiiz at taani maragu, wa mashu le_l gabur. 4Al itneen jaru sawa, laakin at tilmiiz at taani faat Buṭrus wa wiṣil al gabur fi_l awwal. 5Wa dangar, wa shaaf al gumash maxṭuuṭ, laakin hu maa daxal. 6Wa bavdeen Buṭrus wiṣil waraahu, wa daxal al gabur. Wa shaaf al gumaash maxṭuuṭ. 7Wa_l mandiil al kaan maxṭuuṭ vala raasu, maa kaan mawjuud mava at tiil. Al mandiil da kaan malfuuf wa maxṭuuṭ fi makaan baraahu. 8Bavdeen, at tilmiiz at taani aj ja fi_l awwal, daxal, wa shaaf wa aaman. 9Wa hum lissav maa kaanu vaarfiin al maktuub fi_l Kitaab ’innu laazim yaguum min been al meyyitiin. 10Bavd kida, at tilmiizeen rajavu le buyuutum.

11Laakin Maryam wagafat tabki vind al gabur barra. Wa lamma kaanat bitabki, dangarat vashaan tashuuf juwwa_l gabur. 12Wa shaafat itneen malaaika fi hiduum abyaḍ, gaavdiin fi_l makaan aj jism kaan maxṭuuṭ fiihu, waaḥid fi maḥall ar raas, wa_t taani fi maḥall al kirveen. 13Wa gaalu leeha, “Yaa sitt, le shinu bitabki?” Gaalat leehum, “Axadu Saiyidi, wa maa vaarfa xaṭṭoohu ween.” 14Wa lamma gaalat kida, vaayanat waraaha, wa shaafat Yasuuv waagif, wa maa virfat huwa Yasuuv. 15Yasuuv gaal leeha, “Yaa sitt, maalik bitabki? Inti daayira minu?” Wa hiya iftakarat huwa kaan aj jinaaini. Wa gaalat leehu, “Yaa Saiyid, iza inta shiltu, guul leiya ween xaṭṭeetu, wa ana bashiilu.” 16Yasuuv gaal leeha, “Yaa Maryam.” Wa hiya vaayanat waraaha, wa gaalat leehu be lughat al Yahuud, “Rabbooni!” yavni, “Yaa Muvallim.” 17Yasuuv gaal leeha, “Maa talmisiini, vashaan ana lissav maa rajavta le_l Abu. Laakin amshi le axwaani, wa guuli leehum, Ana barjav le Abuui wa Abuukum, wa Ilaahi wa Ilaahkum.” 18Wa Maryam al Majdaliyya jaat, wa xabbarat at talaamiiz ’innaha shaafat ar Rabb, wa hu gaal leeha kida.

19Wa kaan al misa fi_l yoom al awwal fi_l usbuuv. Wa be sabab al xoof min al Yahuud, al abwaab kaanat magfuula makaan at talaamiiz kaanu mitlammiin fiihu. Wa Yasuuv ja wa wagaf fi_l wasiṭ, wa gaal leehum, “Salaam leekum.” 20Wa lamma gaal kida, warraahum iideehu wa janbu. Wa_t talaamiiz faraḥu lamma shaafu_r Rabb. 21Wa Yasuuv gaal leehum marra taanya, “Salaam leekum. Zei maa al Abu rassalni, ana barassilkum.” 22Wa lamma gaal kida, itnaffas valeehum wa gaal, “Agbalu_r Ruuḥ al Gudus. 23Iza taghfiru le aiyi zool xaṭaayaahu, takuun maghfuura. Wa iza maa taghfiru le aiyi zool xaṭaayaahu, maa takuun maghfuura.”

YASUUV YAẒHAR LE TUUMA

24Laakin Tuuma, waaḥid min al iṭnaashar, al ismu_t Teemaan, maa kaan mavaahum lamma Yasuuv ja. 25Wa_t talaamiiz at taanyiin gaalu leehu, “Niḥna shufna_r Rabb.” Laakin huwa gaal leehum, “Iza maa bashuuf maḥall al masaamiir fi iideehu, wa baxuṭṭ aṣbavi fi maḥall al masaamiir, wa baxuṭṭ iideiya fi janbu, ana maa ba’aamin.”

26Wa bavd tamaanyat aiyaam, at talaamiiz kaanu fi_l beet taani marra, wa Tuuma kaan mavaahum. Wa_l abwaab kaanat magfuula. Laakin Yasuuv ja wa wagaf fi wasiṭum wa gaal, “Salaam leekum.” 27Bavdeen hu gaal le Tuuma, “Xuṭṭ aṣbavak hina, wa shuuf iideiya, wa midd iidak, wa xuṭṭa fi janbi. Wa maa takuun biduun iimaan, laakin aamin.” 28Tuuma radda wa gaal leehu, “Rabbi wa Ilaahi!” 29Yasuuv gaal leehu, “Vashaan inta shuftani, yaa Tuuma, aamanta? Mubaarakiin an naas al aamanu wa maa shaafu.”

30Wa Yasuuv vamal valaamaat katiira taanya giddaam talaamiizu, al maa maktuuba fi_l Kitaab da. 31Laakin di maktuuba vashaan ta’aaminu ’in Yasuuv huwa_l Masiiḥ Ibn Allaah. Wa lamma ta’aaminu, takuun leekum ḥayaat b_ismu.

Currently Selected:

Yuuḥanna 20: APD1978

Highlight

Copy